၂၀၁၃ နှစ်ဦး ချင်းပြည်နယ်ရုပ်ပုံလွှာ

0

(ဇလပ်ထက်နီ) လူတိုင်းလူတိုင်းမှာ ကိုယ့်အယူအသီးသီးရှိကြသည်။ ကိုယ့်အတွက် ဖြစ်ပြီး၊ ဖြစ်ဆဲ၊ ဖြစ်လာမည့် အရာ များအပေါ် အယူ အသီးသီး ဖြင့်ဆွဲတွေးပြီး ပြောဆို ဝေဖန်ပြီး နိမိတ်တွေကောက်ယူတတ်ကြသည်။ စာရေးသူလည်း လူသားထဲက လူသားမို့ ၂၀၁၃ ခုနှစ်သည် ချင်းလူမျိုးများအတွင်း ခါတိုင်းနှစ်နှင့် မတူထူးခြားသည်ဟု နိမိတ်ကောက်ဖော်ပြလိုသည်။

–       ချင်းလူမျိုးများသည် ပင်လုံသဘောတူညီချက်အရ ပြည်ထောင်စုမြန်မာနိုင်ငံတော် ဖွဲ့စည်းတည်ဆောက်ရာမှာ တတပ်တအား ပါဝင်ခဲ့သည့် တိုင်းရင်းသားလူမျိုးစု တခုပါ၊ တိုင်းရင်းသားလူမျိုးများ ဥမကွဲသိုက်မပျက် အတူတကွယှဉ်တွဲ နေထိုင်ရေးအပေါ် တစိုက်မတ်မတ်ရပ်တည်လာခဲ့ကြတဲ့ လူမျိုးလို့ပြောရယင် သမိုင်းအထောက်အထားနဲ့ ရှိတာမို့ မလွန် လောက်ပါဘူး၊ သို့သော် မြန်မာနိုင်ငံအစိုးရ အဆက်ဆက် ချင်းပြည်နယ်ရှိ ချင်းပြည်သူများအနေဖြင့် နိုင်ငံတော် ၀န်ကြီး ချုပ်၊ နိုင်ငံတော် သမ္မတဆိုတာ နာမည်သာကြားပြီး မမြင်ဘူးကြပါ၊ ပင်လုံးစာချုပ်အရ ပြည်ထောင်စု ဖွဲ့စည်းတည် ဆောက်ရာမှာ ပါဝင်လာခဲ့တဲ့ ချင်းလူမျိုးများအနေဖြင့် ပြည်ထောင်စု သမ္မတ၊ ၀န်ကြီးချုပ်ဆိုတာ မမြင်ဘူးကြပါ ဆိုတာက ကြားလို့တောင်မကောင်းပါ။ သို့သော် အစိုးရသစ်တက်လာသည့် နောက်ပိုင်း ၂၀၁၃ ခုနှစ်မှာမူ နိုင်ငံတော် သမ္မတ ဦးသိန်းစိန်သည် ချင်းပြည်နယ်သို့ လာရောက်ပြီး ပြည်သူများ၊ နိုင်ငံရေးခေါင်းဆောင်များ၊ ဘာသာရေးခေါင်း ဆောင်များ နှင့် ရင်းရင်း နှီးနှီး တွေ့ဆုံခဲ့သည်။ ချင်းပြည်နယ်၏ အဓိကလိုအပ်ချက်များဖြစ်သော လမ်းပန်းဆက်သွယ်ရေး၊ လျှပ်စစ်မီး နှင့် သောက်သုံးရေ ဖူလုံစွာရရှိ နိုင်ရေးတို့ကို အစိုးရအနေဖြင့် အမြန်ဆုံးအကောင်အထည်ဖော်ဆောင်သွားမည်ဟု နိုင်ငံ တော် သမ္မတ ဦးသိန်းစိန်က ချင်းပြည်သူများထံ ဂတိပြုပြောဆိုခဲ့သည်။ဒုတိယ သမ္မတ စိုင်းမောက်ခမ်းလာလိမ့်မည်၊ ကော လဟာ လတွေ ကြားက ချင်းပြည်သူတွေ မမှန်းရဲတဲ့ သမ္မတ ဦးသိန်းစိန် ကိုယ်တိုင်လာရောက်ခြင်းသည် ချင်းပြည် သူတွေအတွက် ၂၀၁၃ ခုနှစ်ဟာ ထူးခြားသည်ဟု ဆိုချင်သည်။

