မြေနိမ့်ရာ လှံစိုက်နေသည့် ချင်းပြည်နယ်အစိုးရလား

0

ဆလိုင်းရောဘတ်

 

ချင်းပြည်နယ်သည် မြန်မာနိုင်ငံ တိုင်းနှင့်ပြည်နယ် ၁၄ ခုအနက် ဖွံ့ဖြိုးမှုအနိမ့်ကျဆုံးပြည်နယ်ဟု ဆိုရပေမည်။ ယခု ကဲ့သို့ အဆင်းရဲဆုံး နှင့်ဖွံ့ဖြိုးမှု အနိမ်ကျဆုံးပြည်နယ် ဖြစ်သည့် ချင်းပြည်နယ်တွင် မြို့နယ်ပေါင်း ၉ မြို့နယ် ရှိသည့်အနက် ကန်ပက်လက်မြို့ နယ် သည်ဖွံ့ဖြိုးမှုအနိမ့်ကျဆုံးမြို့ နယ်ဟု ဆိုရပေမည်။

 

ထင်သာမြင်သာရှိသော အကြောင်းအရာတစ်ခုကို တင်ပြမည်ဆိုပါက Information Technology ဟုခေါ်ဆိုသော ယနေ့  ချိန်ခါလို အိုင်တီခေတ်မှာပင်ချင်းပြည်နယ်တောင်ပိုင်းတွင်တည်ရှိသော ကန်ပက်လက်မြို့ပေါ်၌ အင်တာနက်
ဆိုင်လေး တစ်ဆိုင်မျှပင် မရှိသေးပေ။

 

ကန်ပက်လက်မြို့ပေါ်မှ ကျောင်းသားလူငယ် များသည် အင်တာနက်  အသုံးပြုချင်ပါက ကန်ပက် လက်မြို့ တောင်ခြေ ရင်းတွင်တည်ရှိသော မကွေးတိုင်း ဆောမြို့တွင် အသုံးပြု ကြရသည်။

 

၂၀၁၀ ရွေးကောက်ပွဲတွင် ကန်ပက်လက်မြို့နယ်မှ ရွေးချယ်ခံရသော ကြံ့ဖွံ့ပါတီမှ လွှတ်တော်ကိုယ်စားလှယ်အမတ် မင်းများရှိနေပါသော်လည်း ကန်ပက်လက်လူထုမှ ၎င်းတို့ကိုယ်စားရွေးချယ်ကြသော ယင်းအမတ်မင်းများသည် ယနေ့ ချိန် ထိ ဒေသဖွံ့ဖြိုးရေး အတွက် မယ်မယ်ရရ ဘာတစ်ခုမျှအကောင်အထည်ဖော်ဆောင်ပေးခြင်းမတွေ့ရသေးပေ။

ကန်ပက်လက်မြို့သည် လမ်းပန်းဆက်သွယ်ရေးခက်ခဲပြီး ဝေးလံခေါင်ဖျားဒေသတွင် တည်ရှိသည်သာမက ဆက်သွယ် ရေး(ဖုန်း၊ အင်တာနက်) အလွန်ခက်ခဲသော ဒေသဖြစ်သည့်အတွက်ကြောင့် ချင်းပြည်နယ် အစိုးရ တာဝန်ရှိသူများ၊ ချင်း နိုင်ငံရေး ပါတီ များ၊လွှတ်တော်ကိုယ်စားလှယ်များ၊ ပြည်တွင်း၊ ပြည်ပ အဲန်ဂျီအိုများသည်လည်း တစ်နှစ်တစ်ခါပင် ပုံမှန် မရောက်နိုင်ကြပေ။

 

သတင်းမီဒီယာများအနေဖြင့် ဆက်သွယ်ရေးခက်ခဲမှုများကြောင့် ယင်းဒေသတွင် ဖြစ်ပျက်နေသော အခြေအ နေများကို ဒေသတွင်း နှင့် နိုင်ငံတကာမှ အချိန်မှီသိရှိနိုင်ရန် မစွမ်းနိုင်ခဲ့ကြပေ။ယင်းကဲ့ သို့ အစစအရာရာ အခြားမြို့နယ်များထက် အား နည်းသော ကန်ပက်လက်မြို့နယ်တွင် ချင်းပြည်နယ် ၀န်ကြီးချုပ် ၏ မြေနိမ့်ရာ လှံစိုက် သည့် ဖြစ်ရပ် မကြာသေးခင်က ပေါ်ပေါက်ခဲ့ပြန်သည်။

 

