ချင်းပြည်နယ် ၀န်ကြီးချူပ် ဦးဆလိုင်းလျန်လွယ် နှင့် ၀န်ကြီးများ၏ ကိုယ်ရေးအကျဉ်း

0

ဦးဆလိုင်းလျန်လွယ် – ၀န်ကြီးချူပ်၊ ချင်းပြည်နယ်

ဦးဆလိုင်းလျန်လွယ်သည် ချင်းပြည်နယ် ဖလမ်းမြို့နယ် အိုင်ရဲဘွာလ်ကျေးရွာတွင် အဖ ဦးထာသင်ထန်း နှင့် အမိ ဒေါ်ဟရန်းဘွလ်ဇိန်းတို့မှ ၁၉၅၄ ခုနှစ်တွင်မွေးဖွားခဲ့သည်။ ရန်ကုန်တက္ကသိုလ်မှ ဥပဒေဘွဲ့ (LLB) အားရရှိခဲ့သူဖြစ်သည်။ ဥပဒေအရာရှိအနေဖြင့် ၁၉၈၃ ခုနှစ်တွင် ရန်ကုန်မြို့၊ (၁၉၈၄-၈၇)တွင် ကလေးမြို့၊ (၁၉၈၇-၈၉)တွင် ဖလမ်းမြို့၊(၁၉၈၉-၉၂)တွင် မင်းတပ် – မတူပီမြို့၊ (၁၉၉၂-၂၀၀၆)တွင် အမရပူရ၊ (၂၀၀၆-၂၀၁၀)တွင် စစ်ကိုင်းမြို့၊ (၂၀၁၀-၂၀၁၃)တွင် ဖလမ်းမြို့ နှင့် (၂၀၁၃-၂၀၁၄)တွင် တမူးခရိုင်ဥပဒေအရာရှိအဖြစ် အသီးသီး အစိုးရ၀န်ထမ်းဆောင်ခဲ့သူဖြစ်သည်။ အစိုးရ၀န်ထမ်းမှ အငြိမ်းစားယူပြီးနောက် ၂၀၁၅ ရွေးကောက်ပွဲ တွင် NLD ပါတီကိုယ် စားလှယ်လောင်းအနေဖြင့် ဖလမ်းမြို့ ပြည်နယ်မဲဆန္ဒနယ်မြေ အမှတ်(၂) တွင် ၀င်ရောက်ယှဉ်ပြိုင်ကာ အနိုင်ရရှိခဲ့သည်။

သူသည် တက္ကသိုလ်ကျောင်းသားဘ၀တွင်လည်း ဆလိုင်း-မိုင်လှုပ်ရှားမှုကဲ့သို့သော ချင်းကျောင်းသား လှုပ်ရှားမှုများတွင် ချင်းကျောင်းသားခေါင်းဆောင်များဖြစ် ကြသော ဆလိုင်းရမ်းလိန်မှုန်း၊ ဆလိုင်းကစ်ပ်ခိုလျန်တို့နှင့်အတူ တက်ကြွစွာပါဝင် လှုပ်ရှားခဲ့သူဖြစ်သည်။

ဦးဝီကော – စီမံကိန်း နှင့် ဘဏ္ဍာရေးဝန်ကြီး

ဦးဝီကောသည် ချင်းပြည်နယ် မတူပီမြို့နယ် ရှာတလိုင်းကျေးရွာတွင် အဖ ဦးပေါ်ကြိုး နှင့် အမိ ဒေါ်ပေါကြယ်တို့မှ ၁၉၅၃ ခုနှစ်၌ မွေးဖွားခဲ့သည်။ မူလတန်းကျောင်းကို ရှာတလိုင်းကျေးရွာတွင် (၁၉၅၉-၆၄)၊ အလယ် တန်းကို စာလ်ထောင်ရွာတွင် (၁၉၆၄-၆၇)၊ အထက်တန်းကို ဂန့်ဂေါမြို့တွင် (၁၉၆၇-၇၀)အထိ ပညာသင်ကြားခဲ့ပြီးနောက် (၁၉၇၀-၇၄) ခုနှစ်အထိ စီးပွားရေးတက္ကသိုလ်၊ ရန်ကုန်တွင် တက်ရောက်ကာ (B.com) ဘွဲ့ရရှိခဲ့သည်။ ၁၉၇၉ ခုနှစ်မှ ၂၀၁၃ ခုနှစ်အထိ စီမံကိန်း ရေးဆွဲရေးဦးစီးဌာနတွင် ဒုတိယဦးစီးမှူးရာထူးမှ ညွန်ကြားရေးမှူးရာထူးအထိ တာဝန်ထမ်း ဆောင်ခဲ့သည်။ အစိုးရ၀န် ထမ်းဘ၀မှ အငြိမ်းစာယူပြီးနောက် ၂၀၁၅ အထွေထွေရွေးကောက်ပွဲတွင် အမျိူးသားဒီမိုကရေစီ အဖွဲ့ချူပ်ပါတီကိုယ်စား လှယ်အနေဖြင့် မတူပီမြို့နယ် မဲဆန္ဒနယ်မြေ ၂ ပြည်နယ်လွှတ်တော်တွင် ၀င်ရောက်ယှဉ်ပြိုင်ပြီး အနိုင်ရရှိခဲ့သည်။

