မတူပီစည်ပင်သတင်းနှင့် ပါတ်သက်ပြီး အယ်ဒီတာချုပ်ထံပေးစာ အပေါ် စည်ပင်အဖွဲ့မှ ပြန်လည်ရှင်းလင်းခြင်း

0

ခိုနုမ်းသုမ်ဂျာနယ်၏ ၂၀၁၃ခုနှစ် သြဂုတ်လထုတ် Vol.1,No.4  စာမျက်နှာ(၇)၊ ကော်လံ(၄)ပါ မတူပီဒေသခံတစ်ဦး၏ အယ်ဒီတာချုပ်ထံ ပေးစာနှင့်ပါတ်သက်၍ စာရေးသူကံယာကံရှင်နှင့် စာရှုသူများ အဖြစ်မှန်ကိုသိရှိစေလိုသောကြောင့် ပြန်လည်ဖြေရှင်း/ ရှင်းလင်းအပ်ပါသည်။

၁။       မတူပီမြို့ ရေပေးရေး ပိုက်လိုင်းအား Unicef အစီအစဉ်ဖြင့် လုံဟရောင်း(Lunghrang) ရေထွက်၊ရေစုကန်မှ ၃လက်မသံပိုက်ဖြင့် ထင်လှောင်စိမ်း(ThingLawngCeng) နေရာအထိ၊ ထင်လှောင်စိမ်းနေရာမှ  ယခင် မတူပီ – ပလက်ဝ ကားလမ်းဟောင်းအတိုင်း ယခု ကင်စိန်(Kinceng) မြေပြိုနေရာ အားဖြတ်၍ (၁.၅လက်မ၊ ၂လက်မ၊ ၂.၅ လက်မ)၊ (HDPE) ပိုက်များဖြင့်မြို့ပေါ် ရေလှောင်ကန်အရောက် သွယ်တန်းကာ  ရေသွယ်ယူခဲ့ပါသည်။

၂။       ယင်းပိုက်လိုင်းသည် လွန်ခဲ့သော(၆-၇)နှစ်ခန့်မှစ၍ ကင်စိန်နေရာတွင်နှစ်စဉ် မြေပြိုမှုဖြစ်ခဲ့သဖြင့် မြေပြိုဒဏ်ကြောင့် ရေပိုက်များမြေပြိုနှင့်ပါသွားပြီး ပိုက်များဆုံးရှုံးရခြင်း၊ ယင်းမြေပြိုနေရာ ပိုက်များပြင်ဆင်ရာတွင်လည်းပိုက်များနေရာချထားရန် ခက်ခဲခြင်းကြောင့် မြေပြို၏ တဖက်တချက်တွင် သံငုတ်များစိုက်ကာ ပေ(၁၂၀၀) ကျော်ရှိသံကြိုးများဖြင့် ရေပိုက်အား ကောင်းကင်ကြိုးတန်းသဖွယ် သွယ်ယူခဲ့ပါသည်။ သို့ရာတွင် ရေပိုက်ရှိရေ၏အလေးချိန်၊ဖိအားကြောင့် သံကြိုးပေါ်ရှိ ပိုက်များ အဆက်ပြုတ်ခြင်း၊ ပိုက်များကွဲခြင်းကြောင့် ပြုပြင်သည့်အခါများတွင် ခက်ခဲပြီး မြို့ပေါ်ရေဖြန့်ဝေမှုအား တစ်ပတ်၊ ၁၀ရက်ခန့် ရပ်ထားရသည်များ ရှိပါသည်။ ယင်းကဲ့သို့ပြင်ဆင်ရသည်မှာ နှစ်စဉ် မိုးရာသီနှင့်ဆောင်းရာသီ ဒီဇင်ဘာလကုန်ပိုင်း တစ်နှစ်လျှင် သုံးလေးကြိမ်မက ပြုပြင်ရသည့် အခြေအနေဖြစ်ပါသည်။ ပြင်ဆင်ရသည်မှာလည်း အသက်အန္တရာယ်များစွာ၊ အခက်အခဲများစွာ ကြားထဲက အဖွဲ့ဝန်ထမ်းများနှင့် လုပ်အားပေးသူများ အသက်နှင့်ရင်း၍ ပြင်ဆင်ရသည်ကို မြင်ဖူးသူ၊ ပါဝင်ဖူးသူများ သိရှိပါလိမ့်မည်ဖြစ်သည်။

