သန်းခေါင်စာရင်းနှင့် ချင်းအမျိုးသားရေး

0

Salai Van Lian Thang – မြန်မာတနိုင်ငံလုံးတွင် သန်းခေါင်စာရင်း ကောက်ခံနေပါတယ်။ မတ်လ ၃၀ ရက် ကစပြီး ဧပြီလ ၁၀ ရက်နေ့အထိ ၁၂ ရက်တိုင်တိုင် ကောက်ခံမှာဖြစ်တယ်။ ဗြိတိသျှ လက်အောက်တွင် ၁၈၇၂ မှ ၁၉၄၁ အထိ ၁၀နှစ်တစ်ကြိမ် ကောက်ယူခဲ့ပြီး၊ လွတ်လပ်ရေးရပြီးနောက်ပိုင်း ၁၉၇၃ နှင့် ၁၉၈၃ ခုနှစ်များတွင် ကောက်ခံဖူးပါတယ်။ ကုလသမဂ္ဂမှ နိုင်ငံတိုင်းတွင် ၁၀ နှစ်တစ်ကြိမ်ကောက်ခံရမည် ဟု ပြဌာန်း ထားပါ တယ်။ မြန်မာပြည်တော့ မလိုက်နိုင်ခဲ့ပါ။ ယခု နှစ်ပေါင်း ၃၀ ကြာပြီးမှ UNFPA အကူ အညီဖြင့် ပြန်လည်ကောက် ခံနိုင်တာဖြစ်ပြီး တိုင်းပြည်အတွက် မလုပ် မဖြစ် လိုအပ်တဲ့ အရာပါ။ ဒါပေမဲ့ နယ်ချဲ့  အစိုးရနှင့် စစ်အစိုးလက်ထက်တွင် ပြုစုခဲ့သော လူမျိုး ၁၃၅ စာရင်းဟောင်းကြီးကို အခြေခံကာ ပြန်လည်ကောက်ခံနေတာပါ၊ အဲဒါကိုက အဓိက ပြသာနာဖြစ်နေပါတယ်၊ မြန်မာ့အရေး ကျွမ်းကျင်သူ Bertil Linhter အဆိုအရ တပ်မတော် Lucky Number က ၉ ဖြစ်ပြီး၊ ၁+၃+၅ = ၉ တွက်ချက်ဖြင့် လူမျိး ၁၃၅ မျိုး သတ်မှတ်ခြင်းဖြစ်ကြောင်း၊ တပ်မတော်နေ့ ကိုလည်း ၂+၇ = ၉ တွက်ချက်ဖြင့် မတ်လ ၂၇ ရက်တွင် သတ် မှတ်သည်ဟု ရေးသားထားပါတယ်။

 

ဘယ်လိုပဲဖြစ်ဖြစ် အရေးကြီးတာက လူမျိုးစာရင်း မှန်ကန်ဖို့ အဓိကပါ။ ချင်းလူမျိုးကို မျိုးနွယ်စု ၅၃ မျိုး ခွဲခြားခံ ထားရသော်လည်း ပညာရှင် Gamanii အဆိုအရ ချင်းပြည်တွင် မျိုးနွယ်စု ၈ ခုထက် မပိုနိုင်ကြောင်း ဆိုထားပါတယ်။ တချို့ချင်းသမိုင်းပညာရှင်များ ကတော့ မျိုးနွယ်စု ၆ မျိုးသာ ချင်းပြည်တွင်ရှိသည်ဟု သတ်မှတ်ထားပါတယ်။ အမှန် စင်စစ် ချင်း ၅၃ မျိုးစာရင်းတွင် Tiddim နှင့် Zo ခွဲခြားသတ်မှတ်ခြင်း၊ Lusei နှင့် Hualngo သီးခြားဖော်ပြခြင်းများသည် မှားယွင်းပါတယ်။ Manipur ပြည်က Meitei (Kate)၊ Nepal ပြည်က Lhinbu လူမျိုးများ ချင်း မျိုးနွယ်စု စာရင်းတွင် ပါလာခြင်း သည်လည်း အဓိပ္ပါယ်မရှိပါ။ ထောက်ပြစရာ အများကြီပါ။ ဒါကြောင့် ချင်းပြည်သူများ အပါအ၀င် တိုင်းရင်းသား လူမျိုးများအားလုံး မကျေ မနပ်ဖြစ်ကြတာ သဘာဝကျပါတယ်။ သန်ခေါင်းစာရင်း မေးခွန်းလွှာတွင် မေးခွန်းပေါင်း (၄၁) ချက်ပါဝင်ပါတယ်။ ချင်းပြည် သူတွေ စဉ်းစားရမည့် အရေးကြီးတဲ့ အချက်က–

