CNF ဥက္ကဌ သစ် Pu Thang Nang Lian Thang ၏ ကြိုဆိုနှုတ်ခွန်း ဆက်စကား

0

လေးစားရပါသော
ချင်းအမျိူးသားတပ်ဦး နှင့် တပ်မတော်အဖွဲ့ဝင်များ

ဗဟိုကော်မတီဝင်များ၊ ဗဟိုကော်မတီအစည်းအဝေးတွင် တက်ရောက်နေကြသော ပုဂ္ဂိုလ်များ အားလုံး ခင်ဗျား-

ကျွန်တော် ထန်နန်လျန်းထန်မှ စကားပြောခွင့်ရသောကြောင့် ဂုဏ်ယူကျေးဇူး တင်စွာဖြင့် နှုတ်ခွန်းဆက်သ လိုက်ပါသည်။

ကျနော်တို့အားလုံး၏ ရည်မှန်းချက်ဖြစ်သော ချင်းအမျိူးသားကိုယ်ပိုင်ပြဌာန်းခွင့်ပြန်လည် ရရှိရေး၊ စစ်မှန်သော ဖက်ဒရယ် ပြည်ထောင်စုတည်ဆောက်ရေး နှင့် ဒီမိုကရေစီ ထွန်းကားရေးအတွက် ကျနော်တို့ အတူလက်တွဲပြီး ချင်းအမျိူး သားနိုင်ငံ ရေးမှာ ပါဝင်လှုပ်ရှားနေကြခြင်းဖြစ်ပါသည်။

ချင်းအမျိူးသားတပ်ဦး၏ အရေးပေါ်ပါတီညီလာခံကို ၂၀၁၁ ခုနှစ် ဒီဇင်ဘာလ ၁၂ ရက်နေ့မှ ၁၆ ရက်နေ့အထိ ကျင်းပခဲ့ ကြပြီး၊ ရွေးချယ်တာဝန်ပေးအပ်ခံရသည့်အချိန်မှစ၍ အတူလက်တွဲပါဝင်လာခဲ့သည်မှာ ယနေ့ ၂၀၁၅ ခုနှစ် ဇန်န၀ါရီလ ပါတီဗဟိုကော်မတီအစည်းအဝေးကြီးအထိဖြစ်ပါသည်။ ကျနော်တို့အားလုံး စည်းလုံး ညီညွတ်စွာ နှင့် ချင်းအမျိူးသားရေးမှာ ပါဝင်ကြပါသည်။ တစ်ဦးနှင့်တစ်ဦး ပိုမိုယုံကြည်စိတ်ချမှု၊ အပြန်အလှန် ပိုမိုနားလည်မှုရှိခြင်းကြောင့်၊ ယနေ့အထိ လက်တွဲ အောင်မြင်လာခြင်းပင်ဖြစ် ပါသည်။
maxresdefault

ဤအစည်းအဝေးကြီးမှလည်း ကျွန်တော့ကို အလှည့်ကျ ဥက္ကဌတာဝန် ရွေးချယ်ပေးအပ်လာသည့်အတွက် ကျေးဇူးတင် ဂုဏ်ယူမိပါသည်။ ကျွန်တော်တို့၏ ချင်းအမျိူး သားတော်လှန်ရေးသည် ခေါင်းဆောင် တစ်ဦး တစ်ယောက်တည်း၏ ဦးဆောင် မှုနှင့် လုပ်ဆောင်သည်မဟုတ်ပါ။ ကျနော်တို့အားလုံး စည်းလုံးမှု၊ စုပေါင်း ဦးဆောင်မှု၊ စုပေါင်း တာဝန်ယူမှု၊ တာဝန်ခံမှု၊ ကျရာနေရာမှာ တာဝန်ကျေမှုများကြောင့် ဒီနေ့အထိ အောင်မြင်မှု များနှင့် ရပ်တည်နိုင်ခြင်းဖြစ်ပါသည်။ ၂၀၁၅ ခုနှစ်အတွင်း မှာလည်း အားလုံး စည်းစည်းလုံးလုံးနှင့် ပူးပေါင်း တာဝန်ယူလုပ်ဆောင်ကြပါရန် မေတ္တာရပ်ခံတိုက်တွန်းအပ်ပါသည်။

ယနေ့ ကျနော်တို့ ပြည်ထောင်စုမြန်မာနိုင်ငံတော်နှင့် ချင်းပြည်နယ်(ချင်းလဲန်း)၏ နိုင်ငံရေးအခြေအနေများသည် အလွန်အ ရေးကြီးသော အခြေအနေတွင် ရောက်နေပါ သည်။ ပြည်ထောင်စုကြီး ငြိမ်းချမ်းစွာတည်တံ့ရန်၊ စစ်မှန်သော ဖက်ဒရယ်ပြည် ထောင်စုကြီး တည်ထောင်နိုင်ရန် အာမခံချက်ရှိသော ဖွဲ့စည်းပုံအခြေခံဥပဒေ အထူး လိုအပ်နေ ပါသည်။ တိုင်းရင်းသား များ၏ တန်းတူရေး နှင့် ကိုယ်ပိုင်ဖန်တီးခွင့်များသည် ယနေ့နိုင်ငံရေး တွင် ပါဝင်နေကြသော ကျွန်တော်တို့အားလုံးအပေါ် တွင် မူတည်နေပါသည်။

စစ်မှန်သော ပြည်တွင်းငြိမ်းချမ်းရေးရရှိရန်အတွက် အာမခံချက်ရှိသော ငြိမ်းချမ်းရေးလုပ်ငန်းစဉ် များကိုလည်း ဆက်လက်လုပ်ဆောင် ကြရန်လိုအပ်သည်။

