တတိယအကြိမ်မြောက် ချင်းသမိုင်းဆိုင်ရာ ဆွေးနွေးပွဲ ကျင်းပပြုလုပ်

0

Chin History Seminar

ချင်းမျိူးနွယ်စုအရေအတွက်နှင့်ပတ်သက်သော တတိယအကြိမ်မြောက် ချင်းသမိုင်းဆိုင်ရာ ဆွေးနွေးပွဲတစ်ရပ်ကို ဇန်န၀ါရီလ ၉ ရက်နေ့က ကလေးမြို့ တာဟန်းရပ်ကွက် EBC ဘုရားကျောင်းတွင် ကျင်းပပြု လုပ်ခဲ့ကြသည်။ ယင်းဆွေးနွေး ပွဲကို ၂၀၁၄ ခုနှစ် သန်းခေါင်စာရင်း ဆိုင်ရာ ချင်းအမျိူးသားအထောက်အကူပြုကော်မတီ(CNACC) မှ ကြီးမှူး ကျင်းပခဲ့ခြင်းဖြစ်ပြီး မြန်မာနိုင်ငံတွင် ချင်းလူမျိူး ၅၃ မျိူးရှိ သည်ဟု ရေတွက်သတ်မှတ်မှု အပေါ် လေ့လာ ဆန်းစစ်ဆွေးနွေး ခဲ့ ကြခြင်းဖြစ်သည်ဟု အထောက်အကူပြုကော်မတီမှ တာဝန်ရှိသူ ဆလိုင်းပီပီကပြောသည်။

“၂၀၁၄ သန်းခေါင်စာရင်းကောက်ယူတဲ့အချိန်မှာ ချင်းလူမျိူးတွေကို ၅၃ မျိူးအဖြစ် သတ်မှတ်ပြီး ကောက်ယူခဲ့တာကြောင့် ချင်းလူမျိူးတွေအကြား နားလည်မှုလွဲမှားမှုတွေဖြစ်လာတယ်၊ စိုးရိမ်စိတ်တွေလည်းပေါ်လာတယ်၊ အချင်းချင်း စိတ်ဝမ်းကွဲ စရာတွေလည်းစပြီးတော့ပေါ်လာတယ်၊ ပြီးတော့ ဗဟိုသန်းခေါင်စာရင်းကော်မတီကတော့ ၂၀၁၆ တိုင်းရင်းသားလူမျိူးများ အမည်စာရင်းထုတ်ပြန်မယ့်အချိန်မှာ ချင်းလူမျိူးတွေအကြားမှာ မလိုလားအပ်တဲ့ ရှူပ်ထွေးမှုတွေ ထပ်မံပြီးတော့ မပေါ် ပေါက်ဖို့ ချင်းပြည်နယ် နဲ့ ချင်းပြည်နယ်ပြင်ပမှာရှိနေကြတဲ့ ချင်းလူမျိူးတွေအားလုံးက စုပေါင်းညှိနှိုင်းပြီးတော့ အဖြေရှာကြ ဖို့ဆိုတဲ့ရည်ရွယ်ချက်နဲ့ ချင်းသမိုင်းဆိုင်ရာဆွေးနွေးပွဲကိုကျင်းပရတာဖြစ်ပါတယ်’’ ဟု ဆလိုင်းပီပီ ကပြောသည်။

ပထမအကြိမ် ချင်းသမိုင်းဆိုင်ရာဆွေးနွေးပွဲကို ချင်းပြည်နယ်မြို့တော်ဟားခါးတွင် ကျင်းပရန် စီစဉ်ခဲ့ကြသော်လည်း သဘာ ၀ဘေးဒဏ်ကျရောက်ခဲ့သည့်အတွက် ရန်ကုန်မြို့သို့ ပြောင်းရွှေ့ကျင်းပခဲ့ကြပြီးနောက် ဒုတိယအကြိမ်ကို လည်း ဇန်န၀ါရီလ ၆ ရက်နေ့ က ရန်ကုန်မြို့တွင် ကျင်းပခဲ့ကြပြီး ယခု တတိယအကြိမ် ချင်းသမိုင်းဆိုင်ရာဆွေးနွေးပွဲကို ကျင်းပခဲ့ကြခြင်းဖြစ် သည်။

အဆိုပါ ချင်းသမိုင်းဆိုင်ရာဆွေးနွေးပွဲများတွင် ချင်းလူမျိူး ၅၃ မျိူးထဲမှ နာမည်စလုံးပေါင်းအမှားများ၊ လူမျိူးအမည် မဟုတ်ဘဲ ဒေသအမည်ကို သုံးစွဲခြင်း နှင့် လက်ရှိအမှန်တကယ်တည်ရှိနေသော ချင်းလူမျိူးအရေ အတွက်များကို ပြန် လည် ရေတွက်စီ စစ်ခဲ့ကြသည် ဟု ဆလိုင်းပီပီ ကပြောသည်။

