ချင်းပြည်နယ်ဝန်ကြီးချုပ်၏ ခြိမ်းခြောက်မှုနှင့် ကြက်ခြံရွာသူ၊ ရွာသားများ၏ ဘ၀ဒုက္ခ

0

LETTER TO EDITOR …

 

ချင်းပြည်နယ်တောင်ပိုင်း၊ မင်းတပ်ခရိုင်၊ ကန်ပက်လက်မြို့နယ်၊ ကြက်ခြံကျေးရွာအုပ်စု ကြက်ခြံကျေးရွာ ဟောင်းသည် မြေပြိုမှုကြောင့် မပြောင်းမဖြစ်ပြောင်းရွေ့ရန်ဖြစ်သောကြောင့် (၁၅-၁၀-၂၀၁၂) ခုနှစ်နေ့ တွင် ရွာလူထုအစည်းအဝေးကျင်းပကြကာ ရွာသစ်နေရာအား ကန်ပက်လက် မင်းတပ်ကြား ၄ မိုင်၊ ၅ ဖာလုံ နှင့် ၅ မိုင် ၅ ဖာလုံကြားပြောင်းရွေ့ရန် ရွေးချယ်ဆုံးဖြတ်ခဲ့ကြပါသည်။

 

ကျေးရွာလူထုမှ ဆွေးနွေးဆုံးဖြတ်ပြီးနောက် ချင်းပြည်နယ်သစ်တောရေးရာနျင့် သတ္တုဝန်ကြီး စည်ပင်သာ ယာရေးဝန်ကြီးနှင့်အဖွဲ့ ကြက်ခြံရွာဟောင်းသို့ (၇-၂-၂၀၁၃) နေ့ လာရောက် ကွင်းဆင်းပြီး မပြောင်းမဖြစ် ပြောင်းရွေ့ရန် လမ်း ညွန်ကြ သဖြင့် ကျေးရွာ လူထုမှ ရွေးချယ်ခဲ့သောမြေနေရာ ပြန်လည်တင်ပြကြရာ ၄င်းနေရာသည် နတ်မတောင်ဥယျာဉ်၏ အသည်းနှလုံးဖြစ်သည်ဟု ကန့်ကွက်ကြပြီး နတ်မတောင်ဥယျာဉ် ၏ အလယ်ဗဟိုမဟုတ်သောအစွန်အဖျားတွင် ရွာတည်ခွင့်ပြုမည်ဟု ကတိပေးခဲ့ကြပါသည်။ ရွာသစ်တည် မည့်နေရာအား ဌာနဆိုင်ရာများမှ ရွေးချယ်အသိအမှတ်ပြုပေးကြရန် ၀န်ကြီး ၂ ဦးမှ လမ်းညွန်ခဲ့သည့်အ တိုင်း ကန်ပက်လက်နတ်မတောင်သစ်တောအုပ်ချုပ်ရေးမှူးနှင့် အဖွဲ့(၆)ဦး ကြက်ခြံကျေးရွာအုပ်စု နယ် နိမိတ်ဖြစ်သော ယခုကြက်ခြံရွာသစ်နေရာအား ပြန်လည်အစားထိုးပေးကြသဖြင့် ချင်းပြည်နယ် သစ်တောရေးရာနှင့် သတ္တုဝန်ကြီး ချင်းပြည်နယ်စည်ပင်သာယာရေးဝန်ကြီးနှင့်အဖွဲ့ (၇-၂-၂၀၁၃) နေ့ ရွာရောက်ကွင်းဆင်းပြီး အမြန်ပြောင်းရွေ့ရန် မှာကြား သည့်အတွက် အိမ်ခြေ (၄၀) ပြောင်းရွေ့နေထိုင်ကြပြီး ဖြစ်ပါသည်။

 