၃။       အပိုဒ်(၂)ပါ အခက်အခဲများကြောင့် မြို့ရေသွယ်ပိုက်လိုင်းများအား လမ်းကြောင်းပိုမိုအဆင်ပြေသည့် အမှတ်(၃၀၄) ခြေလျင်တပ်ရင်း အရှေ့ဖက်တောင်ကြောအတိုင်း သွယ်တန်းရန် ယခင် မြို့မိမြို့ဖ၊ ဌာနဆိုင်ရာ၊ ရပ်ကွက်ရေးမှူးများနှင့် ဆွေးနွေးဆုံးဖြတ်ကာ (၅)မိုင်ခန့်ရှိသော ကင်စိန်မြေပြိုရှောင် ပိုက်လိုင်းသစ်အား ပြည်သူလူထုနှင့် ပူးပေါင်းပြီး သွယ်တန်း ခဲ့ပါသည်။ ယင်းရေပိုက်လိုင်းသစ်တွင် (၄လက်မ) ပီဗွီပိုက်များကို အသုံးပြု သွယ်တန်းခဲ့ခြင်းဖြစ်ပါ သည်။ အဆိုပါရေပိုက် များသည် တိုးချဲ့ရေပေးရေးလုပ်ငန်းအတွက် စည်ပင်သာယာရေးဦးစီးဌာနမှ ထောက်ပံ့ပေးသည့် ၁၀ပေ အရှည်ရှိသော ရေပိုက်များဖြစ်ပါသည်။

၎။       အဆိုပါရေပိုက်များသုံးစွဲရခြင်း အကြောင်းအား ဆက်လက်ရှင်းပြရမည်ဆိုပါက- မတူပီမြို့တိုးချဲ့ရေပေးရေးအတွက် သွယ်ယူမည့် ရေထွက်များမှ ရေများကို သွယ်ယူရန် ၄လက်မ ပိုက်များအစား မြို့မိမြို့ဖ အစီအစဉ်ဖြင့် မြို့နေပြည်သူလူထု ထံမှ တစ်အိမ်ထောင် (၅၀၀၀)ကျပ်စီဖြင့် ကောက်ခံကာ ၂လက်မ(၈.၅) ပီဗွီစီ ပိုက်များကို အစားထိုးဝယ်ယူခဲ့သောကြောင့် ယခုကဲ့သို့ ရေပိုက်လိုင်းအသစ်တွင် သုံးစွဲနိုင်ခြင်းဖြစ်ပါသည်။ မြို့ပေါ်မိသားစုများထံမှ ကျပ်ငွေ(၅၀၀၀)ကျပ်စီကောက်ခံခြင်း၊ ပိုက်သယ်ယူခြင်းနှင့် ပတ်သက်၍ စည်ပင်သာယာရေးအဖွဲ့မှ တစုံတရာပါဝင်ခြင်းမရှိပဲ လာရောက်ပေးအပ်သည့် ရေပိုက်များ ကိုသာ လက်ခံသုံးစွဲခဲ့ခြင်းဖြစ်ပါသည်။

၅။       ယင်းကဲ့သို့ ဆောင်ရွက်သည့် ၄လက်မ ရေပိုက်လိုင်းသစ်အား ထင်လှောင်စိမ်းနေရာတွင် ယခင်မူလ ၃လက်မ ပိုက်လိုင်းဟောင်းဖြင့်ဆက်ကာ (၁၂.၄.၂၀၁၃)ရက်နေ့မှစ၍ မြို့ပေါ်ရေလှောင်ကန်သို့ သွယ်ယူအသုံးပြုနိုင်ခဲ့ပါသည်။

