စစ်ဘေးရှောင်များ ပြသနာရှာသော မကောင်းသတင်းထွက်ပါက ရပ်ကွက်ထဲနေခွင့်မရှိဟုဆို

(005MK)

မီဇိုရမ်ပြည်နယ် Khawzawl မြို့ Dinthar ရပ်ကွက်ဧရိယာအတွင်း နေထိုင်ကြသော စစ်ဘေးရှောင်များအနေဖြင့် ပြသနာရှာသော မကောင်းသတင်းထွက်ပါက ရပ်ကွက်ထဲနေခွင့်ပြုမည်မဟုတ်ကြောင်း မီဇိုးလူငယ်အသင်း (YMA Kumpuan Committee) က သတိပေးထားကြောင်းသိရသည်။

မတ်လ ၂၉ ရက်နေ့က Khawzawl, Dinthar ရပ်ကွက်က မီဇိုးလူငယ်အသင်း (YMA Kumpuan Committee) သည် ၎င်းတို့ဒေသအတွင်းနေထိုင်ကြသော လူမျိုးခြား နှင့် နိုင်ငံခြားသား စစ်ဘေးရှောင်များကို စုံစမ်းစစ်ဆေးမှုပြုလုပ်ခဲ့ ကြသည်ဟု မီဇိုရမ်ဒေသတွင်း အခြေစိုက် Bengvarna သတင်းကဖော်ပြသည်။

ထိုကဲ့သို့ စစ်ဆေးရာတွင် အထူးသဖြင့် မြန်မာနိုင်ငံမှရောက်ရှိလာကြသော စစ်ဘေးရှောင်များ၏ နာမည်စာရင်းများ အားလုံးကို ကောက်ယူပြီး ရပ်ရွာထဲ ပြသနာရှာကာ အနှောက်အယှက်ဖြစ်စေသော လုပ်ဆောင်မှုများရှိသည်ဟု သတင်းများ ထွက်ပေါ်လာပါက ရပ်ကွက်ထဲနေထိုင်ခွင့်ပြုမည်မဟုတ်ကြောင်း အသိပေးပြောကြားခဲ့ကြသည်ဟု ဖော်ပြထားသည်။

အခြားဒေသမှ Khawzawl, Dinthar ရပ်ကွက်ဧရိယာအတွင်း ပြောင်းရွှေ့လာကြမည့်သူများအနေဖြင့်လည်း သက်ဆိုင် ရာကျေးရွာကထုတ်ပေးလိုက်သော ပြောင်းရွှေ့လက်မှတ်မပါရှိပါက အိမ်ငှါးခွင့်မရှိကြောင်း၊ အိမ်ရှင်များအနေဖြင့်လည်း ပြောင်းရွှေ့လက်မှတ်မရှိသူများကို အိမ်ငှါးခွင့်မပြုကြရန် မီဇိုးလူငယ်အသင်းက အသိပေးထားသည်ဟု သိရသည်။

ယခုလက်ရှိ Khawzawl, Dinthar ရပ်ကွက်တွင် စစ်ဘေးရှောင် ၁၅ ဦး နှင့် စစ်ဘေးရှောင်မဟုတ်သူ မြန်မာနိုင်ငံသား ၅ ဦးရှိသည်ဟု သိရသည်။

ချင်းပြည်နယ်နှင့် ကပ်လျှက်ရှိနေသော မီဇိုရမ်ပြည်နယ်သည် မြန်မာနိုင်ငံမှာ စစ်အာဏာသိမ်းမှုဖြစ်ပွားပြီးနောက် ချင်းလူမျိုးအများစု ထွက်ပြေးခိုလုံကြရသည့် ဒေသဖြစ်သည်။

အစကနဦးပိုင်းတွင် ဒေသတွင်းအစိုးရ၊ ဘာသာရေး၊ အရပ်ဖက်အဖွဲ့အစည်းများက အားတက်သရော ဝိုင်းဝန်းကူညီ ထောက်ပံ့ပေးခဲ့ကြသော်လည်း စစ်ဘေးရှောင်ကာလအချိန်ကြာမြင့်လာသည်နှင့်အမျှ စစ်ဘေးရှောင်များနှင့် ရပ်ရွာလူထုအကြား ပွတ်တိုက်မှု၊ အမြင်မကြည်မှုများလည်းဖြစ်လာနေသည်ဟု စစ်ဘေးရှောင် အရေးကူညီဆောင်ရွက်ပေး နေသူတစ်ဦးကပြောသည်။

အထူးသဖြင့် မီဇိုရမ်ပြည်နယ်တွင် မြန်မာနိုင်ငံမှတဆင့် ဘိန်းဖြူ၊ စိတ်ကြွဆေးပြား နှင့် တရားမဝင်မှောင်ခိုလုပ်ငန်းများ မြင့်တက်လာပြီး ယင်းကဲ့သို့မြင့်တက်လာရခြင်းမှာ စစ်ဘေးရှောင်များဝင်ရောက်လာသည့်နောက်ပိုင်းတွင် ပိုများလာသည်ဟုဆိုကာ စစ်ဘေးရှောင်တချို့လည်း ပါဝင်ပတ်သက်မှုရှိသည်ဟု ဒေသခံအဖွဲ့အစည်းတချို့က ယူဆမှုများလည်း ထွက်ပေါ်နေသည်။

ထို့အပြင် စစ်ဘေးရှောင်များသည် အိန္ဒိယနိုင်ငံသားများသာ ပိုင်ဆိုင်ခွင့်ရှိသော သက်သေအထောက်အထား၊ မှတ်တမ်း များကိုလည်း တရားမဝင်သောနည်းလမ်းဖြင့် ပိုင်ဆိုင်နေကြသည်ဟုဆိုကာ စုံစမ်းစစ်ဆေးပေးရန် အစိုးရထံ ကိုလည်း ဒေသတွင်းအဖွဲ့အစည်းတချို့က တင်ပြမှုများလည်းရှိခဲ့သည်။

မီဇိုရမ်ပြည်နယ် ကျန်ဖိုင်းခရိုင် Farkawn ကျေးရွာမှာလည်း စစ်ဘေးရှောင်များကို ဆိုင်ခန်းဖွင့်ခွင့်မပြုတော့ဘဲ ဖွင့်ထားသည့် ဆိုင်ခန်းများကို မေလ ၃၁ ရက်နေ့ နောက်ဆုံးထား ပိတ်သိမ်းကြရန် Farkawn ကျေးရွာအုပ်ချုပ်ရေးမှူးအဖွဲ့နှင့် အရပ်ဖက်အဖွဲ့အစည်းများက ထုတ်ပြန်ထားသည်။