ချင်းပြည်နယ် ဖလမ်းမြို့နယ် ရိဒ်-ကလေးအကြား ပြေးဆွဲလျှက်ရှိသော ခရီးသည်တင်နှင့် ကုန်တင်ယာဉ်များ အဝင်/အထွက်အားလုံး ဒီဇင်ဘာလ ၁၈ ရက်နေ့ကစ၍ တားမြစ်ပိတ်ပင်ကြောင်း အွန်လိုင်းပေါ်ထွက်ပေါ်လာသည့် ကြေညာချက်သည် တရားမဝင်ကြောင်း ချင်းအမျိုးသားတပ်ဦး CNF ပြောရေးဆိုခွင့်ရှိသူ ဆလိုင်းထက်နီက ပြောသည်။
အိန္ဒိယ-မြန်မာနယ်စပ် ရိခေါဒါရ်မြို့နှင့် စစ်ကိုင်းတိုင်းကလေးမြို့အကြား ပြေးဆွဲသောယာဉ်လိုင်းများ နယ်မြေလုံခြုံရေးလိုအပ်ချက်အရ အဝင်/အထွက်အားလုံး ဒီဇင်ဘာလ ၁၈ ရက်နေ့မှ ၂၀၂၃ ခုနှစ် ဇန်နဝါရီလ ၅ ရက်နေ့အထိ လုံးဝ (လုံးဝ) တားမြစ်ထားပြီး ၎င်းတားမြစ်ထားခြင်းအပေါ် ပြည်သူများနှင့် ကုန်သည်များ အလေးထားလိုက်နာဆောင်ရွက်ပေးကြရန် အထူးမေတ္တာရပ်ခံထုတ်ပြန်အပ်ပါသည်ဟုဆိုကာ CNF အမှတ်တံဆိတ်ဖြင့် ကြေညာချက်တစ်စောင် ဒီဇင်ဘာလ ၁၇ ရက်နေ့က အွန်လိုင်းပေါ်မှာ ပြန့်နှံံ့လာခဲ့သည်။
ယင်းကိစ္စနှင့်ပတ်သက်၍ ချင်းအမျိုးသားတပ်ဦး CNF ပြောရေးဆိုခွင့်ရှိသူ ဆလိုင်းထက်နီက “ဗဟိုကနေ ဘာညွန်ကြားချက်မှမရှိတဲ့အတွက် ဒီစာက အကျူံးမဝင်ပါဘူး၊ အဲဒီအပေါ် မတွေဝေကြဖို့ကိုလည်း ပြည်သူလူထုကို မေတ္တာရပ်ခံလိုပါတယ်” ဟု ခိုနူမ်းသုန်ကိုပြောသည်။
ကလေး-ရိလမ်းကြောင်းသည် အိန္ဒိယ-မြန်မာနယ်စပ်ကုန်သွယ်ရေးတွင် အဓိကအရေးပါသည့် လမ်းကြောင်းတစ်ခုဖြစ်သည်။
