(006SV)
စစ်ကော်မရှင်က လာမည့်နှစ် ဇန်နဝါရီလထဲမှာ ကျင်းပမည့် ရွေးကောက်ပွဲ အပိုင်း ၂ တွင် ချင်းပြည်နယ်ရှိ မြို့များတွင် ကျင်းပနိုင်မည်မဟုတ်ကြောင်း ရွေးကောက်ပွဲကော်မရှင်က အောက်တိုဘာလ ၂၈ ရက်မှာ ကြေညာသည်။
ယခုနှစ် ဒီဇင်ဘာလ ၂၈ ရက်တွင် နိုင်ငံတဝန်းက မြို့နယ်ပေါင်း ၁၀၂ မြို့နယ်တွင် ရွေးကောက်ပွဲ အပိုင်း ၁ ကျင်းပပြီးနောက် ၂ ပတ်အကြာ ၂၀၂၆ ခုနှစ် ဇန်နဝါရီလ ၁၁ ရက်တွင် ရွေးကောက်ပွဲ အပိုင်း ၂ ကို ကချင်၊ ကယား၊ ကရင်၊ စစ်ကိုင်း၊ တနင်္သာရီ၊ ပဲခူးနှင့် မကွေးက မြို့နယ် ၁၀၀ တွင် ကျင်းပမည်ဟု ကြေညာသော်လည်း ချင်းနှင့် ရခိုင်က မြို့နယ်များ ပါဝင်လာခြင်း မရှိပေ။
“ထန်တလန်၊ တွန်းဇံ၊ ဖလမ်းက သူတို့ အပိုင်း ၂ လုပ်မယ့် ဇန်နဝါရီလ ၁၁ အထိ အသင့်မဖြစ်သေးဘူးလို့ ယူဆတဲ့အတွက် နောက်ဆုံးတတိယအသုတ်မှာ ထည့်မယ်လို့ တွက်ချက်ရပါတယ်၊၊ စစ်တပ်ကော်မရှင်က အဲဒီမြို့တွေကို အပိုင်း ၂ မှာ လုပ်မယ် လို့လည်း မကြေညာဘူး။ လုပ်လို့ မရဘူးဆိုတဲ့ မြို့နယ်တွေထဲကနေ ချန်ထားခဲ့တာပေါ့နော်။ သူက ရွေးကောက်ပွဲကို ၃ ပိုင်းလုပ်မှာ ဆိုတဲ့အတွက် နောက်ဆုံးအသုတ်မှာ လုပ်မယ့် အနေအထားပါဗျ” ဟု စစ်ရေးလေ့လာသုံးသပ် ဗိုလ်ကြီးဇင်ယော်က ပြောသည်။
စစ်တပ်က မြို့ပေါ်သာ ထိန်းချုပ်ထားနိုင်သည့် ဟားခါး၊ တီးတိန်တွင် ရွေးကောက်ပွဲ အပိုင်း ၁ ကျင်းပမည်ဟု ဩဂုတ်လက ကြေညာခဲ့ပြီး လက်ရှိတွင် ချင်းတပ်ဖွဲ့များ သိမ်းပိုက်ထားသော ဖလမ်း၊ တွန်းဇံ နှင့် ထန်တလန်မြို့တို့ကို ရွေးကောက်ပွဲ ကျင်းပမည့် စာရင်းထဲ ထည့်သွင်းထားသည်။
ရွေးကောက်ပွဲ ကျင်းပမည့် စာရင်းထဲက မြို့ ၃ မြို့ကို ရွေးကောက်ပွဲ အပိုင်း ၂ ထဲမှာ ထည့်သွင်း မထားခြင်းသည် ဖွဲ့စည်းပုံပြ ဌာန်းချက်အရ လတ်တလောမှာ မလိုအပ်သေး၍ ဖြစ်ကြောင်း ဖက်ဒရယ်ရေး လေ့လာသုံးသပ်သူ ဆလိုင်းရှိန်းထွန်းက ပြောသည်။
“အမှန်က အပိုင်း ၂ က ဖွဲ့စည်းပုံအရ မလိုတော့ဘူး။ သူက အပိုင်း ၁ မှာတင် လုံလုံလောက်လောက် အစိုးရဖွဲ့လို့ရတယ်။ ပြည်နယ်နဲ့တိုင်းမှာ ၂၀၀၈ ဖွဲ့စည်းပုံ ပြဌာန်းချက်အရက ပြည်နယ်ဝန်ကြီးချုပ်က ရွေးကောက်တင်မြှောက်ခံဖြစ်ဖို့ပဲ အရေးကြီး တယ်။ သမ္မတက ရွေးကောက်တင်မြောက်ခံ ဖြစ်ဖို့ ဆိုတဲ့ ပြဌာန်းချက် မရှိဘူး။ ပြည်ထောင်စုအပိုင်းကို ရည်စူးပြီးတော့မှ ပြည်သူ့လွှတ်တော်ကို အဓိက တည်ကစားတာဖြစ်လို့ ဗဟိုအစိုးရ ဖွဲ့လို့ရတာနဲ့ ပြည်နယ်နဲ့ တိုင်းမှာ ပြည်နယ်ဝန်ကြီးချုပ်တွေ ရွေးလို့ ရပြီ၊၊ ပေးထားချက် ဘောင်အတွင်းကနေ ရွေးကောက်ပွဲ ကျင်းပပြီး ကစားတာဖြစ်လို့ ကစားတဲ့ အခင်းအကျင်းကို ရွေးကောက်ပွဲ ကိုယ်စားလှယ်တွေက နားလည်ဖို့ အရေးကြီးတယ်” ဟု ဆလိုင်းရှိန်းထွန်းက ပြောသည်။
ချင်းပြည်နယ်က ပလက်ဝ၊ မတူပီ၊ ကန်ပက်လက်၊ မင်းတပ်မြို့နယ်တွင် ရွေးကောက်ပွဲ ကျင်းပနိုင်မည် မဟုတ်ကြောင်း စစ်ကော်မရှင်လက်အောက်ခံ ရွေးကောက်ပွဲ ကော်မရှင်က ကြေညာထားသည်။
