သမ္မာကျမ်းစာကို ဖေးမီးနစ်ရှုထောင့်မှလေ့လာသည့် “အာဗြဟံ၏ဘုရားမှ ဟာဂရ၏ဘုရားသို့” စာအုပ် နေနူးအဖွဲ့မှ ထုတ်ဝေမည်

0

By လားနွန် – ချင်းအမျိူးသမီးအရေးလှုပ်ရှားသည့် နေနူး (Ninu) အဖွဲ့က သမ္မာကျမ်းစာကို ဖေးမီးနစ်ရှုထောင့်မှလေ့လာသည့် “အာဗြဟံ ၏ဘုရားမှ ဟာဂရ၏ဘုရားသို့” ဆိုသည့် စာအုပ်ကို ထုတ်ဝေမည်ဖြစ်ပြီး ပထမဆုံးအကြိမ် စာအုပ်မိတ်ဆက်ခြင်းအခမ်းအနားကို ချင်းပြည်နယ်၊ မတူပီမြို့ အမျိူးသမီးများအဖွဲ့ရုံး၌ ဖေဖော်ဝါရီလ (၂) ရက်နေ့တွင် ပြုလုပ်သွားမည်ဟု သိရသည်။

ကျား/မ (အမျိူးသားနှင့် အမျိူးသမီး) ရေးရာနှင့် ပတ်သက်သည့် သင်တန်းများတွင် ခရစ်ယာန်အချင်းချင်းကြား တွင် ကျားမတန်းတူမှုကို လက်မခံကြသည့် အဖြစ်အပျက်များ ကြုံတွေ့နေသည့်အတွက် သမ္မာကျမ်းစာကို ပြန်လည်လေ့လာ၍ ဆွေးနွေးနိုင်ရန် ရည်ရွယ်ပြီး ထုတ်ဝေရခြင်းဖြစ်သည်ဟု နေနူးအဖွဲ့ ဒါရိုက်တာ Mai Len Nei Cer ကပြောသည်။

“ကျမ်းစာကတော့ အမျိုးသားတွေကပဲရေးသားတာဖြစ်တယ် ဘာသာပြန်တဲ့လူတွေလည်း အမျိုးသားတွေပဲဖြစ်တယ်ပေါ့ အများသောအားဖြင့် ဘုရားကျောင်းတွေမှာ ခရစ်ယာန်အသိုင်းဝိုင်းတွေမှာ ပါစတာလည်း အမျိုးသားတွေပဲများတယ် အဲတာကို အမျိုးသမီးတွေအနေနဲ့ ဒီစာအုပ်တွေကိုလေ့လာခြင်းအားဖြင့် ဘုရားသခင်က တကယ်ကို ဘာပြောချင်လဲ သိလာလိမ့်မယ် ပြီးတော့ အသင်းတော်တွေထဲမှာ အမျိုးသမီးတွေခွဲခြားခံရတာပိုနည်းလာပြီးတော့ ကျားမတန်းတူ ညီမှု တွေလည်းရှိလာလိမ့်မယ်လို့ ကျွန်မတို့မျှော်လင့်ထားတယ်” ဟု Mai Len Nei Cer ကပြောသည်။

ယခုထွက်ရှိမည့် စာအုပ်တွင် ချင်းဓမ္မပညာရှင်၊ အမှုတော်ဆောင် ၁၉ ယောက်တို့၏ သမ္မာကျမ်းစာအား ဖီးမီးနစ် (ယောက်ျားများနှင့် တန်းတူအခွင့်အရေးရလိုသည့်အမျိူးသမီးဝါဒ ထောက်ခံအားပေးသူ) ရှုထောင်မှ လေ့လားထားသည့် အတွေးအမြင်များစုစည်းမှုတို့ပါဝင်မည်ဖြစ်သည်။

အဆိုပါ စာအုပ်ကို နယ်ဘက်တွင် အရင် ဖြန့်ချိမည်ဖြစ်ပြီး တစ်အုပ်ကို ကျပ် ၃၀၀၀ ဖြင့် ရောင်းချသွားမည်ဟု သိရသည်။

ချင်းအမျိူးသမီးအရေးလှုပ်ရှားသည့် နေနူးအဖွဲ့သည် “အိမ်ရှင်ဖြစ်ခွင့်မရှိသည့် ဧည့်သည်များ” ဆိုသည့် ချင်းဓလေ့ထုံးတမ်းများကို အမျိူးသမီးရှုထောင့်မှလေ့လာသည့် စာအုပ်ကိုလည်း ၂၀၁၈ ခုနှစ်တုန်းက ထုတ်ဝေခဲ့ပြီးဖြစ်သည်။

Share.

About Author

Leave A Reply