ချင်းပြည်နယ် ဟားခါးမြို့နယ်၏ နယ်မြေ စုစုပေါင်း ၉၀ ရာခိုင်နှုန်းကျော်ကို ထိန်းချုပ်နိုင်ပြီဟု ချင်းလဲန်ကာကွယ်ရေးတပ်ဖွဲ့ CDF-Hakha Council က စက်တင်ဘာလ ၁၇ ရက်နေ့က ထုတ်ပြန်လိုက်သည်။
မြန်မာနိုင်ငံတွင် စစ်တပ်က အာဏာသိမ်းပြီးနောက်ပိုင်း စစ်ကောင်စီတပ်ဖွဲ့နှင့် CDF-Hakha တပ်ဖွဲ့တို့အကြား တိုက်ပွဲပေါင်း ၁၀၃ ကြိမ်ဖြစ်ပွားခဲ့ပြီး စစ်ကောင်စီတပ်ဖွဲ့ဘက်က ၄၁၉ ဦးသေဆုံးခဲ့ပြီး ၁၉၀ ကျော်လည်း ဒဏ်ရာရရှိခဲ့သည်ဟု CDF-Hakha Council ၏ ထုတ်ပြန်ချက်တွင် ဖော်ပြထားသည်။
CDF-Hakha တပ်ဖွဲ့သည် ချင်းပြည်နယ်တွင် မြို့တွင်းစစ်ဆင်ရေး အများဆုံးဖော်ဆောင်သည့် တပ်ဖွဲ့ဖြစ်ပြီး စစ်အာဏာသိမ်းပြီးနောက်ပိုင်း မြို့တွင်းစစ်ဆင်ရေး အကြိမ်ပေါင်း ၅၀ ကျော် ပြုလုပ်ခဲ့သည်ဟု သိရသည်။
CDF-Hakha Council အနေဖြင့် တော်လှန်ရေးအရှိန်မြှင့်တင်ပြီး ပိုမိုတောင့်တင်းအင်အားကောင်းလာစေရေးအတွက် ဟားခါးမြို့နယ်ရှိ တော်လှန်ရေး အင်အားစုများမှ ကိုယ်စားလှယ်အယောက် (၃၀၀) ဦးတက်ရောက်ပါဝင်သော ညီလာခံ ကိုလည်း ပြီးခဲ့သည့်စက်တင်ဘာလ ၉ ရက်နေ့က ကျင်းပပြီးစီးခဲ့သည်။
ယင်းညီလာခံဆုံးဖြတ်ချက်အရ ချင်းလူမျိုးနင့် ချင်းပြည်သည် မတရားအာဏာရှင်အုပ်ချုပ်ရေးနှင့် လူမျိုးကြီးဝါဒ အုပ်ချုပ်ရေးမှ လွတ်မြောက်သည်အထိ တော်လှန်ရေးဆက်လက်ပြုလုပ်ရန်၊ ချင်းအမျိုးသားတပ်ဦး CNF/A နှင့် အတူတကွ လက်တွဲလုပ်ဆောင်သွားမည်ဟု သိရသည်။
CDF-Hakha Council သည် Mie ဒေသ၊ Senthang ဒေသ၊ Zokhua ဒေသနင့် ဟားခါးမြို့ပေါ်ဒေသ စသည့်ဒေသ (၄) ခုဖြင့် စုဖွဲ့ထားသည်နှင့်အညီ တော်လှန်ရေးကာလအတွင်း CDF-Hakha Council သည်သာ အဆိုပါဒေသ ၄ ခု၏ တရားဝင်ကိုယ်စားပြုသည့် အဖွဲ့ဖြစ်ပြီး အခြား မည်သည့်လက်နက်ကိုင်အဖွဲ့ (သို့) အုပ်ချုပ်ရေးအဖွဲ့မျှ ဖွဲ့စည်းခြင်းမပြုရဟု ၎င်းတို့၏ ထုတ်ပြန်ချက်တွင် ဖော်ပြထားသည်။
စစ်အာဏာသိမ်းပြီးနောက်ပိုင်း ဟားခါးမြို့နယ်တွင် စစ်ကောင်စီတပ်ဖွဲ့၏ မတရားဖမ်းဆီးခြင်းခံရသူ ၃၃၇ ဦးထိရှိခဲ့ပြီး ယင်းအနက် ၃၀၉ ဦးမှာပြန်လည်လွတ်မြောက်လာပြီဖြစ်ကာ ၂၈ ဦးမှာ မတရားဖမ်းဆီးချုပ်နှောင်ခြင်းခံကြရဆဲဟု CDF-Hakha Council က ဆိုသည်။
ထို့အပြင် စစ်ကောင်စီတပ်ဖွဲ့၏ လက်ချက်ကြောင့် အရပ်သားပြည်သူ ၆ ဦးသေဆုံးခဲ့ရပြီး နေအိမ် ၂၇ လုံး မီးရှို့ဖျက်ဆီးခံရသည့်အပြင် လက်နက်ကြီးရမ်းသမ်းပစ်ခတ်မှုကြောင့် နေအိမ် ၃ လုံးလည်း ပျက်စီးခဲ့ရသည်ဟု သိရသည်။
