(006SV)
ချင်းတော်လှန်ရေး လက်နက်ကိုင်အဖွဲ့အချင်းချင်းကြား မတူကွဲပြားသည့် သဘောထားအမြင်များ၊ ပဋိပက္ခများကို ငြိမ်းချမ်းသည့် နည်းလမ်းဖြင့် အမြန်ဆုံးအဖြေရှာကြရန် အမျိုးသားညီညွတ်ရေးအစိုးရ (NUG) ယာယီသမ္မ ဒူဝါလရှီးလက လေးနက်စွာ တိုက်တွန်းသည်။
ဇူလိုင်လ ၈ ရက် ရက်စွဲဖြင့် ချင်းအမျိုးသားတပ်ဦး (CNF/ CNA) ၊ ချင်းအမျိုးသားအဖွဲ့ချုပ် (CNO/ CNDF) နှင့် ချင်းကာကွယ်ရေးတပ်ဖွဲ့ – ဟွာလ်ငိုးရမ်းအဖွဲ့တို့ကို လိပ်မှုပြီး ပေးပို့သော စာတွင် ဖော်ပြထားသည်။
ချင်းလက်နက်ကိုင် တော်လှန်ရေးအဖွဲ့များအကြား မတူကွဲပြားမှုကို စစ်ရေးနည်းလမ်းဖြင့် အဖြေရှာရန် လုပ်ဆောင်မှုများကို သက်ဆိုင်ရာ ပါဝင်ပတ်သက်သည့် ချင်းလက်နက်ကိုင်အဖွဲ့အစည်းများအားလုံးက ချက်ခြင်းရပ်တန့်ရန် အမျိုးသားညီညွတ်ရေးအစိုးရ၊ နိုင်ငံသမ္မတရုံးက ပေးပို့သော စာတွင် တိုက်တွန်းသည်။
ချင်းလူထု တစ်ရပ်လုံး လိုလားသည့် ငြိမ်းချမ်းသော နည်းလမ်းဖြင့် နိုင်ငံရေး စားပွဲဝိုင်းတွင်သာ ညှိနှိုင်းအဖြေရှာကြရန် အမျိုးသားညီညွတ်ရေးအစိုးရက အထူးတိုက်တွန်းလိုသည်ဟု ဆိုသည်။
ချင်းပြည်နယ်အတွင်းရှိ လက်နက်ကိုင် တော်လှန်ရေး အင်အားစုများအကြား အမြန်ဆုံး ငြိမ်းချမ်းသည့် နည်းလမ်းဖြင့် အဖြေရှာနိုင်၍ စုစည်းညီညွတ်မှုကို ခိုင်ခိုင်မာမာ တည်ဆောက်ပြီး ချင်းလူထုအကျိုး၊ တော်လှန်ရေးအကျိုး ဆက်လက် သယ်ပိုးနိုင်ကြပါစေကြောင်း ထုတ်ပြန်သည်။
ဇူလိုင်လ ၄ ရက်မှစတင်၍ ချင်းတော်လှန်ရေး လက်နက်ကိုင်များဖြစ်သော CNF/ CNA ၊ HPO/ CDF – ဟွာလ်ငိုးရမ်း နှင့် CNO/CNDF တို့ကြာ တိုက်ပွဲများ ဖြစ်ပွားခြင်းနှင့် စစ်ရေးတင်းမာမှုများ ဆက်တိုက်ဖြစ်ပွားနေသည်ကို NUG အစိုးရမှ ဝမ်းနည်းဖွယ်ကြားသိရသည်ဟု ထုတ်ပြန်သည်။
တော်လှန်ရေးအင်အားစုများကြားတွင် ပဋိပက္ခများ၊ မတူကွဲပြားသည့် သဘောထားအမြင်များ ပေါ်ပေါက်လာပါက လက်နက်ဖြင့် မဖြေရှင်းဘဲ ငြိမ်းချမ်းစွာ ဆွေးနွေးအဖြေရှာသည့် နိုင်ငံရေး ယဉ်ကျေးမှုကို ကိုင်စွဲထားမှသာ တော်လှန် ရေးပန်းတိုင်ကို အရောက်လှမ်းနိုင်မည်ဟု ချင်းလက်နက်ကိုင်အဖွဲ့များကို NUG အစိုးရက သတိပေးသည်။
ယနေ့အချိန်အခါသည် ဘုံရန်သူဖြစ်သည့် စစ်ကောင်စီကို တိုင်းရင်းသားပြည်သူလူထု တစ်ရပ်လုံးမှ ဝိုင်းဝန်းတော်လှန် နေချိန်ဖြစ်သည့်အတွက် တော်လှန်ရေး အဖွဲ့အစည်းများအကြား စည်းလုံးညီညွတ်မှု၊ အပြန်အလှန် နားလည်ယုံကြည် မှုဖြင့် လက်တွဲခိုင်မာစွာ တည်ဆောက်ထားရမည့် အချိန်အခါဖြစ်သည်ဟု NUG အစိုးရက အသိပေးထုတ်ပြန်သည်။
ချင်းတော်လှန်ရေးအင်အားစုအချင်းချင်ကြား လက်နက်ဖြင့် ဖြေရှင်းမှုကို အမြန်ဆုံးရပ်တန့်ပြီး နိုင်ငံရေး နည်းလမ်းဖြင့် ဆွေးနွေး အဖြေရှာရန် နှင့် ပါဝင်ကူညီဆောင်ရွက်ပေးရန် အသင့်ရှိကြောင်း အမျိုးသားညီညွတ်ရေး အတိုင်ပင်ခံကောင်စီ – NUCC ကလည်း ဇူလိုင်က ၈ ရက်က အသိပေးထုတ်ပြန်ထားသည်။
