၈ လေးလုံး ၂၅ နှစ်တိုင် ခဲ့ပေမဲ့ ဒီမိုကရေစီ အခွင့်အရေး မရရှိသေးဘူးလို့ CNF ပြော

0

chin_national_flag

၈ လေးလုံး ဒီမိုကရေစီအရေးလှုပ်ရှားမှုကြီးသည် ၂၅ နှစ်တိုင်ခဲ့ပြီဖြစ်သော်လည်း ယနေ့အထိ မြန်မာနိုင်ငံတွင် ပြည်သူ လူထုတရပ်လုံးမှ လိုလားတောင့်တနေသည့် ဒီမိုကရေစီအခွင့်အရေးများမရရှိသေးကြောင်း ချင်းအမျိူးသားတပ်ဦး CNF က ယနေ့ပြောဆိုလိုက်သည်။

ယနေ့သြဂုတ်လ (၈) ရက်နေ့သည် မြန်မာပြည်သူတရပ်လုံးမှ စစ်အာဏာရှင်စနစ် နှင့် တပါတီအာဏာရှင် စနစ်ကို တိုက်ဖျက်၍ ဒီမိုကရေစီစနစ်ဖြင့်ပြောင်းလဲကျင့်သုံးရန်တိုက်ပွဲဝင်လာခဲ့သည့် ၈ လေးလုံး ဒီမိုကရေ စီလှုပ်ရှားမှုကြီး ၂၅ နှစ်ပြည့်မြောက်သည့်နေ့ဖြစ်သည်။

၂၆ နှစ်တိုင်တိုင် တိုင်းပြည်ကို အုပ်ချုပ်ခဲ့သော ဦးနေ၀င်း တပါတီအာဏာရှင်စနစ်ကို ၈ လေးလုံးပြည်သူ့လှုပ်ရှားမှု ကြီးဖြင့် အဆုံးသတ်စေနိုင်သည့်အပြင် ပြည်သူလူထု၏လုပ်နိုင်စွမ်းရည်အားပြသနိုင်ခဲ့သည့် လှုပ်ရှားမှုကြီးဖြစ်သည်ဟု ယနေ့ထုတ်ပြန်သော CNF ကြေညာချက်တွင် ဖော်ပြထား သည်။

ထို့အပြင်မြန်မာနိုင်ငံအတွင်းဖိနှိပ်ချုပ်ချယ်မှုများ၊လူ့အခွင့်အရေးချိုးဖောက်မှုများ၊တိုင်းရင်းသားပြည်သူတရပ်လုံး၏ အခွင့်အရေးဆုံးရှူံးမှုများ၊ဘာသာရေးဖိနှိပ်မှုများအားကမ္ဘာ့ကုလသမ္မဂအပါအဝင်ကမ္ဘာတဝှမ်းလုံးသို့အသိပေးနိုင်ခဲ့သည့်လှုပ်ရှားမှုကြီးလည်းဖြစ်သည်ဟု ကြေညာချက်တွင် ဖော်ပြထားသည်။

သို့သော်လည်း ပြည်သူလူထုတရပ်လုံးမှ လိုလားတောင်းတနေသော ဒီမိုကရေစီအခွင့်အရေးများ ယနေ့ထိ မရရှိကြ သည့်အပြင် တိုင်းရင်းသားလူမျိုးများ၏ တန်းတူအခွင့် အရေးနှင့် ဖက်ဒရယ်ပြည်ထောင်စုတည်ဆောက်ရေးသည် လည်း  လက်တွေ့စစ်အစိုးရမှ ၎င်းတို့စိတ်ကြိုက်ရေးဆွဲပြဌါန်းထားသော ၂၀၀၈ ဖွဲ့စည်းပုံအခြေခံဥပဒေ အရ ကန့်သတ်ချုပ် ချယ်မှုများပြုလုပ်လျက်ရှိနေကြသည်ကိုတွေ့ရှိရဟု ကြေညာချက်တွင်ပါရှိသည်။

ထို့ကြောင့် တိုင်းရင်းသားပြည်သူလူထုတရပ်လုံးလိုလားတောင့်တမျှော်မှန်းခဲ့ကြသောဒီမုိုကရေစီစနစ် ကျင့်သုံးသော ဖက်ဒရယ်ပြည်ထောင်စုတည်ဆောက်နိုင်သည်အထိ တိုင်းရင်းသားလူမျိုးများ နှင့် ပြည်သူတရပ်လုံးမှ တစိုက်မတ်မတ် ဝိုင်းဝန်းလုပ်ဆောင်အကောင်အထည်ဖော်ရန်လိုအပ်ကြောင်း ချင်းအမျိူးသားတပ်ဦး ကြေညချက်တွင် တိုက်တွန်းထား သည်။

Share.

About Author

Comments are closed.