(006SV)
စစ်ကောင်စီတပ်စွဲထားသည့် ထန်တလန်မြို့ပေါ် ရဲစခန်းတွင် စစ်ကောင်စီတပ်ဖွဲ့နှင့် ချင်းပြည်အစိုးရပူးပေါင်းတပ်များအကြား ယနေ့ တိုက်ပွဲ အပြင်းအထန်ဖြစ်ပွားနေကြောင်း ချင်းအမျိုးသားတပ်ဦး ပြောရေးဆိုခွင့်ရှိသူ ဆလိုင်းထက်နီက ပြောသည်။
ယနေ့ အောက်တိုဘာလ ၂၂ ရက် မနက် ၃ နာရီမှစတင်၍ ချင်းပြည်အစိုးရ ပူးပေါင်းတပ်များက ရဲစခန်းတွင် တပ်စွဲထားသည့် စစ်ကောင်စီတပ်ကို ထိုးစစ်ဆင်တိုက်ခိုက်ခဲ့ရာ နံနက် ၁၁ နာရီခွဲအထိ တိုက်ပွဲမှာ ဆက်လက်ဖြစ်ပွားနေဆဲဖြစ်ကြောင်း ဆလိုင်းထက်နီက ပြောသည်။
“ဒီနေ့ ထန်တလန်မှာ တိုက်ပွဲ ပြင်းထန်နေတာက ဟုတ်ပါတယ်။ ဒါပေမယ့် တိုက်ပွဲက အခုထိ မပြီးသေးဘူး။ အခုထိတော့ အထိအခိုက် အခြေအနေ အသေးစိတ်က မသိရသေးပါဘူး။ အခုက ရဲစခန်းမှာ ဖြစ်နေတာပါ” ဟု ဆလိုင်းထက်နီက ပြောသည်။
စစ်ကောင်စီသည် ဂျက်ဖိုက်တာဖြင့်လည်း လေးကြိမ်ခန့် တိုက်ပွဲဖြစ်ပွားနေသောနေရာကို လာရောက်ပစ်ကူပေးခဲ့ကြောင်း သိရသည်။
ထန်တလန်မြို့ပေါ်တွင် အမျိုးသားဒီမိုကရေစီအဖွဲ့ချုပ် (NLD) ရုံး အဆောက်အအုံနှင့် ရဲစခန်းတို့တွင် စစ်ကောင်စီတပ်ဖွဲ့က တပ်စွဲထားဆဲဖြစ်ပြီး ချင်းပြည်အစိုးရပူးပေါင်းတပ်များက မြို့ကို အလုံစုံသိမ်းနိုင်ရေး ဆက်လက်ထိုးစစ်ဆင်နေခြင်းဖြစ်ကြောင်း သိရသည်။
ဟားခါး- ထန်တလန်ကြားတွင်လည်း စစ်ကြောင်းထိုးလာသည့် စစ်ကောင်စီတပ်နှင့် ချင်းပြည်အစိုးရ ပူးပေါင်းတပ်များအကြား နေ့စဉ်တိုက်ပွဲများ ဖြစ်ပွားနေပြီး လက်ရှိ ၃ ရက်အတွင်းက ဟားခါး- ထန်တလန်ကြား တိုက်ပွဲတွင် စစ်ကောင်စီဘက် အထိအခိုက်များကြောင်း ဆလိုင်းထက်နီက ပြောသည်။
စစ်ကောင်စီသည် ဟားခါး- ထန်တလန်ကြားက လက်လွှတ်ခဲ့ရသော ဗျူဟာအရ အရေးပါသော စစ်စခန်းများကို ပြန်လည်သိမ်းနိုင်ရေး အောက်တိုဘာလ ၁၃ ရက်က ဟားခါးမှ စစ်ကား ၇ စီးဖြင် စစ်ကြောင်းထိုးလာခဲ့ရာ ၁၄ ရက်မှစတင်၍ တိုက်ပွဲများဖြစ်ပွားခဲ့ကြောင်း၊ လက်ရှိတွင် စခန်းတချို့ကို ချင်းပူးပေါင်းတပ်ဖွဲ့မှ လက်လွှက်ထားရကြောင်း သိရသည်။
ထန်တလန်နှင့် ဟားခါး- ထန်တလန်ကြားက တိုက်ပွဲများတွင် စစ်ကောင်စီသည် ဟားခါးမှ စစ်ကူများ ထောက်ပံ့ပေးနေပြီး လေကြောင်းပစ်ကူ၊ လက်နက်ကြီးပစ်မှုများ၊ ဒရုန်းများပါအသုံးပြု၍ အပြင်းအထန် တိုက်ခိုက်နေကြောင်း သိရသည်။
ချင်းပြည်အစိုးရ ပူးပေါင်းတပ်နှင့် စစ်ကောင်စီတပ်တို့သည် ထန်တလန်နှင့် ဟားခါး-ထန်တလန်ကြားက တိုက်ပွဲများတွင် နှစ်ဖက်ထိခိုက်သေဆုံးမှုများလည်းရှိကြောင်း သိရသည်။
