မြန်မာနိုင်ငံမှ စစ်ဘေးရှောင်ပြည်သူများအား နွေးထွေးစွာလက်ခံကြိုဆိုသည့် မီဇိုရမ်အပေါ်ကျေးဇူးတင်ကြောင်း ဂုဏ်ပြု သည့်အနေဖြင့် Chin TV Night Mizoram အစီစဉ်တရပ်ကို ဧပြီလ ၁၆ ရက်နေ့တွင် မီဇိုရမ်ပြည်နယ်၏မြို့တော် အိုင်ဇောလ်တွင် ကျင်းပကြမည်ဟုသိရသည်။
ချင်းနှင့်မီဇိုး သွေးချင်းညီအကိုဖြစ်ခြင်း၊ လက်ရှိမြန်မာ့အရေးအခင်းကြောင့် ဒုက္ခဆင်းရဲကြုံတွေ့ပြီး ကြမ်းတမ်း ခက်ခဲ သည့်ကာလတွင် မြန်မာပြည်သူများအား လက်ခံပြုစုစောင့်ရှောက်ကာ နည်းလမ်းမျိုးစုံဖြင့် လက်တွေ့မေတ္တာပြသည့် မီဇိုရမ်ပြည်နယ် အစိုးရ၊ အစိုးရမဟုတ်သောအဖွဲ့အစည်း (NGO) များနှင့် အရပ်ဘက်အဖွဲ့အစည်းများအပေါ် ကျေးဇူးတင်ရုဏ်ပြုသည့်အနေဖြင့် Chin TV International က ဦးဆောင်ကျင်းပမည်ဖြစ်သည်။
အဆိုပါအခမ်းအနားအစီစဉ်တွင် အထူးဧည့်သည်တော်များအနေဖြင့် ချင်းပြည်နယ်ဝန်ကြီးချုပ်ဟောင်း ဆလိုင်းလျန်လွယ်၊ မီဇိုရမ်အထက်လွတ်တော်အမတ် Pu K.Vanlalvena နှင့် ပြည်နယ်လွှတ်တော်အမတ် Dr.ZR Thiamsanga တို့ကို ဖိတ်ကြားထားသည်။
ထို့အပြင် Central Young Mizo Association (CYMA), Mizo Zirlai Pawl (MZP), Mizo Student’s Union (MSU) နှင့် Zo Reunification Organization (ZoRO) အဖွဲ့ကိုလည်း ဖိတ်ကြားထားကြောင်းလည်းသိရသည်။
အခမ်းအနားအစီစဉ်ကို ဧပြီလ ၁၆ ရက်နေ့ ညနေ ၂းဝ၀ နာရီတွင် Dawrpui Multipurpose Centre, Aizawl တွင် ကျင်းပသွားမည်ဖြစ်ပြီး ချင်း၊ မီဇိုး တိုင်းရင်းသား တေးသံရှင်များဖြစ်ကြသည့် Guys from Chin, Shin Bia, Thawn Kham, Yaw Kee, DJ Lalvenhimi, Zoramchhani, Marina V Varte, Sangtei Khuptong နှင့် Angaihtei တို့မှ သီဆိုဖျော်ဖြေကြမည်ဖြစ်သည်။
ယင်းအစီအစဉ်ကို Chin TV International နှင့် မီဇိုရမ်ပြည်နယ် TV Channel များဖြစ်ကြသော Zonet/LPS ရုပ်သံလိုင်းမှတဆင့် တိုက်ရိုက် (Live) ထုတ်လွှင့်သွားမည်ဖြစ်သည်။