– မြန်မာနိုင်ငံတွင် အဆင်းရဲဆုံးပြည်နယ်တခုဖြစ်သော ချင်းပြည်နယ်တွင် (World Bank) ကမ္ဘာ့ဘဏ်က လူထုအခြေပြု ဖွံ့ဖြိုးရေးလုပ်ငန်းများကို ယခုနှစ်မှ စတင်အကောင်ထည်ဖော်တော့ မည်ဟု သိရသည်။ World Bank ရန်ကုန်ဌာနခွဲမှ ကိုယ်စားလှယ်များ နှင့် ချင်းပြည်နယ် အစိုးရ၊ ဒေသတွင်း NGO အဖွဲ့အစည်းများ၊ မြို့မိ မြို့ဖတို့သည် ပြီးခဲ့သည့် ဖေ ဖော်ဝါရီ က ဟားခါးမြို့တော်တွင် တွေ့ဆုံခဲ့ကြရာ  ချင်းပြည်နယ် ၊ ရှမ်းပြည် နယ်၊ တနင်္သာရီတိုင်းဒေသကြီးတို့၌ ဖွံဖြိုး ရေး လုပ်ငန်းများကို ယခုနှစ်ကစပြီး စတင်အကောင် ထည်ဖော်ဆောင် ရွက် မည်ဟု  World Bank ကိုယ်စားလှယ်များ က ပြောကြားလိုက်ကြသည်။

– ချင်းပြည်နယ်တွင် ငြိမ်းချမ်းရေး နှင့် ပွင့်လင်း လူ့အဖွဲ့အ စည်းဖော်ဆောင်ရေးဟောပြောရန် ကိုမင်းကိုနိုင် ဦးဆောင်သော ၈၈ မျိူး ဆက်ကျောင်း သား အဖွဲ့  ချင်းပြည်နယ်သို့ ရောက်ရှိလာခဲ့ကြသည်။ ယခု ခရီးစဉ်သည် ၈၈ မျိူးဆက် ကျောင်း သားများ၏ ပထမဦးဆုံးအကြိမ် ချင်းပြည်နယ် ခရီးစဉ်ဖြစ်ပြီး စစ်ကိုင်းတိုင်း ကလေးမြို့မှတဆင့် ချင်းပြည် နယ်ကို ခရီးဆက် ခဲ့ကြခြင်းဖြစ်သည်။ အမှန်ဆိုယင် ၈၈ မျိုးဆက်ဆိုတာ မျက်မှောက်ခေတ် နောက်ပေါက်လူငယ်များကြားတောင် ကြားဘူး မှာ မဟုတ်သော်လည်း ယခင် ၈၈ အရေးအခင်းကာလက တက္ကသိုလ်ကျောင်းသား များကို ဦးဆောင်သည့် ခေါင်းဆောင် များဟာ ငြိမ်းချမ်းရေး နှင့် ပွင့်လင်းသည့် လူ့အဖွဲ့အစည်းဖော်ဆောင်ရေးကို ချင်းတောင်သို့ သယ်ဆောင် လာခဲ့ကြသည်။

