သမိုင်းဝင် ချင်း-လူရှိုင်း ညီလာခံ (၁၂၃ ) နှစ်မြောက် အခမ်းအနား မဏိပူရ်တွင် ကျင်းပမည်

0

ZoRo

ဇို(ချင်း)မျိူးနွယ်စုများအတွက် အရေးကြီးသော သမိုင်းမှတ်တိုင်တခုဖြစ်သည့် (၁၈၉၂) ချင်း-လူရှိုင်းညီလာခံ ၁၂၃ နှစ်မြောက် အောက်မေ့ဘွယ်အခမ်းအနားကို အိန္ဒိယနိုင်ငံအရှေ့မြောက်ဘက်ဒေသ မဏိပူရ်ပြည်နယ် ချာရီကျန်ပူမြို့၌ စည်ကား သိုက်မြိုက်စွာ ကျင်းပကြမည်ဟုသိရသည်။

ယင်းသမိုင်းဝင် အောက်မေ့ဘွယ်အခမ်းအနားကို ဇို(ချင်း) မျိူးနွယ်စုများ ပြန်လည်သွေးစည်းညီညွတ်ရေးအတွက် အစဉ် တစိုက် ကြိုးပမ်းလာခဲ့သော မီဇိုရမ်ပြည်အခြေစိုက် Zo Reunification Organisation (ZoRO) အဖွဲ့မှ ဦးဆောင် စီစဉ်ထားခြင်းဖြစ်ပြီး ဇန်န၀ါရီလ ၂၉ နှင့် ၃၀ ရက်နေ့တွင် ချာရီကျန်ပူမြို့ Kholmun အားကစားကွင်း၌ ကျင်းပကြမည် ဖြစ်သည်။

ချင်း-လူရှိုင်းညီလာခံ အောက်မေ့ဘွယ်အခမ်းအနား၏ ဆောင်ပုဒ်မှာ “Ethnic Zo People’s Solidarity” (ဇို-ချင်းမျိူး နွယ်များ စည်းလုံးညီညွတ်ခြင်း) ဟု သိရသည်။

အဆိုပါ အခမ်းအနားတွင် အိန္ဒိယ-ဘင်္ဂလားဒေရှ့်-မြန်မာနိုင်ငံတွင် နေထိုင်ကြသော ဇို(ချင်း)မျိူးနွယ်စုများမှ ကိုယ်စား လှယ်များ အသီးသီးစေလွှတ်ကြမည်ဖြစ်ပြီး ရိုးရာယဉ်ကျေးမှုဖလှယ်ခြင်း၊ ဇို(ချင်း)မျိူးနွယ်စုများ အုပ်ချူပ်မှုတစ်ခုအောက် တွင် အတူတကွနေထိုင်နိုင်ရေး နှင့် သမိုင်းဆိုင်ရာအချက်အလက်များ အပြန်အလှန်ပြောဆိုဆွေးနွေးကြမည်ဟုသိရသည်။

ဇို(ချင်း)မျိူးနွယ်စုများသည် ရှေးယခင်နှစ်ပေါင်းများစွာကတည်းက အတူတကွယှဉ်တွဲနေထိုင်လာခဲ့ကြသော်လည်း အိန္ဒိယ နှင့် မြန်မာနိုင်ငံတို့ ဗြိတိသျှအင်ပါယာလက်အောက်ကျရောက်ပြီးသည့်နောက်ပိုင်းတွင် ချင်းတောင်တန်း၊ လူရှိုင်းတောင် တန်းဒေသများကိုလည်း ၁၈၉၀ ခုနှစ်တွင် စတင်သိမ်းပိုက်ခဲ့သည်။

ဗြိတိသျှအင်ပါယာလက်အောက်သို့ ကျရောက်သွားသည့်နောက်ပိုင်း ၁၈၉၂ ခုနှစ် ဇန်န၀ါရီ ၂၉ ရက်နေ့မှာ အိန္ဒိယနိုင်ငံ Calcutta မြို့ Fort William တွင် Chin – Lushai Conference ကို ကျင်းပခဲ့ကြပြီး ဗြိတိသျှအင်ပါယာသည် ၎င်းတို့သိမ်း ပိုက်ခဲ့ပြီးနောက် တကွဲတပြားစီနေထိုင်ခဲ့ကြရသည့် ဇို(ချင်း)မျိူးနွယ်စုများအား ရှေးယခင်ကအတိုင်း အုပ်ချူပ်မှုတစ်ခု အောက်တွင် ပြန်လည်ထားရှိရန်ဆုံးဖြတ်ခဲ့ကြသည်။

သို့သော်လည်း ယင်း Chin – Lushai Conference တွင် ဆုံးဖြတ်ခဲ့ကြသကဲ့သို့ ယနေ့ချိန်ထိ ဖြစ်မလာဘဲ ဇို(ချင်း) မျိူးနွယ်စုများသည် အိန္ဒိယ-မြန်မာ-ဘင်္ဂလားဒေရှ့်သုံးနိုင်ငံတွင် တကွဲတပြားစီ သီးခြားအုပ်ချူပ်မှုအောက်တွင် နေထိုင် လျက်ရှိကြသည်။

Share.

About Author

Leave A Reply

*

code