ကျွန်တော်တို့ ချင်းအမျိူးသားများအချင်းချင်းအကြားတွင် ချစ်ကြည်မှု၊ စည်းလုံးမှုရှိမှသာလျှင် ကျွန်တော်တို့ အားလုံး၏ ရည် မှန်းချက်များကို အကောင်အထည်ဖော်နိုင် မည်ဖြစ်ပါသည်။ တော်လှန်ရေးဖြစ်စဉ်တစ်ခုတွင် အားနည်းမှု၊ ချို့ယွင်းမှုများရှိပါ ကလည်း အချင်းချင်းပြုပြင်ပြီး ရေရှည်အတွက် စဉ်းစားကား သည်းခံမှု၊ ခွင့်လွှတ်မှု၊ ပြုပြင်မှု များအလွန်လိုအပ်ပါသည်။ အနာဂတ်လုပ်ငန်းစဉ်များကို မျှော်မြင်တတ်ပြီး၊ လတ်တလောဖြေရှင်း မရနိုင်သေးသောကိစ္စများရှိပါက၊ အဓိကလုပ်ငန်း၊ သာမန်ကိစ္စ၊ မဟာဗျူဟာ နည်းဗျူဟာ အပိုင်းများကို ချိန်ဆနိုင်ကြရန်လိုအပ်ပါသည်။

ယနေ့ နိုင်ငံရေးလှုပ်ရှားမှုအခြေအနေသည် ကျွန်တော်တို့မြို့နယ်၊ ဒေသ တစ်ခုတည်းကို ကွက်ကြည့်ပြီး လုပ်၍ မရတော့ပါ။ တစ်ပြည်လုံးအတိုင်း အတာ၊ နိုင်ငံ တကာ နှင့် ဒေသဆိုင်ရာ ပထ၀ီနိုင်ငံရေးအခြေအနေများကို အသေးစိတ်သုံးသပ်လေ့လာ ကြပြီး၊ ကျွန်တော်တို့၏ အမျိူးသားရပ်တည်မှု တည်တံ့ခိုင်မြဲရေး၊ ကျွန်တော်တို့ ချင်းပြည်(ချင်းလဲန်း)ဒေသ နှင့် ချင်းပြည်သူ လူထုများ တိုးတက်သာယာဝပြောရေးအတွက် တိကျမြင်သာသော လုပ်ငန်းစဉ်များကို အားလုံးလုပ်ဆောင်ကြရန်လိုအပ်ပါ သည်။
ကျွန်တော်တို့၏ ချင်းအမျိူးသားနိုင်ငံရေးတွင် ပါဝင်ကြသည့် မြန်မာပြည်တွင်း နှင့် နိုင်ငံတကာမှ ချင်းအဖွဲ့ အစည်းများ၏ လုပ်ဆောင်မှုများသည် အရေးပါလှပါ သည်။ ကျေးဇူး လည်းတင်ပါသည်။

ထို့အပြင် ကျွန်တော်တို့ ချင်းအမျိူးသားတပ်ဦး၊ တပ်မတော်ရပ်တည်နိုင်ရေးအတွက် အဖက်ဖက်မှ စွန့်လွှတ် အနစ်နာခံကြ ပြီး၊ ပေးဆပ်တာဝန်ထမ်းဆောင်နေကြသော ရဲဘော်၊ ရဲမေများကိုလည်း မှတ်တမ်းတင်ချီးကျူး လိုပါသည်။ ခေတ်လူငယ် များအနေဖြင့် နိုင်ငံတကာသို့ အခြေချနေထိုင်သွားလာနိုင်သောလည်း အမျိူးသားရေး အတွက် ဘ၀ကို ပေး ဆပ်ထားသော နယ်စပ်ဒေသ အခြေခံရပ်တည်လှုပ်ရှားနေကြသော တပ်မတော်သား အားလုံး လေးစားဂုဏ်ပြုအပ်ပါသည်။

လေးစားအပ်ပါသော ခေါင်းဆောင်ကြီးများ၊ လုပ်ဖော်ကိုင်ဖက် တော်လှန်ရေး ရဲဘော်ရဲမေများ၊ ဗဟိုကော်မတီ အစည်း အဝေးတက်ရောက်နေကြသော လူကြီးမင်းများအားလုံး ခင်ဗျား-

ကျွန်တော့ကို ပေးအပ်လာသော တာဝန်များကို ကျေပြွန်စွာထမ်းဆောင်ပြီး အားလုံးအတူ စည်းလုံးညီညွတ်စွာ လက်တွဲကြပါစို့ဟု ကတိပြုပြောကြားရင်း နိဂုံးချူပ်အပ်ပါသည်။

တော်လှန်ရေးသစ္စာဖြင့်
ထန်နန်လျန်းထန်

(အိန္ဒိယ-မြန်မာနယ်စပ်တစ်နေရာ တွင် ဇန်န၀ါရီ ၂၂ ရက်နေ့မှ ၂၉ ရက်နေ့အထိ ကျင်းပပြုလုပ်သော CNF ၏ ပဉ္စမအကြိမ် ညီလာခံသက်တမ်း၊ စတုတ္ထ အကြိမ် ဗဟိုကော်မတီ အစည်းအဝေးတွင် ၂၀၁၅ ခုနှစ်အတွက် CNF ဥက္ကဌ တာဝန်ယူမည့် ပူး ထန်နန်လျန်းထန်၏ အဖွင့်နှုတ်ခွန်းဆက်စကားဖြစ်သည်။)

Share.

About Author

Leave A Reply

*

code