ချင်းပြည်နယ်လူမှုရေးဝန်ကြီးမှလည်း ခေတ္တကန်ပက်လက်ရောက်စဉ် (၇-၄-၂၀၁၃) နေ့တွင် ပြည်ခိုင်ဖြိုးရုံး ၌လည်းကောင်း (၉-၅-၂၀၁၃) နေ့တွင် ဆောက်လုပ်ရေးရိပ်သာတွင်လည်းကောင်း (၁၀-၅-၂၀၁၃) နေ့၌ လည်း ပြည်ခိုင်ဖြိုးရုံးတွင်လည်းကောင်း ယခုနေရာတွင် ရွာပြောင်းရွေ့ဆောက်လုပ်နေထိုင်ကြရန် နှုတ်ဖြင့် လမ်းညွှန်ခဲ့ပါသည်။

 

အုပ်ချုပ်ရေးမှူး၊ နတ်မတောင်အမျိုးသားဥယျာဉ်၏ (၁၂-၆-၂၀၁၃) ပါ စာအမှတ်/နတ်မ/စမ-၁/၀၆၅/၂၀၁၃ ထောက်ခံချက်ဖြင့် ယင်းနေရာအား ကန့်ကွက်ရန်မရှိကြောင်းနှင့် ဦးစီးမှူးစည်ပင်သာယာရေးအဖွဲ့ ကန်ပက်လက်မြို့၏ (၂၄-၆-၂၀၁၃) ရက်ပါ စာအမှတ် ၂၀၃/ခ-၄/ကပလ(၀၀၁) ပါ ထောက်ခံချက်ဖြင့် ပြောင်းရွေ့ရန်နေရာသည် စည်ပင်ဧရိယာနှင့် ကင်းလွတ်ကြောင်း ထောက်ခံချက်များကိုလည်း ရရှိပြီးဖြစ်ပါ သည်။

 

ချင်းပြည်နယ်ဝန်ကြီးချုပ်ရုံးနှင့် ကြက်ခြံရွာ လူထုကိုယ်စားလှယ် (၄) ဦး တို့ ၀န်ကြီးချုပ်ရုံး ဟားခါး၌ (၁၈-၇-၂၀၁၃) နေ့တွင် တွေ့ဆုံဆွေးနွေးစဉ် ရေစမ်းဦးနှင့် ကင်းလွတ်လျှင် ရွာပြောင်းရွေ့ဆောက်လုပ်နေထိုင် ခွင့်ပြုကြောင်း လမ်းညွှန်ခဲ့ပါသည်။

 

ဦးကီးထန်း ပြည်နယ်လွှတ်တော်ကိုယ်စားလှယ်နှင့် ကန်ပက်လက်မြို့နှင့်အထောက်အကူပြု ကော်မတီအဖွဲ့ မြို့နယ်စည်ပင်သာယာရေးအဖွဲ့ကော်မတီတို့မှ (၂၂-၇-၂၀၁၃) နေ့ ကွင်းဆင်းစစ်ဆေးမှုတွင် ယခုကြည်ခြံ ကျေးရွာပြောင်းရွေ့ရန် တင်ပြလျှောက် ထားသောနေရာ သည် ကြည်ခြံအုပ်စုနယ်နိမိတ်အတွင်း ကျရောက် ပြီး မည်သည့်ရေစမ်းဦးနှင့်မျှ နီးစပ်ခြင်းမရှိကြောင်း ၀န်ကြီးချုပ်၊ ပြန်နယ်အစိုးရအဖွဲ့၊ ချင်းပြည်နယ်၊ ဟားခါးမြို့သို့ လိပ်မှုလျက် (၂၃-၇-၂၀၁၃) အစီရင်ခံသည့် မတ္တူစာကို လည်း လက်ခံရရှိကြပါသည်။

 

ပြည်သူ့လွှတ်တော်တရားစီရင်ရေးနှင့် ဥပဒေရေးဆိုင်ရာကော်မတီ သူရဦးအောင်ကို ချင်းပြည်နယ်လူမှုရေး ၀န်ကြီးနှင့်အဖွဲ့ (၅-၁-၂၀၁၄) နေ့တွင် ကြည်ခြံရွာသစ်သို့ရောက်ရှိလာစဉ် စံပြရေးရွာအဖြစ် ဆက်လက် တည်ဆောက်နေ ထိုင်ရန် နှုတ်ဖြင့် လမ်းညွှန်ခဲ့ပါသည်။