ဦးပေါင်လွန်းမင့်ထန် – လူမှုရေးဝန်ကြီး

နှစ်ရွယ် ဦးပေါင်လွန်းမင့်ထန်သည် ချင်းပြည်နယ် တွန်းဇံမြို့နယ် ကျီခါးမြို့တွင် အဖ ဦးပွမ်ခေါမန် နှင့် အမိ ဒေါ် ကျိန်ခန့်ဝှန် တို့မှ ၁၉၇၀ ခုနှစ်တွင် မွေးဖွားခဲ့သည်။ အလယ်တန်းကျောင်းကို ကျီခါးမြို့တွင် (၁၉၇၆-၈၅)၊ အထက်တန်း ကျောင်းကို ထုတ်လိုင်တွင် (၁၉၈၆-၈၈)အထိ တက်ရောက်ခဲ့သည်။ (၁၉၉၃-၉၄)အထိ ကလေးကောလိပ် နှင့် (၁၉၉၄-၉၅)အထိ မန္တလေး တက္ကသိုလ်တွင် တက်ရောက်ခဲ့ပြီး ရူပ၊ သိပ္ပံဘွဲ့ရရှိခဲ့သည်။ သူသည် ပုဂ္ဂလိက ကုမ္ပဏီတစ်ခုဖြစ်သော B.D.K Co.Ltd(Yangon) ၏ Director တစ်ဦးလည်ဖြစ်သည်။ ၂၀၁၅ ရွေးကောက်ပွဲတွင် ဇိုမီးဒီမိုကရေစီအဖွဲ့ချူပ်ပါတီ ကိုယ်စားပြု အနေဖြင့် တွန်းဇံမြို့နယ် မဲဆန္ဒနယ်မြေ ၂ ပြည်နယ်လွှတ်တော်တွင် ၀န်ရောက်ယှဉ်ပြိုင်ပြီး အနိုင်ရရှိခဲ့သည်။

ဦးရွှေထီးအို – လမ်းပန်းဆက်သွယ်ရေးဝန်ကြီး

ဦးရွေထီးအိုသည် ချင်းပြည်နယ် ထန်တလန်မြို့နယ် တလန်ခွါရွာတွင် အဖ ဦးထန်လွယ် နှင့် အမိ ဒေါ်လင်းသွယ်တို့မှ ၁၉၅၀ ခုနှစ်တွင် မွေးဖွားခဲ့သည်။ အထက်တန်းကျောင်းကို ဖလမ်း၊ မြစ်ကြီးနား၊ ဗန်းမော် တို့တွင် တက်ရောက်ခဲ့ပြီး မန္တလေးမြို့ ၀ိဇ္ဇာသိပံ္ပတက္ကသိုလ်တွင်ကျောင်းပြီးကာ ၀ိဇ္ဇာဘွဲ့ရရှိခဲ့သည်။ ၁၉၇၂ ခုနှစ်မှ ၂၀၀၉ ခုနှစ်အထိ သမ၀ါယမ ဦးစီး ဌာနတွင် အစိုးရ၀န်ထမ်းဆောင်ခဲ့ပြီး လက်ထောက်ညွန်ကြားရေးမှူးအဆင့်ဖြင့် အငြိမ်းစားယူခဲ့သည်။ သူသည် ဟားခါးမြို့ ရပ်မိရပ်ဖအဖွဲ့၏ အတွင်းရေးမှူးတာဝန်လည်းထမ်းဆောင်ခဲ့ဘူးသူဖြစ်သည်။ ၂၀၁၀ ရွေးကောက်ပွဲတွင် ကြံ့ခိုင်ရေးပါတီ ကိုယ်စားပြုအနေဖြင့် ထန်တလန်မြို့မဲဆန္ဒနယ်မြေတွင် ၀င်ရောက်ယှဉ်ပြိုင်ခဲ့သော်လည်း ရှူံးနိမ့်ခဲ့သည်။ ၂၀၁၃ ခုနှစ်က၍ NLD ပါတီသို့ ၀င်ရောက်ကာ ၂၀၁၅ ရွေးကောက်ပွဲတွင် ဟားခါးမြို့နယ် မဲဆန္ဒနယ်မြေ အမှတ် ၂ ပြည်နယ်လွှတ်တော်တွင် ၀င်ရောက်ယှဉ်ပြိုင်ပြီး အနိုင်ရရှိခဲ့သည်။