မဆလ အစိုးရလက်ထက်ကတည်းက နောက်ဆုံး စစ်တပ်အုပ်ချုပ်ရေးကာလအထိ မှေးမှိန်သွားခဲ့သည့် ချင်းအမျိုး သား များအတွက် သမိုင်းဝင် ဖေဖေါ်ဝါရီ ၂၀ ချင်းအမျိုးသားနေ့ကို ၂၀၁၃ ခုနှစ်မှာ တရားဝင် ပြန်လည်ကျင်းပနိုင်ခဲ့သည်။ ထိုသို့ ကျင်းပ နိုင်ခြင်းသည် ၂၀၁၂ ခုနှစ် နှစ်ဦးကတည်းက နိုင်ငံတော်အစိုးရ နှင့် ချင်းအမျိုးသားတပ်ဦးတို့၏ အပစ် အခပ် ရပ်စဲပြီး ငြိမ်းချမ်းရေးသဘောတူညီမှု၏ ရလဒ်ပင်ဖြစ်သည်။ လွန်ခဲ့သည့် နှစ်ပေါင်း ၆၀ ကျော်က ချင်းလူမျိုး များအ တွင်း လူထု ၅ ထောင်ခန့်တက်ရောက်သည့် အကြီးကျယ်ဆုံးသောဖလမ်းညီလာခံကနေ မွေးဖွားပေးခဲ့ သည့် ချင်းအမျိုး သားနေ့ကို ချင်း ပြည်နယ်နေ့အဖြစ် အဓိပါယ်မဲ့စွာ ကျင်းပလာခဲ့သည့် ဖေဖေါ်ဝါရီ ၂၀ ချင်းအမျိုး သားနေ့ကို ယခုနှစ် မှာမှ  ချင်းအမျိုးသား နေ့အဖြစ် စည်ကားသိုက်မြိုက်စွာ  ပြန်လည်ကျင်းပနိုင်တာဟာဖြင့်  ၂၀၁၃ ခုနှစ်ဟာ ချင်း တို့အ တွက်ဖြစ်သည်ဟု ဆိုရမှာပါ။ ချင်းအမျိုးသားနေ့ကို ချင်းပြည်နယ် မြို့တော် ဟားခါး အပြင် တခြား ရှစ်မြို့နယ်၊ မြန်မာ နိုင်ငံအတွင်း ချင်းလူမျိုးများနေထိုင်ရာ အသီးသီး နှင့် ပြည်ပ ရောက် ချင်းလူမျိုးများရှိရာအသီးသီးတွင် အမျိုးသား ရေး အနှစ်သာရရှိရှိဖြင့် ကျင်းပခဲ့ကြသည်။ မြို့တော်ဟားခါး ချင်းအမျိုးသားနေ့ အခမ်းအနားသို့ ပြည်ထောင်စု ၀န်ကြီးများ၊ ချင်းပြည်နယ် ၀န်ကြီးချုပ် အပါအ၀င် ချင်းလက်နက်ကိုင်တော်လှန်ရေး ခေါင်းဆောင်များတက်ရောက် နိုင်ခဲ့ကြခြင်း သည် ၂၀၁၃ ခုနှစ်ဟာ ချင်းလူမျိုးများအတွက် ကောင်းသော နိမတ်လေလား တွေးစရာဖြစ်နေသည်။

–  ချင်းပြည်နယ်အတွင်း အင်အား အကြီးဆုံး ချင်းလူမျိုးစုပါတီများဖြစ်သည့် ၂၀၁၀ ရွေးကောက်ပွဲအနိုင်ရ ချင်းအမျိုးသား ပါတီနှင့် ချင်းတိုးတက်ရေးပါတို့နှစ်ဦးနှစ်ဖက် ကြိုးပမ်းလာခဲ့သည့် နှစ်ပါတီပေါင်းစည်းပြီး ၂၀၁၅ ရွေးကောက်ပွဲ တွင် ယှဉ်ပြိုင်ရန် ပြင်ဆင်နေကြသည်။ အဆိုပါ ပါတီပေါင်းစည်းရေးကို ချင်းအမျိုးသားတရပ်လုံး မျှော်လင့်ခဲ့ကြတာပါ။ ကိုယ့်ဒေ သကို ကိုယ့်လူမျိုးစု ပါတီက ဦးဆောင်ပြီး အစိုးရဖွဲ့စေချင်သည့် ပြည်သူ၏ လိုလားချက် ကို နှစ်ပါတီက လေးစားသ မှုပြုလိုက်ခြင်းပင်ဖြစ်သည်။ အဲဒီလိုပေါင်းစည်းခြင်းသည် လူထုကို အခြေခံသည့် ဒီမိုကရေစီရဲ့ အနှစ်သာရအောက်မှာ ချင်းအမျိုးသားအကျိုးစီးပွားအတွက် လက်တွေ့လုပ်ဆောင်လိုစိတ်ကြောင့်ပင်ဖြစ်သည်။