၆။       ယင်းပိုက်ဆက်နေရာ (ထင်လှောင်စိမ်း)မှ လုံဟရောင်းရေစုကန်အထိ ၂မိုင်ခန့်ရှိသည့် ယခင် Unicef အစီအစဉ်ဖြင့် ဆောင်ရွက်သော ၃လက်မ သံပိုက်လိုင်းသည် အတက်အဆင်း (V)ပုံသဏ္ဍာန်ဖြစ်နေခြင်း၊ သက်တမ်းကြာမြင့်၍ သံပိုက် အဆက်များ ရေဖိအားဒဏ်ကို မခံနိုင်ခြင်းကြောင့် ပိုက်ဆက်နေရာများတွင် မကြာခဏပျက်စီးသဖြင့် ပြင်ဆင်ရာတွင် သံပိုက်နှင့် ပိုက်ဆက်အပိုပစ္စည်းများ အဖွဲ့တွင်မရှိခြင်းတို့ကြောင့်သော်လည်းကောင်း၊ ရေပိုက်အရွယ်အစား သေးငယ်မှု ကြောင့် ရေစုကန်အတွင်းရှိရေများ အကုန်စုပ်ယူနိုင်ခြင်းမရှိပဲ ယင်းရေကန်တွင် လျှံကျကာ မြို့ပေါ်ရေလှေင်ကန်သို့ ရေရောက်ရှိမှု နည်းပါးခြင်းတို့ကြောင့် မြို့နယ်စည်ပင်သာယာရေးအဖွဲ့နှင့် မြို့မိမြို့ဖများ၊ ဌာနဆိုင်ရာများ၊ ရေပေးရေးကော်မတီများ၊ ရပ်ကွက် အုပ်ချုပ်ရေးမှူးများနှင့်တိုင်ပင်ကာ ၄င်း ၃လက်မ ပိုက်လိုင်းအား အသုံးမပြုပဲ၊ ထို့ထက် ကောင်းမွန်မည့် ပိုက်လိုင်းအသစ်ဖြင့် သွယ်ယူပါက ပိုမိုသင့်တော်မည်ဟု ဆုံးဖြတ်ခဲ့ပြီး ၂မိုင်ခန့် အနက်မှ ရေစုကန်မှ ပေ(၄၅၀၀)အား လူထုမှပိုက်လမ်းများ တူးဖော်ပြီး ပိုက်ဆက်လုပ်ငန်းအား အဖွဲ့မှ ဆောင်ရွက်ခဲ့ပါသည်။ ကျန်ရှိသည့် ပိုက်လိုင်းအား လူထုမှ ပါဝင်ဆောင်ရွက်ရန် စိတ်အားထက်သန်မှု မရှိတော့သဖြင့် မြို့နယ်အုပ်ချုပ်ရေးမှူး ဦးဂိုဆွမ်းခိုင်၏ ကျပ်သုံးသိန်းတိတိ မတည်ငွေဖြင့် အဖွဲ့မှ ၂လခန့် အချိန်ယူဆောင်ရွက်ခဲ့ရပါသည်။

၇။       တင်ပြပါ ရေစုကန်နှင့်ထင်လှောင်စိမ်းကြား ရေပိုက်လိုင်းသစ်ဖြင့် ရေရောက်ရှိနိုင်ခြင်းရှိ/မရှိကို(၉.၅.၂၀၁၂) ရက်နေ့ တွင် ဌာနဆိုင်ရာများ၊မြို့မိမြို့ဖ၊ အသင်တော်လူကြီးတစ်ဦးတို့နှင့်အတူ မနက်(၁၀း၀၀)နာရီခန့်တွင် သွားရောက်စမ်းသပ် ကြည့်ရှုကြပါသည်။

၈။       ၈.၅.၂၀၁၃ရက်နေ့အထိမူလ(၃လက်မ)ပိုက်လိုင်းကိုသာ အသုံးပြုခဲ့ခြင်းဖြစ်ပြီး(၉.၅.၂၀၁၃)ရက်နေ့နံနက်ပိုင်းမှသာ ရေစုကန်မှပိုက်လိုင်းအသစ်သို့ ဆက်သွယ်ရေလွှတ်ခြင်းဖြစ်၍ ရေပိုက်လိုင်းကြောင်း ရှည်လျားမှုကြောင့် သွားရောက်စမ်းသပ် ကြည့်ရှုသည့်အချိန်တွင် ရေရောက်ရှိမှုမရှိသေးပဲ သွားရောက်ကြည့်ရှုသည့်အဖွဲ့များ ပြန်သွားပြီးမွန်းလွဲ(၁း၂၀)မိနစ်အချိန် တွင်သာ ရေရောက်ရှိလာပါသည်။ ယခုအချိန်အထိ ဤပင်မပိုက်လိုင်းအသစ်ကိုသာ အသုံး ပြုနေဆဲ ဖြစ်ပါသည်။