 

၁။ တစ်အိမ်တက် တစ်အိမ်ဆင်း အိမ်တိုင်ရာရောက် မေးမြန်း စာရင်းကောက်ယူမှာ ဖြစ်တယ်။ မိနစ် ၃၀ ခန့် ကြာမှာပါ။ မေးမြန်းသည့် မေးခွန်းများကို အမှန် အတိုင်း တိတိကျကျ ဖြေဆိုရန် လိုပါတယ်။ အိမ်ထောင်စုဇယား ရှိသည်ဖြစ်စေ၊ မရှိ သည်ဖြစ်စေ၊ နိုင်ငံသားကတ်ပြား ရှိထား သည်ဖြစ်စေ၊ မရသေးသည်ဖြစ်စေ၊ ဘာ ကတ်ပြားမှ မရှိရင်လည်း ကိစ္စမရှိပါ။ အားလုံးစာရင်း ကောက်ယူမှာဖြစ်တယ်။ အားလုံးပါဝင်ခွင့်ရှိပါသည်။ ပါဝင်ကြပါ။

 

၂။ ချင်းလူထုအတွင်း မျိုးနွယ်စု ကုတ်နံပါတ်တွင် ရေးသွင်းကြမည်လော၊ ချင်းဆို တဲ့ ကုတ်နံပါတ် 401 တခုတည်းတွင် ရေးသွင်းကြမည်လော၊ ရွေးစရာနှစ်ခုရှိပါတယ်။ပြသာနာက မျိုးနွယ်စု ကုတ်နံပါတ် တွင် ရေးသွင်းသူ မရှိပါက ၄င်း မျိုးနွယ်စုသည် အမျိုးပျောက် စာရင်းတွင် အလို လို ရောက်သွားမှာဖြစ်တယ်။ အဲဒီအတွက် မျိုးနွယ်စု တချို့ လုံးဝ အဖြစ်ခံနိုင်မည်မဟုတ်ပါ။ ဒါကြောင့် မျိုးနွယ်စု ကုတ်နံပါတ်တွင် ရေးသွင်းပါကလည်း ချင်း ဟု အလိုလို ရေတွက်ပြီးသားဖြစ်သည့်အတွက် ပြသာနာမရှိပါ။ မျိုးနွယ်စု ကုတ်နံပါတ်လည်း ရွေးနိုင်ပါတယ်။ သို့သော် ချင်း အမျိုးသားညီလာခံ ဆုံးဖြတ်ချက်အတိုင်း ချင်းလူမျိုးတိုင်း ချင်းကုတ်နံပါတ် 401 ကို ပထမ စဉ်းစားရန် လိုအပ်သည်။

၃။ လူမျိုး ၁၃၅ မျိုးတွင် မျိုးနွယ်စု နာမည်မရှိသူများအတွက် Other ဆိုတဲ့ ကုတ်နံပါတ် 914 ရှိုပြန်ပါတယ်။ ချင်းပြည်သူတွေ သတိထားရမည့်အချက်က Other စာရင်းမှာ ၀င်သွားရင် လူမျိုးမဲ့ ဖြစ်သွားနိုင်တဲ့ အချက်ပါပဲ။ လူဦးရေနည်းသော ချင်းလူမျိုးအတွက် သိပ်အန္တရာယ် ကြီးပါ တယ်။ ဒီဟာကို ချင်းပြည်သူတွေ လုံးဝ ရှောင်ကြဉ်ပြီး သတိထား ရန်လိုပါတယ်။ ဒါကြောင့် ချင်းလူမျိုး ၅၃ စာရင်းတွင် ကိုယ့်မျိုးနွယ်စု အမည် မပါပါက ချင်းဆိုတဲ့ ကုတ်နံပါတ် 401 တွင် ရေးသွင်းရန်လိုသည်။ ကုတ်နံပါတ် 914 ကို လုံးဝ ရှောင်ပါ။

