(006SV)
ပြည်သူ့ရင်ခွင်ခိုလှုံလာကြမည့် တပ်မတော်သား၊ ရဲတပ်ဖွဲ့ဝင်များနှင့် ပြည်သူ့စစ်များအတွက် အထူးခြွင်းချက်ကာလအဖြစ် လွတ်ငြိမ်းချမ်းသာခွင့်မူဝါဒကို ချမှတ်ဖော်ဆောင်နေသောကြောင့် အချိန်မနှောင်းခင် ပြည်သူ့ရင်ခွင့် ခိုလှုံကြရန် NUG၊ CNF အပါအဝင် တော်လှန်ရေးအင်းအားစုများက စုပေါင်းတိုက်တွန်းလာသည်။
လွတ်ငြိမ်းချမ်းသာခွင့်မူဝါဒတွင် စစ်မြေပြင်မှာ ပြည်သူ့တော်လှန်ရေးအင်အားစုများထံ လက်နက်အပ်နှံလျက် ပြည်သူကို သစ္စာခံမည့်အကြောင်း သဘောထားဖော်ပြလာသူများကို ဖမ်းဆီးချုပ်နှောင်ခြင်း၊ ညှင်းပန်းနှိပ်စက်ခြင်း ပြုလုပ်မည် မဟုတ်ဘဲ မိသားစုထံ ပြန်လိုက ပြန်နိုင်အောင် ကူညီစီစဉ်ပေးမည်၊ မိသားစုဝင်များ အတူပါလာလျှင် ၎င်းတို့၏ ဘေးအန္တရာယ်ကင်းရှင်း ရေးနှင့် လုံခြုံရေးကို တာဝန်ယူမည်၊ ပြန်လည်အခြေချ နေထိုင်နိုင်ရန် လိုအပ်သော ထောက်ပံ့မှုများကို အစွမ်းကုန်ကူညီဆောင် ရွက်ပေးမည်ဟု ပူးတွဲထုတ်ပြန်ချက်တွင်ဖော်ပြထားသည်။
“အကြမ်းဖက်စစ်အုပ်စု လက်အောက်ခံတပ်မတော်သား၊ ရဲတပ်ဝင်များ၊ ပြည်သူ့စစ်များနှင့် အတင်း အဓမ္မရှေ့တန်း စေလွှတ်ခံ ရသူများအတွက် အထူးတိုက်တွန်းတွန်းချက်နှိုးဆော်ချက်” ကို အမျိုးသားညီညွတ်ရေးအစိုးရ (NUG)၊ Kachin Ginra People’s Embrace Zinlum Komiti (KPEZ)၊ ချင်းအမျိုးသားတပ်ဦး CNF၊ ပအိုဝ်းအမျိုးသားဖက်ဒရယ်ကောင်စီ (PNFC)၊ ကရင်နီ လူမျိုးပေါင်းစုံ ပြည်သူ့လွတ်မြောက်ရေးတပ်ဦး (ကလလတ)နဲ့ ကရင်နီအမျိုးသားများကာကွယ်ရေးတပ်ဖွဲ့ (KNDF) တို့က ယမန်နေ့ နိုဝင်ဘာ ၂၇ ရက်မှာ ပူးတွဲထုတ်ပြန်ခြင်းဖြစ်သည်။
စစ်ကောင်စီတပ်ဖွဲ့များမှ တစ်ဦးချင်းဖြစ်စေ၊ တပ်ရင်းတပ်ဖွဲ့လိုက်ဖြစ်စေ နီးစပ်ရာ တော်လှန်ရေးတပ်ဖွဲ့များ၊ တိုင်းရင်သား တော်လှန်ရေးအင်အားစုနှင့် t.me/MyanmarPeople တယ်လီဂရမ်အကောင့်သို့ ဆက်သွယ်၍ စစ်အုပ်စုကို စွန့်ခွာကာ ပြည်သူ့ရင်ခွင့်သို့ ခိုလှုံရန် ထပ်မံတိုက်တွန်းလာခြင်းဖြစ်သည်။
စစ်အာဏာရှင်စနစ် အမြစ်ပြတ်ချေမှုန်းရေး၊ ဖက်ဒရယ်ဒီမိုကရေစီပြည်ထောင်စု နိုင်ငံတော်သစ် တည်ဆောက်ရေးဟူသော တူညီ ရည်မှန်းချက်များဖြင့် မဟာဗျူဟာမြောက် ထိုးစစ်များကို မြန်မာနိုင်ငံအနှံအပြားတွင် စုစည်းညီညွတ်စွာ စတင်ဆင်နွှဲနေသည်ဟု ယင်းပူးတွဲထုတ်ပြန်ချက်တွင်ဖော်ပြသည်။
ပြည်သူ့ နွေဦးတော်လှန်ရေး ၃ နှစ်ခန့်အတွင်း တစ်နိုင်ငံလုံးအနှံ့အပြားမှ တပ်မတော်သားများ၊ ရဲတပ်ဖွဲ့ဝင်များနှင့် ပြည်သူ့စစ် စုစုပေါင်း ၁၄၀၀၀ ကျော်သည် ပြည်သူ့ရင်ခွင့်ခိုလှုံပြီးနောက် လက်ရှိအချိန်တွင် ၎င်းတို့၏ မိသားစုဝင်များနှင့်အတူ ဘေးကင်း လုံခြုံသောနေရာတွင် နေထိုင်လျက်ရှိကြောင်းသိရသည်။