၉။       အပိုဒ်(၃)နှင့်အပိုဒ်(၆)ပါ လုပ်ငန်းသည် မတူပီမြို့ တိုင်းချဲ့ရေပေးရေးလုပ်ငန်း(ထောက်ပံ့လုပ်ငန်း)မဟုတ်ပဲ (လုံဟရောင်းရေစုကန်မှ မြို့ပေါ်ရေလှောင်ကန်အကြားရေပိုက်လိုင်းသစ် သွယ်တန်းခြင်းလုပ်ငန်းဖြစ်ကာ)မတူပီမြို့ မြို့မိ မြို့ဖများ၊ ဌာနဆိုင်ရာများ၊ ရပ်ကွက်အုပ်ချူပ်ရေးမှူးများနှင့်မတူပီမြို့ပေါ်ရှိအမြော်အမြင်ရှိသော ပြည်သူများ၏ စိတ်စေတနာသက်သက်ဖြင့် ဆောင်ရွက်အောင်မြင်ခဲ့သော လုပ်ငန်းသာဖြစ်ပါသည်။မတူပီမြို့ပေါ်တိုးချဲ့ရေပေးရေး စီမံကိန်း အတွက် စည်ပင်သာယာရေးဦးစီးဌာန(ရုံးချုပ်)ဗဟိုရန်ပုံငွေဖြင့် ဆောင်ရွက်မည့် လုပ်ငန်းမှာ ရေထွက်သစ်(၄)ခုမှ ရေများအား သွယ်ယူပြီး လုံဟရောင်း ရေစုကန်သို့ ပေါင်းထည့်ရန် ဆောင်ရွက်သည့်  လုပ်ငန်းဖြစ်ပါသည်။

၁၀။     သို့ဖြစ်၍ မတူပီမြို့ဒေသခံတဦး(တစ်ဦး)အမည်ခံ စာရေးသူအား သိရှိစေလိုသည်မှာ-

(က)    ၁၇.၅.၂၀၁၂ ရက်နေ့တွင် မည်သည့်ဖွင့်ပွဲမှ မပြုလုပ်ခဲ့ပါကြောင်း၊

(ခ)      ထင်လှောင်စိမ်းနေရာ ပင်မပိုက်လိုင်းတွင်မည်သည့် ရေပိုက်ဖွင့်/ပိတ်ခလုတ်ကိုမျှ ထားရှိတပ်ဆင်ခြင်း

မရှိပါကြောင်း၊

(ဂ)     အပိုဒ်(၉)ပါ လုပ်ငန်းအား မြို့နယ်စုံစမ်းစစ်ဆေးရေးအဖွဲ့မှ စစ်ဆေးခဲ့သည်မှာ မှန်ကန်သော်လည်း

“စည်ပင်မှူးက မျက်နှာပြောင်တိုက်ပြီး ယခုလိုဖွင့်ပွဲအခမ်အနားကို ပြုလုပ်တာပါ´´ ဆိုသည်မှာအထင် လွဲမှားခြင်းသာ ဖြစ်ပါကြောင်း၊

(ဃ)    မတူပီမြို့ပေါ်တိုးချဲ့ရေပေးရေးလုပ်ငန်းအတွက် အဖွဲ့အနေဖြင့် ပြည်သူလူထုထံမှ မည်သည့်ရန်ပုံငွေမျှ ကောက်ခံခြင်း မရှိပါကြောင်း၊

(င)     ရုံး၏လုပ်ငန်းနှင့်ပတ်သက်၍ သိရှိလိုသည်များ ဝေဖန်အကြံပြုလိုသည်များ ရှိပါက ပွင့်လင်းမြင်သာစွာ လာရောက် မေးမြန်းစုံးစမ်းနိုင်ပါကြောင်းနှင့် အကြံပြုချက်များကိုလည်း ကြိုဆိုလျက်ရှိပါကြောင်း၊

(စ)     မတူပီမြို့တိုးတက်စည်ပင်ရေးအတွက် ဌာနတစ်ခုတည်းဖြင့် မလုံလောက်ပါ။ အတွေးအခေါ်အမြော်အမြင်၊ အကြံကောင်းညဏ်ကောင်းရှိသည့် စေတနာရှင်မိဘပြည်သူများနှင့် ပေါင်းစပ်ညှိနှိုင်းဆောင်ရွက်မှသာ တို့မတူပီမြို့ကြီး တိုးတက်စည်ပင်မှာ ဖြစ်ပါကြောင်း ဖော်ပြအပ်ပါသည်။

                                                                  မြို့နယ်စည်ပင်သာယာရေးအဖွဲ့

                                                                              မတူပီမြို့

Share.

About Author

Comments are closed.