ချင်းပြည်နယ်တောင်ပိုင်း မင်းတပ်မြို့မှ မတူပီမြို့သို့ ထွက်ခွါသည့် တင့်ကား ၂ စီးပါ စစ်ကောင်စီယာဉ်တန်းနှင့် CDF-Mindat တပ်ဖွဲ့တို့ မတ်လ ၂၆ ရက်နေ့ကစ၍ နှစ်ဖက်ထိတွေ့မှု စတင်ဖြစ်ပွားနေပြီး စစ်ကောင်စီဘက်က အကျအဆုံးရှိ ခဲ့သည်ဟု သိရသည်။
စစ်ကောင်စီတပ်နှင့် CDF-Mindat တပ်ဖွဲ့တို့သည် မင်းတပ်မြို့နယ် မင်းတပ်-မတူပီလမ်း မိုင်တိုင်အမှတ် ၁၆ တွင် မတ်လ ၂၆ ရက်နေ့က တိုက်ပွဲ ဖြစ်ပွားခဲ့ပြီး စစ်ကောင်စီဘက်က ၅ ဦးခန့်သေဆုံးခဲ့သည်ဟု CDF-Mindat ကထုတ်ပြန်သည်။
ယခုလက်ရှိတွင် မင်းတပ်-မတူပီလမ်းကြောင်းတစ်လျှောက်ရှိ ဖုန်းလိုင်းများကို စစ်ကောင်စီတပ်ဖွဲ့က ဖြတ်တောက်ထားပြီး တိ်ုက်ပွဲဖြစ်ပွားမှုအသေးစိတ်ကိုမူမသိရသေးကြောင်း CDF- Mindat မှ ပြောရေး ဆိုခွင့်ရှိသူ တစ်ဦးက ပြောသည်။
“ အနောက်ဖက်တကျောကို ဖုန်းလိုင်းတွေဆက်သွယ်မှုအကုန်ဖျက်ခံထားရတယ်။ ရှေ့တန်းဝင်နေတဲ့ရဲဘော် တွေနဲ့တောင် ဆက်သွယ်လို့မရဘူး။ လုံးဝအဆက်အသွယ်က ဖြတ်ပစ်လိုက်တာ။ တိုက်ပွဲက သူတို့က တောက်လျှောက်ပဲ လက်နက်ကြီး တွေနဲ့ပစ် ဖြည်းဖြည်းချင်းနဲ့ ရွေ့လာတဲ့ သဘောရှိတယ်” ဟု CDF- Mindat မှ ပြောရေး ဆိုခွင့်ရှိသူ တစ်ဦးက ပြောသည်။
မကွေးတိုင်း၊ ကျောက်ထုဘက်မှ မင်းတပ်မြို့သို့ရောက်ရှိလာသည့် တင့်ကားနှစ်စီးနှင့် ကားအစီး ၈၀ ကျော်ပါသော စစ်ကောင်စီယာဉ်တန်းသည် မင်းတပ်မြို့မှ မတူပီမြို့သို့ မတ်လ ၂၅ ရက်နေ့က ဆက်လက်ထွက်ခွါကာ CDF-Mindat တပ်ဖွဲ့နှင့် တိုက်ပွဲဖြစ်ပွားနေခြင်းဖြစ်သည်။
စစ်ကောင်စီယာဉ်တန်းသည် မတ်လ ၂၇ ရက်နေ့က မင်းတပ်မြို့နယ် မင်းတပ်-မတူပီလမ်း မိုင်တိုင်အမှတ် ၂၃- ၂၄ တွင် ညအိပ်ကာ ယနေ့နံနက်ပိုင်းတွင် ဆက်လက်ထွက်ခွါလာပြီး နှစ်ဖက်ထိတွေ့မှုများတောက်လျှောက်ဖြစ်လာနိုင်သည်ဟု သိရသည်။
မင်းတပ်မြို့နှင့် မတူပီမြို့သည် ၁၀၂ မိုင် ခန့်ကွာဝေးပြီး စစ်ကောင်စီယာဉ်တန်းသည် ယနေ့ညတွင် မင်းတပ်မြို့နယ်အတွင်း မိုင်တိုင် ၃၀၊ ၃၁ တွင် ညအိပ်ကြမည်ဟု ခန့်မှန်းရပြီး မတူပီမြို့သို့ ဝင်ရောက်ရန် အနည်းဆုံး ရက်သတ္တပတ်နှင့် ဆယ်ရက်ခ န့် ကြာမြင့်နိုင်ကြောင်း CDF- Mindat ပြောရေးဆိုခွင့်ရှိသူကပြောသည်။