 

ကြက်ခြံရွာသစ်အား အထက်ဖော်ပြပါအကြိမ်ကြိမ်နှုတ်မိန့်၊ ထောက်ခံချက် အထောက်အထားအရ ပြောင်းရွေ့ခွင့်ပြုမိန့်များရရှိပြီးဖြစ်၍ အိမ်ခြေ(၄၀)တည်ဆောက်နေထိုင်ကြပြီး နောက်ကြက်ခြံရွာ တိုးတက် ကြောင်းကို မနာလိုသူ၊ ၀န်ကြီးချုပ်နှင့်ရင်းနှီး သူတဦးမှ ၀န်ကြီးချုပ်ထံသို့ ဖုန်းဆက်သွေးထိုးမှုကြောင့် ၀န်ကြီးချုပ်မှ ကျွန်တော်တို့ဒုက္ခသည်ပြည်သူအများ၏ အသက်အိုးအိမ်ကို လစ်လျူကာ ရင်းနှီးသူတစ်ဦး၏ လိမ်ညာစကားယုံမှာပြီး၊ လက်နက်များဖြင့် ခြိမ်းခြောက်စေကာ စည်ပင်ဧရိယာ ဟူ၍ လည်းကောင်း၊ နတ်မတောင်ဥယျဉ်သစ်တောဧရိယာဟူ၍လည်းကောင်း မတရားစွပ်စွဲပြီး အသနားခံကြသောဒုက္ခသည် (၂၀၀) ကျော် လူဦးရေအားထောင်ထဲထည့်လိုခြင်း၊ သဘာဝဘေးကြောင့် ဆင်းရဲငတ်မွတ်စွာဆောက်လုပ် ထားသော အိမ်များအား(၁) ပတ်အတွင်း ဖျက်သိမ်းရန်ပြောဆိုခြိမ်းခြောက်ခြင်း၊ မဖျက်သိမ်းပါက ပြည်သူတို့ ၏အသက်အိုးအိမ်ကို မီးရှို့ရန်ပြောဆိုခြင်း အမိန့်မနာခံပါက ကျေးရွာအုပ်ချုပ်ရေးမှူးနှင့် အုပ်စုစာရေးအား အလုပ်မှဖြုတ်ပစ်မည်ဟု ခြိမ်းခြောက်ပြော ဆိုခဲ့ပါ သည်။ ပြည်သူများ ၏ အသက်အိုးအိမ်အတွက် လူထုဆန္ဒ အတိုင်းအုပ်ချုပ်ကာ တာဝန်ထမ်းဆောင်ကြသော အုပ်ချုပ်ရေးမှူးနှင့် စာရေးကိုဖြုတ်ပစ်မှု ကြက်ခြံရွာသစ် တည်ဆောက်မှုပျက်ပြားမည်ဟူသော အကြံဖြင့် စာရေးဦးတမ်လိန်းအား ကန်ပက်လက်မှ ချင်းပြည် နယ် မြောက် ပိုင်း၊ ဖလမ်းမြို့သို့ မ တရားပြောင်း ပစ်ခြင်းခံရပါသည်။

 

ကြက်ခြံကျေးရွာအုပ်စု၊ ကြက်ခြံရွာကို မည်သည့်အခွင်းအရေးမျှ မပေးတော့ဘူးဟု ၀န်ကြီးချုပ်မှပြောသည့် အတိုင်း အုပ်စုစာရေး ဦးတမ်လိန်းပြောင်းပြီးသည့်နောက် ကြက်ခြံကျေးရွာအုပ်စုတွင် အုပ်စုစာရေးပြန်လည် ချထားပေးခြင်းမရှိသဖြင့် သန်းခေါင် စာရင်းကောက် ခံချိန်၌လည်း ကျေးရွာအုပ်ချုပ်ရေးမှူးနှင့် ကျောင်းဆရာ မတို့မှာ အလွန်အခက်ခဲတွေ့ကြုံရပါသည်။

 