“၅၃ မျိူးနွယ်စုမှ တစ်ချိူ့တွေက လုံးဝကိုမရှိတော့တဲ့မျိူးနွယ်စုတွေရှိတယ် တစ်ချိူ့တွေက ဒေသအပေါ်မှာအခြေပြုတဲ့ လူမျိူးနွယ်စုတွေရှိတယ်၊ နောက်တစ်ခုက စာလုံးပေါင်းမှားတဲ့ လူမျိူးနွယ်စုတွေရှိတယ် အဲဒီအချက် ၃ ချက်ပေါ်မှာ အခြေ ခံပြီးတော့ စ လုံးပေါင်းအမှားတွေကိုပြင်ဆင်တယ်၊ ၅၃ မျိူးနွယ်စုလို့ စာရင်းပေါ်ထားတဲ့အထဲကနေ ဘာတွေဟာ အခုလက်ရှိ မရှိတော့တာလဲ ဘာတွေရှိနေသေးသလဲ၊ ကျနော်တို့ရေတွက်တာ တည်းဖြတ်တာ မဟုတ် ဘူးနော် ရေတွက် တာ” ဟု သူကပြောသည်။

၂၀၁၄ ခုနှစ် သန်းခေါင်စာရင်းဆိုင်ရာ ချင်းအမျိူးသားအထောက်အကူပြုကော်မတီအနေဖြင့် မကြာခင်အတွင်း လူထုတွေ့ဆုံပွဲ (Public Consultation) ကို နေရာ ၆ နေရာ (တီးတိန်၊ တမူး၊ ရိ၊ မင်းတပ်၊ ပလက်ဝ၊ စစ်တွေ) တွင် ဆက်လက်ပြုလုပ်သွားမည်ဖြစ်ပြီး ထိုမှတဆင့် သက်ဆိုင်ရာ ဒေသခံမျိူးနွယ်စုများ၏ လိုချင်သော၊ ဖြစ်စေချင်သော ဆန္ဒ အတိုင်း အတည်ပြုမှုရရှိပြီးမှ ဗဟိုသန်းခေါင်စာရင်းကော်မတီအဖွဲ့ထံကို ပြန်လည်တင်ပြသွားမည်ဟု သိရသည်။

ယခုလက်ရှိတွင် အထောက်အကူပြုကော်မတီ၏ ပဏာမလေ့လာတွေ့ရှိချက်အရ ချင်း ၅၃ မျိူးရှိသည် ဟူသော ရေတွက်မှုသည် မှန်ကန်မှုမရှိကြောင်း ချင်း ၅၃ မျိူးအနက် ချင်းမျိူးနွယ်စုများအဖြစ် ၃၆ မျိူးကို ရေတွက်နိုင်ခဲ့ကြောင်း၊ ယင်း ၃၆ မျိူးတွင် မျိူးနွယ်စု (Tribe)၊ ဆွေမျိူးစု(Clan)၊ မျိူးတူစု (Family) များ ရောနှောပါဝင်နေ ကြောင်း တွေ့ရှိရ သည်ဟု အထောက်အကူပြုကော်မတီကပြောသည်။

ချင်း ၅၃ မျိူးထဲ၌ နာဂအပါအ၀င် နာဂမျိူးနွယ်စု လေးခု၊ မဏိပူရမျိူးနွယ်စု တစ်ခု၊ နေပါလီမျိူးနွယ်စု တစ်ခု နှင့် အမျိူးအမည် နှစ်ခုကိုမူ မည်သည့်မျိူးနွယ်စုဖြစ်ကြောင်း စီစစ်အတည်ပြုနိုင်ရန်ကြိုးစား ဆဲဖြစ်သည်ဟု သိရသည်။

ထို့အပြင် ချင်းမျိူးနွယ်စုအမည်များအနက် လေးခုကို တစ်ခုလျင် အနည်းဆုံး နှစ်ကြိမ်စီ (ရှစ်မျိူးအဖြစ်) ရေးသားဖော်ပြထား ပြီး လေးခုသည် မျိူးနွယ်စုအမည်မဟုတ်ဘဲ ဒေသ၊မြို့၊ အမည်ရှေ့တပ်စကားလုံးစသည်တို့ကို အမျိူးအမည် အဖြစ် ရေး သားထားခြင်းဖြစ်ကြောင်း စီစစ်တွေ့ရှိရသည်ဟု ချင်းအမျိူးသားအထောက်အကူပြုကော်မတီထံမှ သိရသည်။

Share.

About Author

Leave A Reply