 

၎။ မေးခွန်းလွှာတွင် နိုင်ငံခြားနေထိုင်သူ စာရင်းလည်း မေးပါတယ်။ အခုတလောနိုင်ငံခြားနေ ချင်းလူထုအကြား စာရင်း ပေးသင့်၊ မသင့် ငြင်းခုံကြပါတယ်။ အနာဂါတ်တွင် အန္တရယ်ရှိနိုင်သည်ဟု အချို့က ယူဆတယ်။ ကျနော်တော့ ဒီလို မမြင်ပါ။ ၂၀၁၃၊ ဇူလိုင် (၂၉) တွင် အတည်ပြု သည့် သန်းခေါင်စာရင်းဥပဒေအရ အချက်အ လက်များ ပေါက်ကြားမှု မရှိစေရေးနှင့် တစ်ဦးချင်းစီ၏ ပုဂ္ဂလိက အချက်အလက်များ လုံခြုံမှုရှိစေရေးအတွက် အခန်း (၇)၊ ဥပဒေ ပုဒ်မ (၂၇) ခုဖြင့် အကာအကွယ်ပေး ထားပြီးသားဖြစ်တယ်။ ကြောက်စရာ လုံးဝ မလိုပါ။ UNFPA နှင့် နိုင်ငံတကာ မိသား စုလည်း သက်သေအဖြစ်ရပ်တည်နေပါတယ်။ နိုင်ငံခြားနေထိုင်သူများအားလုံး စာရင်းပေးသွင်းခြင်းသည် ချင်းလူမျိုးအတွက် သာမက ပုဂ္ဂလိက အတွက်ပါ အနာဂတ်တွင် ပိုပြီး အကျိုးရှိနိင်သည်ဟု မြင်ပါသည်။

 

၅။ ဖွဲ့စည်းပုံအခြေခံဥပဒေအရ လူမျိုးစုတစ်စုသည် မြန်မာပြည် စုစုပေါင်းလူဦးရေရဲ့ 0.001 {241d12fcbf432557e829f91c0d6fd86903ac3e7007e1df33a0cc395ea774cb24} အရေအ တွက်ရှိမယ်ဆိုရင် လွှတ်တော်မှာ နေရာရမယ်၊ တိုင်းရင်းသားရေး ရာ ဝန်ကြီးတစ်နေရာမှာဖြစ်ပါတယ်။ ယခု မြန်မာပြည်တွင် ချင်းတိုင်းရင်းသား ၀န်ကြီး သုံးနေရာ ရှိပါတယ်။ သိုသော် မကွေးတိုင်း၊ ရခိုင်ပြည်၊ စစ်ကိုင်းတိုင်းတွင် နေထိုင်သူ ချင်းလူမျိုးများသည် ချင်းနာမည်ကို ငြင်းပယ်ပြီး၊ ချင်း ကုတ်နံပါတ်များတွင် မရေးသွင်း ချင်ကြပါက ရပြီးသား ၀န်ကြီးနေရာများကိုပါ ပြန်လည် ဆုံးရုံးသွားနိုင်ပါတယ်။ ချင်းနာမည်အောက်တွင် စည်းလုံးစွာ ရေးသွင်းကြပါက ၀န်ကြီး သုံးနေရာအပြင် ထပ်လည်း တိုးနိုင်ပါသည်။ ဥပမာ၊ ရန်ကုန်တိုင်း။

 

ဒါကြောင့် ပြည်တွင်းပြည်ပ ချင်းပြည်သူတရပ်လုံး ချင်းဆိုသော ကုတ်နံပါတ် ဒါမှမ ဟုတ် ချင်းမျိုးနွယ်စု ကုတ်နံပါတ် တခုခုတွင် စည်းလုံးစွာ မပျက်မကွက် နာမည် စာရင်း ရေးသွင်းခြင်းသည် အရေးကြီးသော ချင်းအမျိုးသားရေး ဖြစ်ပါသည်။

Share.

About Author

Leave A Reply