ဤအရာများသည် ချင်းပြည်နယ်ဝန်ကြီးချုပ်၏ အာဏာအလွှဲသုံးစားမှုများပင်ဖြစ်ပါသည်။ အုပ်စု (၁) စု အနေနှင့် သူတပါးလိုအခွင့်အရေးတန်းတူမခံစားစေခြင်း၊ ဖိနှိပ်ခြိမ်းခြောက်မှုကြောင့် တုန်လှုပ်ကြောက်လန့် ပြီး ရွာသား (၄) ဦးမှာ နိုင်ငံခြားသို့ ထွက်ပြေးပုန်းရှောင်ခြင်း၊ ကျန်ခဲ့သူများကိုလည်း ထပ်မံ (၂၃-၂-၂၀၁၄) နေ့ ကြက်ခြံရွာသစ်သို့ လက်နက်ကိုင်ပြည်သူရဲများခေါ်ဆောင်လာကာ လက်နက်များဖြင့် ခြိမ်းခြောက်စေ ပြီး အိမ်များပြန်ဖျက်သိမ်းရန်ပြောကာ ကျွန်တော်ပိုင် တဲ့နယ်ကို နိုင်ငံတော် သမ္မတကြီးမင်းတို့ကိုပေးရင် တောင် ငါကခွင့်မပြုဘူး၊ သမ္မတကြီးမကလို့ သိကြားမင်းကြီးပေးရင်တောင် ငါချင်းပြည်နယ်ဝန်ကြီးချုပ်က ခွင့်မပြုဘူး။ မင်းတို့မကျေနပ်ပါက မြန်မာနိုင်ငံသမ္မတမကလို့ ကမ္ဘာ့ကုလသမဂ္ဂအထိတိုင်ကြ ငါမပြုတ်ဘူး ဟု ပြော ဆိုကြုံးဝါးကာ (၃၁-၃-၂၀၁၄) နေ့ သန်းခေါင်စာရင်းအချိန်မှာ ကျွန်တော်တို့ သန်းခေါင်စာရင်း ဖျက်လိုသည့် အကြံဖြင့် ၀န်ကြိးချုပ်လမ်းညွှန်ချက်အရ ဌာနဆိုင်ရာများမှ ဆောက်လုပ်ပြီးသော ကျောင်အိမ် နှင့် ဆရာ နေအိမ်ကို ဖျက်သိမ်းရန်၊ မဖျက်သိမ်း ပါက ကျောင်းဆရာတစ်ဦး၊ ကျေးရွာအုပ်ချုပ်ရေးမှူး အပါအ၀င် ရွာလူထု(၈၀)ဦးတို့အား (၂၆-ခ၊ဂ) တို့အရ အမှုဖွင့်လှစ်ကာ ထောင်ထဲထည့်ရန် မတရားနှိပ် စက်ရန် ပြောဆိုခြိမ်းခြောက်ခဲ့ပါသည်။ ထိုသို့ခြိမ်းခြောက်ပြီး ဆရာနေအိမ်တစ်လုံးကို (၁၁-၄-၂၀၁၄) နေ့ ဖျာက် သိမ်းခြင်း ခံ ရပါသည်။

 

သို့ဖြစ်ပါ၍ နိုင်ငံတော်သမ္မတကြီး ဦးသိန်းစိန်မှ ပြည်သူများကို အမိအဖခေါ်ဆိုချိန်တွင် ချင်းပြည်နယ်ဝန်ကြီး ချုပ်က မိမိပြည်နယ်အတွင်းရှိ ပြည်သူများကို ခြိမ်းခြောက်မှုသည် ဒီမိုကရေစီလမ်းစဉ်နှင့် ဆန့်ကျင်သော အပြုအမှုဆက်ဆံမှုများသာဖြစ်ပါသဖြင့် သက်ဆိုင်သူများမှ ရွာသူရွာသားများကို စာနာပေးပါရန် တင်ပြလိုပါ သည်။

 

 ကြက်ခြံရွာသူရွာသားများ

 ကန်ပက်လက်မြို့နယ်

ချင်းပြည်နယ်

Share.

About Author

Leave A Reply

*

code