–  နှစ်ပေါင်း ၂၅ ကြာ အမျိုးသားတော်လှန်ရေးတိုက်ပွဲကို ဆင်နွှဲ့လာခဲ့သည့် ချင်းအမျိုးသားတပ်ဦးတပ်မ တော်သားများ သည် လက်ရှိအစိုးရနှင့် ငြိမ်းချမ်းရေးသဘောတူညီမှု ရရှိပြီးနောက်ပိုင်း ချင်းပြည်နယ်အတွင်း ၄င်းတို့၏ ၀ိတိုရိယ ဗဟိုဌာ နချုပ်ကို ပြန်လည်တည်ဆောက်ခဲ့ကြသည်။ ၂၀၀၅ ခုနှစ်တွင် စစ်အစိုးရနှင့် အိန္ဒိယ အစိုးရတို့၏ နှစ်ဖက် ညှပ်ဖိအား ကြောင့် လက် လွှတ်လိုက်ရ သည့် ၀ိတိုရိယ ဗဟိုဌာနချုပ်ကို ယခုနှစ်အတွင်း ချင်းပြည်နယ်ထန်တ လန်မြို့နယ်တွင် လွတ်လပ်စွာ ပြန် လည် တည်ဆောက်ကြခြင်းဖြစ်သည်။ ၄င်းတို့၏ ၂၅ နှစ်ပြည့် ငွေရတု ကျောက်တိုင် ကို ယခု နှစ် မတ်လ ၂၀ ရက်တွင် စိုက်ထူခဲ့ကြသည်။ ငွေရတု ကျောက်တိုင်စိုက်ထူပွဲကို ခရစ်ယာန် ထုံးတမ်းစဉ်လာအရ သိက္ခာတော် ရဆရာတော်များမှ ဘုရားရှင်ထံ ဆက်ကပ်အပ်နှံပြီး အထွေထွေအတွင်း ရေးမှူးချုပ် ပူး ဇင်ကျုံးက အခမ်း အနားဖြင့် တရားဝင်စိုက်ထူခဲ့သည်။ အလားတူစွာ မလေးရှား နိုင်ငံအပါအ၀င် ပြည်ပနိုင်ငံ ရောက် ချင်းလူမျိုး များသည် လည်း မတ်လ ၂၀ တွင်ကျရောက်သည့် ချင်းတော်လှန်ရေးနေ့အခမ်းအနားကို ကျင်းပခဲ့ကြသည်။ ၂၀၁၃ နှစ်ဦးဟာ ချင်း လူ မျိုးများအတွက် လေးနက်သည်ဟု ဆက်လက်ဖော်ပြလိုသည်။

–  ချင်းဘာသာရေးအဖွဲ့အစည်းအတွင်း အကြီးမားဆုံးဖြစ်သည့် ယခင် Zomi Baptist Convention  အမည်နာမအား ယခုနှစ်တွင် Chin Baptist Convention ဆိုပြီး ပြောင်းလဲ သတ်မှတ်လိုက်ကြသည်။ အသင်းတော် ၂၈ ဖွဲ့မှ ကိုယ်စား လှယ် ၄၀၀ ခန့် တက်ရောက်သည့် ၄င်းတို့၏ ၂၁ ကြိမ်မြောက် ညီလာခံကြီးက ယခုကဲ့သို့ ပြောင်းလဲ လိုက်ခြင်းဖြစ် သည်။ ZBC ကို ၁၉၅၃ ခုနှစ်တွင် စတင် ဖွဲ့စည်းခဲ့ကြသည်။ အဖွဲ့အစည်းကြီးတခု၏ အမည်နာမ ပြောင်းလဲ သတ်မှတ် ရေးသည် တကယ့်လက်တွေ့မှာ မလွယ်ပါ၊ သို့သော် ၂၀၁၃ ခုနှစ် နှစ်ဦးရဲ့ ချင်းပြည်အတွင်း နိုင်ငံရေး၊ လူမှုရေး ၊ ဘာသာရေး ရေလှိုင်းသည် တမျိုးတဖုံ ပြောင်းလဲလိုက်သည်ကိုတော့ အားလုံး အတွက် သတိချပ်စရာပင်ဖြစ်သည်။

–  ၂၀၁၃ နှစ်ဦးရဲ့ ရုပ်ပုံလွှာဟာ ချင်းလူမျိုးများအတွက် ကောင်းသော ရုပ်ပုံလွှာဖြစ်ပါစေ။

Share.

About Author

Comments are closed.