ကလေးမြို့ မှ ပေးစာ

0

လေးစားအပ်သောလူကြီးမင်းတို့ခင်ဗျား

ကျွန်တော်တို့ကြုံတွေ့နေရသော  အခက်အခဲကို media မှတဆင့် ထုတ်လွှင့်ပေးနိုင်ပါရန် အသနား ခံ ရင်ဖွင့် လိုက်ပါသည်။

ဆလိုင်း ဗျက်ကျဲအို၊ ကလေးမြို့

၁။  စစ်ကိုင်းတိုင်းဒေသကြီး၊ ကလေးမြို့နယ်၊ ကံကြီးကျေးရွာအုပ်စု၊ ပျဉ်းတောဦးကျေးရွာနေ ဦးတီာလ်ကပ်ကျုံး ၄/ဖလန(နိုင်) ဝ၂၃၉၈၆ ၏ လယ်ယာမြေ (၃၂.၂၂)ဧက၊ အောင်ရွာကျေးရွာ၊ ဦးဗန်လျန်ဘွေ (၄/ဖလန(နိုင်)ဝ၁၃၄၆၄) နှင့် ဦးထီးရံကျဲအို (၅/ကလထ (နိုင်)ဝ၇၉ဝ၃၄) တို့၏ လယ်ယာမြေ (၂၅)ဧက စုစုပေါင်း (၅၇)ဧကသည် အစဉ်အ ဆက်လုပ်ကိုင်နေသော ဦးပိုင်ပေါက် မိုးကောင်းလယ်မြေများဖြစ်သည်။ ၄င်းသည် ကံကြီးကျေးရွာအုပ်စုအတွင်း ကွင်းအ မှတ်(၈၃၇/၅) လမိုင်း ကွင်း၌ တည်ရှိပြီး တပ်မြေနှင့် တစ်ဆက်တည်းရှိသည်။ ၄င်းတောင် သူများသည် မြန်မာ တိုင်းရင်းသား၊ ချင်းလူမျိုးများဖြစ်ကြပြီး အဆိုပါ မိရိုးဖလာပိုင် လယ်ယာလုပ်ငန်းဖြင့် အသက်မွေး ဝမ်းကျောင်းပြုကြပါသည်။

၂။ ၄င်းတို့ပိုင်လယ်ယာမြေသည် ကံကြီးကျေးရွာနေ ဦးအောင်နီနှင့်အဖွဲ့မှ တပ်စွန့်မြေ ဖြစ်ပြီး ပိုင်ဆိုင် ခွင့်လျှောက်ထား တင်ပြခဲ့သည်ကို မြို့နယ် လယ်/စီကော်မတီက ကွင်းဆင်းစစ်ဆေးမှုပြု  လုပ်ခဲ့ရာ ၄င်းတို့လေ့ လာတွေ့ရှိချက်အရ ခရိုင်အုပ်ချုပ်ရေးမှူး က ဦးတီာလ်ကပ်ကျုံး၊ ဦးဗန်လျန်ဘွေ နှင့် ဦးထီးရံကျဲအိုတို့အား လယ်ယာ မြေလုပ် ပိုင်ခွင့် ပေးအပ်ခဲ့ပါသည်။

၃။ သို့သော် ဦးအောင်နီ အပါအဝင်(၇)ဦးတို့မှ ချင်းတွင်း လူငယ်ကွန်ရက်နှင့်ပူးပေါင်းပြီး  လယ်ယာမြေ မပေးပါက ဆန္ဒပြမည်ဖြစ်ကြောင်း ခရိုင်အုပ်ချုပ်ရေးမှူး ဦးအောင်ထူးထံ ခြိမ်းခြောက် တင်ပြခဲ့ရာ ကံကြီးအုပ်စု အုပ်ချုပ်ရေးမှူးအား ဌာနဆိုင်ရာ လူကြီးများ ရှေ့မှောက်တွင် အတင်း အဓမ္မ လက်မှတ်ရေးထိုးခိုင်းပြီး ခရိုင် ခန်းမတွင် ခရိုင်အုပ်ချုပ်ရေးမှူး ကိုယ်တိုင်က ပုံစံ(၇)၊ ပုံစံ(၁ဝ၅)တွေ နားမလည်ဘူး ဒီနေ့အပြတ်ရှင်းမည် ဟုဆိုကာ ၁၉၊ ၅၊ ၂ဝ၁၄ ရက်နေ့တွင် ဦးအောင်နီ နှင့် (၇)ဦး အား လယ်ယာမြေပုံစံ(၃) ကို ထပ်မံထုတ်ပေး ခဲ့ပါ သည်။

၎။ ဦးအောင်နီတို့သည် ဦးတီာလ်ကပ်ကျုံး ပိုင်လယ်ယာမြေပေါ်တွင် လယ်တဲများ ဆောက်လုပ်သည် ကို ဦးတီာလ် ကပ်ကျုံးမှ မြို့နယ်လယ်/စီဥက္ကဌ ဦးအေးနိုင် ထံတင်ပြခဲ့သော်လည်း အရေးမရောက် ခဲ့ပါ၊  ၃၁၊ ၅၊ ၂ဝ၁၄ ရက်နေ့တွင် ဦးအောင်နီအဖွဲ့မှ ၄င်းတို့လယ်တဲများကို ကိုယ်တိုင် ဖြိုဖျက် မီးရှို့ပြီး ဦးတီာလ်ကပ်ကျုံး တို့အား မဟုတ်မမှန် စွပ်စွဲ တိုင်းကြားသည့်အပြင် လေးကွဖြင့် ဦးတီာလ်ကပ်ကျုံး၏ ပါးကို ပစ်ခဲ့ပါသည်။

