ချင်းပြည်နယ်၏ တက္ကသိုလ်ဝင်ခွင့် စာမေးပွဲအောင်ချက် ယမန်နှစ်ထက် တစ်ဆကျော်မြင့်တက်လာ

0

hakha school

 

၂၀၁၄ – ၁၅ ပညာသင်နှစ် တက္ကသိုလ်ဝင် တန်းစာမေးပွဲအောင်စာ ရင်းများကို တစ်နိုင်ငံလုံးရှိ ပြည်နယ် တိုင်းဒေသကြီးများ စာစစ်ဌာနများ တွင်ဇွန်လ(၆)ရက်နံနက်အချိန်တွင် ထုတ်ပြန်ကြေငြာ လိုက်ရာ ချင်းပြည်နယ် ၏အောင်ချက်မှာ ၁၇.၈၄ ရာခိုင်နှုန်းရှိသည်။ ချင်းပြည်နယ်၏ ယင်းအောင် ချက် ပမာဏသည် ယခင် ၂၀၁၃-၁၄ ပညာသင်နှစ်က တက္ကသိုလ်ဝင်ခွင့် စာမေးပွဲအောင် ချက်ရာခိုင်နှုန်း ထက် တစ်ဆကျော်မြင့် တက်လာခဲ့သည်။ ယခင်နှစ်က ချင်းပြည်နယ် မှ ၈.၀၇ ရာခိုင်နှုန်းသာ တက္ကသိုလ် ၀င်တန်း စာမေးပွဲအောင်မြင် ခဲ့ကြသည်။

၂၀၁၄-၁၅ ပညာသင်နှစ် တွင် ချင်းပြည်နယ်မှ တက္ကသိုလ်ဝင် တန်းဖြေဆိုသူ ကျောင်းသားဦးရေ စုစုပေါင်း ၉၆၃၉ ဦးရှိသည့် အနက် ကျောင်း သူကျောင်းသား စုစုပေါင်း ၁၇၂၀ ဦးအောင်မြင်ခဲ့ကြသည်။ ယင်းအထဲတွင် ၆ ဘာသာဂုဏ်ထူးရှင် (၁) ဦး၊ ၅ ဘာသာဂုဏ်ထူးရှင်(၁)၊ ၄ ဘာသာဂုဏ် ထူးရှင်(၅)ဦး၊ ၃ ဘာသာဂုဏ်ထူးရှင်(၁၅)ဦး၊ ၂ ဘာသာဂုဏ် ထူးရှင် (၄၃)ဦး နှင့် ၁ ဘာသာဂုဏ်ထူးရှင် (၂၃၃) ဦးရှိ သည်။

ဟားခါးမြို့နယ်သည် ၂၅.၇၄ ရာခိုင်နှုန်းဖြင့် ချင်းပြည်နယ်၏ အောင်ချက်အမြင့်ဆုံးမြို့နယ် အဖြစ် ရပ်တည်လျက်ရှိပြီး ပလက်ဝမြို့နယ်သည် ၇.၃၇ ရာခိုင်နှုန်းဖြင့် အောင်ချက် အနိမ့်ဆုံးမြို့နယ်အဖြစ် ရပ်တည်နေသည်။ ဖလမ်းမြို့နယ်မှ ၆ ဘာသာ နှင့် ၅ ဘာသာ ဂုဏ်ထူးရှင် အသီးသီး ထွက်ရှိခဲ့ကြ သည်။

ယခုကဲ့သို့ ချင်းပြည်နယ်၏ အောင်ချက်ရာခိုင်နှုန်းမြင့်တက်လာရ သည့်အကြောင်းတစ်ချက် မှာ ချင်းပြည်နယ်တွင် အလွတ် ပညာသင်ကျောင်း (ဘော်ဒါဆောင်) များလာပြီး ပညာရေးပြိုင်ဆိုင် မှုအားကောင်း လာခြင်းကြောင့်ဖြစ်သည်ဟု ချင်းပြည်နယ် လူမှုရေးဝန်ကြီး ဒေါက်တာဘမောင် က ပြောသည်။

“ အလွတ်ပညာသင်ကျောင်းတွေ ကျနော် တို့ခွင့်ပြုတယ်၊ ဟားခါးဆိုရင် အလွတ်ပညာသင်ကျောင်းတွေ အများကြီးပေါ်လာ တယ်၊ တစ်ကျောင်းနှင့် တစ်ကျောင်း ပြိုင်လာကြတယ်၊ အရည်အသွေး ရှိအောင်ပေါ့၊ တစ်ခုနှင့်တစ်ခု Competition (ပြိုင် ဆိုင်မှု) တွေ ရှိတော့ အောင်ချက်တွေကောင်း လာစေတာပေါ့၊ ဒါကြောင့် အလွတ်ပညာ သင်ကျောင်း တွေ များများ လိုတယ်’’ ဟု ၀န်ကြီးကပြောသည်။

ပြီးခဲ့သည့် ၂၀၁၃-၁၄ ပညာသင်နှစ်တွင် ချင်းပြည်နယ်မှ တက္ကသိုလ်ဝင်တန်းဖြေဆိုသူ ကျောင်းသားဦးရေ စုစုပေါင်း ၈၇၂၁ ဦးရှိသည့်အနက် ၇၀၄ ဦးသာ အောင်မြင်ခဲ့ကြပြီး ရာခိုင်နှုန်းအားဖြင့် ၈.၀၇ ရာခိုင်နှုန်းသာရှိခဲ့သည်။

ယခုနှစ် နှင့် ပြီးခဲ့သည့်  ပညာသင်နှစ် အောင်ချက်ပမာဏကို နှိုင်းယှဉ်ပါက ချင်းပြည်နယ်၏ တက္ကသိုလ်ဝင်ခွင့် စာမေးပွဲ အောင်ချက်သည် ထက်ဝက်ကျော် ခုန်တက်လာသည်ဟု ဆိုရပေမည်။ သို့သော်လည်း တစ်နိုင်ငံလုံးအတိုင်း အတာ နှင့် နှိုင်းယှဉ်ပါက ချင်းပြည်နယ်သည် အောင်ချက် အနိမ့် ဆုံးပြည်နယ် အဖြစ် ရပ်တည်နေဆဲဖြစ်သည်။

ချင်းပြည်နယ်သည် တက္ကသိုလ်ဝင်တန်း အဆင့်တွင် အောက်ချက်ရာခိုင်နှုန်း အနိမ့်ဆုံးအဆင့်တွင် ရှိနေသော်လည်း အခြေခံ ပညာမူလတန်း နှင့် အလယ်တန်း အဆင့်တွင် အခြားသောပြည်နယ် တိုင်းများနှင့် ရင်ဘောင်တန်း လျက်ရှိပြီး မကြာမီအချိန် ကာလအတွင်း
တက္ကသိုလ်ဝင် ခွင့်အောင် ချက်ရာခိုင်နှုန်း သည်လည်း ယခုထက်မက မြင့်တက် လာမည်ဟု ၀န်ကြီးကပြောသည်။

Share.

About Author

Leave A Reply

*

code