ဆလိုင်းအိုက်ဇက်ခင် – စည်ပင်သာယာရေး၊ လျှပ်စစ်နှင့်စက်မှုလက်မှုဝန်ကြီး

ဆလိုင်းအိုက်ဇက်ခင်သည် ချင်းပြည်နယ်၊ ပလက်ဝ ဇာတိဖြစ်ပြီး ကချင်ပြည်နယ်၊ ရခိုင်ပြည်နယ်တွေမှာ ကြီးပြင်း ခဲ့သည်။ မိဘ နှစ်ပါးမှာ အင်္ဂလိ ကန် ဘုန်းတော်ကြီး ဦး နန်းချင်း နဲ့ ဒေါ်မော်လီဖြစ်ပါသည်။ ၁၉၉၆ ခုနှစ်မှာ သင်္ချာအထူးပြု ဘာသာ ဖြင့် မြစ်ကြီးနား တက္ကသိုလ်မှ BSc ဘွဲ့ကို ရရှိခဲ့သည်။

၂၀၀၂ – ၂၀၀၃ ခုနှစ်တွင် သန့်ရှင်းသော ကားတိုင်တော် အင်္ဂလိကန် ဓမ္မတက္ကသိုလ်မှ ဓမ္မ၀ိဇ္ဖာဘွဲ့ကို ပြီးစီးခဲ့ပြီး ၂၀၀၄ – ၂၀၀၆ ခုနှစ်တွင် MIT, မြန်မာနိုင်ငံ ဓမ္မတက္ကသိုလ်မှ မဟာဓမ္မ၀ိဇ္ဖာပညာကို ဆည်းပူး ပြီး Social Science ဆိုင်ရာ မဟာဓမ္မ၀ိဇ္ဖာဘွဲ့ကို ၂၀၀၆ ခုနှစ်တွင် ရရှိခဲ့သည်။ ကမ္ဘောဒီယားနိုင်ငံတွင် ငြိမ်းချမ်းရေးတည်ဆောက်ခြင်းနှင့် ပဋိပက္ခ ကိုင်တွယ်ဖြေရှင်းခြင်းဆိုင်ရာ မဟာဝိဇ္ဖာဘွဲ့ကို ထပ်မံဆည်းပူးဆွတ်ခူးရရှိခဲ့သည့်အပြင် အစ္စရေးနိုင်ငံတွင် Gender နှင့် ငြိမ်းချမ်းရေး – လုံခြုံရေး ဆိုင်ရာ Course ကို သင်ယူလေ့လာခဲ့ပြီးမှ ၂၀၁၀ ခုနှစ်မှာ Gender and Development Initiative Myanmar ဆိုသည့် Local NGO ကို ရန်ကုန်မြို့တွင် အခြေစိုက်တည်ထောင်ပြီး ဦးဆောင် ဒါရိုက်တာအဖြစ် ဆောင်ရွက်နေသူဖြစ်သည်။

ဦးမာန်ဟင်းဒါလ်း – စိုက်ပျိူးရေး၊ မွေးမြူရေး၊ သစ်တောနှင့် သတ္တုဝန်ကြီး

ဦးမာန်ဟင်းဒါလ်းသည် ချင်းပြည်နယ် တီးတိန်မြို့နယ် ဆောင်ဓေါ့ကျေးရွာတွင် အဖ ဦး Ngul Khaw Cin နှင့် အမိ ဒေါ် Dim Zam တို့မှ ၁၉၆၁ ခုနှစ်၌ မွေးဖွားခဲ့သည်။ ပညာအရည်အချင်းမှာ B.Sc, (GHP- အထက်တန်းရှေ့နေ) Zoology ဘွဲ့ရရှိခဲ့သည်။ လယ်ယာနှင့်သစ်တောဝန်ကြီးဌာနတွင် လက်ထောက်ညွန်ကြားရေးမှူးအဖြစ် ၁၀ နှစ်ခန့်တာဝန်ထမ်း ဆောင်ခဲ့ပြီးနောက် အစိုးရ၀န်ထမ်းဘ၀မှ နှုတ်ထွက်ခဲ့သည်။ ယခုလက်ရှိတွင် နိုင်ငံခြား ကုမ္ပဏီတစ်ခုဖြစ်သော TCS.E တွင်အကြံပေး (Adviser) အဖြစ်တာဝန်ထမ်းဆောင်လျက်ရှိသည်။

 

 

မှတ်ချက်။       ။ ချင်းပြည်နယ်၏ လုံခြုံရေး နှင့် နယ်စပ်ရေးရာဝန်ကြီးမှာ ဗိုလ်မှူးကြီးကျော်ကျော်ဖြစ်သည်။ သူ၏ ကိုယ်ရေးအချက်အလက်များ ရှာဖွေစုံစမ်းပြီးပါက ပြန်လည်ဖော်ပြပေးပါမည်။ (အယ်ဒီတာ)

 

Share.

About Author

Leave A Reply