၅။ အခင်းဖြစ်ပွားသည့် နေ့တွင် ဦးအောင်နီ နှင့်  ချင်းတွင်းလူငယ်ကွန်ရက်သည် အုတ်အော်သောင်း နင်း ဖြစ်အောင် သတင်းများဖြန့် ချီသောကြောင့် သက်ဆိုင်ရာ ဌာနဆိုင်ရာ လူကြီးများ၊ ရဲတပ်ဖွဲ့ တပ်စိပ် တစ်စိတ်နှင့်၊ ရဲကားများ၊ ဆိုင်ကယ်များဖြင့် ရောက်ရှိလာပြီး လယ်ပိုင်ရှင်ဦး တီာလ်ကပ်ကျုံး နှင့် (၅)ဦးတို့အား စစ်ဆေးမေး မြန်းခြင်းမရှိဘဲ ဖမ်းဆီးကာ ပုဒ်မ ၃၃၆၊ ၄၂၆၊ ၄၃၆ တို့ဖြင့် အမှုဖွင့်ပြီး လယ်မလုပ်နိုင်အောင် အချုပ်ထဲ၌ ယနေ့ အထိမတရား ချုပ် နှောင်ထား ပါသည်။ မတရားသဖြင့် ကျူးကျော်ဝင်ရောက် နှောင့်ယှက်သူ ဦးအောင်နီတို့ အဖွဲ့မှာမှု အာမခံဖြင့် လွှတ် ပေးထားပါသည်။

၆။ အမှန်တရားသည် ဖုံးကွယ်၍မရသဖြင့် အဆိုပါအမှုကို သက်ဆိုင်ရာလယ်ယာမြေကော်မတီ အဆင့်ဆင့်မှ ပြန်လည် စီစစ်ရာတွင် စစ်ကိုင်းတိုင်းဒေသကြီး စိုက်ပျိုးရေးဝန်ကြီး ဦးစောမြင့်မှ အမှန်တကယ် လယ် ပိုင်ရှင်များဖြစ်သည့် ဦးတီာလ်ကပ်ကျုံး တို့အား ၂၆၊ ၆၊ ၂ဝ၁၄ ရက်နေ့တွင် လုပ်ပိုင်ခွင့် ပြန်လည်ပြုခဲ့ပါသည်။ သို့သော်လည်း ကျုးကျော် သူကို အရေးယူခြင်းမရှိဘဲ လယ်ပိုင် ရှင်တို့ကို တဲမီးရှို့သည်ဟု စွပ်စွဲပြီး အမှုကြန့် ကြာအောင် ချုပ်နှောင် ထားပါသည်။

၇။ ဤအမှုကိစ္စတွင် ၂၅၊ ၉၊ ၂ဝ၁၄ ရက်အထိ တရားရုံးမှ တရားလိုပြန်ခေါ်သက်သေ (၄)ကြိမ် တိုင်တိုင် ပျက်ကွက် ခဲ့သော်လည်း အရေးယူခြင်းမရှိဘဲ မျက်နှာသာပေးခဲ့ပါသည်။

၈။ ချုပ်နှောင်ခံတောင်သူ(၅)ဦး၏ မိသားစုစားဝတ်နေရေး၊ ပညာရေး၊ ကျန်းမာရေးများ လွန်စွာထိ ခိုက်နစ်နာ လျက်ရှိပါသည်။ စစ်မှန်သော ဒီမိုကရေစီလမ်းကြောင်းပေါ်လျှောက်လှမ်းနေချိန်တွင် တရားဥပဒေစိုးမိုးရေး၊ တိုင်းရင်းသား စည်းလုံးညီညွှတ်မှုမပြိုကွဲရေး၊ ဟူသော ဒို့တာဝန်အရေး သုံးပါး၊ အလေးထားနေချိန်တွင် ကျွန်ုပ်တို့ ကလေး ခရိုင်သည် တရားဥပဒေစိုးမိုးမှု မရှိသည့်အပြင် တိုင်းရင်းသား စည်းလုံးညီညွှတ်မှု ပျက်ပြားအောင် သွေးခွဲဆောင် ရွက်နေ ပါသည်။ ထို့ကြောင့် ကလေးမြို့၌ ဆူကြုံ နိမ့်မြင့်မရှိ ဥပဒေအရ တရားစီရင် ဆုံး ဖြတ်ကြပါရန် နိုင်ငံတော် သမ္မတကြီး၊ လွှတ်တော်ဥက္ကဌ ၊ တရားသူကြီးချုပ်နှင့် သက်ဆိုင်သူတာဝန်ရှိအားလုံး သိရှိရန် လေးစားစွာဖြင့် ရင်ဖွင့် တင်ပြလိုက်ပါ သည်။ အသေးစိတ်သိလိုပါကဦးတီာလ်ကပ်ကျုံး၏ ညီအကိုများ ထံသို့ စုံစမ်းမေးမြန်းနိုင်ပါသည်။

၁။ ဦးဗန်ကျဲအိုလျန် ၄/ဖလန(နိုင်)ဝ၂၃၉၈၇ ၊ ဖုန်း ဝ၉-၃၃၅၆၆၈၄၆၊ ဝ၉-၄၇ဝ၇၃၂၇၃ လက်ပန်ချောင်းကျေးရွာ၊ ကလေးမြို့နယ်။

၂။ ဦးကျုံးဘွဲအုပ်၊ ဖုန်း ဝ၉-၂၅၆ဝ၈ဝဝ၄၈၊ဝ၉-၂၅၄၅၅၅၉၈၄ ပျဉ်းတောဦးကျေးရွာ၊ ကလေးမြို့နယ်။

 

Share.

About Author

Leave A Reply