ကန်ပက်လက်မြို့နယ်အတွင်းရှိ ကြက်ခြံကျေးရွာသည် လွန်ခဲ့သည့် ၂၀၁၂ ခုနှစ်ကမြေပြိုမှု ကြောင့် ကျေးရွာတွင် ဆက် လက်နေထိုင်ရန် စိုးရိမ်ရသည့်အတွက်ရွာလူထုမှ အစည်းအဝေးကျင်းပကာ ကန်ပက်လက် ၊ မင်းတပ်ကြား ၄ မိုင် ၅ ဖာလုံနှင့် ၅ မိုင် ၅ ဖာလုံကြား ရွာသစ်ပြောင်းရွှေ့ရန် ဆုံးဖြတ်ခဲ့ကြသည်။

 

ချင်းပြည်နယ် သစ်တောရေးရာနှင့် သတ္တုဝန်ကြီး ဦးကျော်ငြိမ်း၊ စည်ပင် သာယာရေးဝန်ကြီး ဦးနိန်းနိုင်းနှင့် အဖွဲ့ ကြက်ခြံရွာဟောင်းသို့ (၇-၂-၂၀၁၃) နေ့ လာရောက်ကွင်းဆင်းပြီးမပြောင်းမ ဖြစ် ပြောင်းရွှေ့ရန် လမ်းညွန်ကြ သဖြင့် ကျေးရွာလူထု မှရွေးချယ်သောမြေနေရာတွင်ပြောင်းရွှေ့ရေး ပြန်လည်တင်ပြကြရာ ၎င်းနေရာသည် နတ်မ တောင်ဥ ယျာဉ်၏ အသဲနှလုံးဖြစ်သည်ဟု ကန့်ကွက်ကြပြီး နတ်မတောင်ဥယျာဉ်၏အလယ်ဗဟိုမဟုတ် သော အစွန် အဖျားတွင် ရွာတည်ခွင့်ပြုမည်ဟု ကတိပေးခဲ့ကြပါသည်။

 

ရွာသစ်တည်မည့်နေရာအား ဌာနဆိုင်ရာများမှ ရွေးချယ်အသိအမှတ်ပြုပေးကြရန် ၀န်ကြီး ၂ ဦးမှ ညွန်ကြား သည့် အတိုင်း ကန်ပက်လက်နတ်မတောင်ဥယျာဉ်အုပ်ချုပ်ရေးမှူးနှင့်အဖွဲ့(၆)ဦးကြက်ခြံကျေးရွာအုပ်စု နယ်နိမိတ်ဖြစ်သော ယခုကြက်ခြံရွာ သစ်နေရာ အားပြန်လည်အစားထိုးပေးကြသဖြင့် ယခုအခါအိမ်ခြေ (၄၀) ခန့်ပြောင်းရွှေ့နေထိုင် လျက် ရှိကြ သည်။

 

ကြက်ခြံရွာသားများ၏ပြောဆိုချက်များအရ ချင်းပြည်နယ်ဝန်ကြီးချုပ်ဦးဟုန်းငိုင်းသည် ၂၀၁၃ ခုနှစ်အောက်တိုဘာလ ၁၇ ရက်နေ့က ၀န်ကြီးချုပ် နှင့် လက်နက်ကိုင်ပြည်သူ့ရဲများကြက်ခြံကျေးရွာသို့ ရောက်ရှိ လာပြီး ယခုရွာသစ် တည်သည့်နေရာသည် စည်ပင်ဧရိယာဟူ၍၎င်း၊ နတ်မတောင်ဥယျာဉ်သစ် ဧရိယာဟူ၍၎င်း၊ မတရားစွပ် စွဲကာနေ အိမ်များကို တစ်ပတ်အတွင်း ဖျက်သိမ်းရန်ပြောဆိုခြိမ်းခြောက်ကာမဖျက်သိမ်းပါ က နေအိမ်များ ကိုပါ မီးရှိူ့ဖျက် ဆီးမည်ဟုကြိမ်းဝါးပြောဆိုခဲ့သည်

 

ထို့အပြင် ၀န်ကြီးချုပ်က ကြက်ခြံကျေးရွာအုပ်စု၊ ကြက်ခြံရွာကို နောင်အခါမည်သည့်အခွင့်အရေးမှ မပေးတော့ဘူးဟု အာဏာရှင်ဆန်ဆန်ပြောဆိုခဲ့သေးကြောင်း၊ ကြက်ခြံရွာသစ်ပြောင်းရွှေ့ရေးတွင် ဦးဆောင်ပါဝင်ခဲ့သောအုပ်စုစာရေး ဦးတမ်လိန်းအား ကန်ပက် လက်မြို့မှ ချင်းပြည်နယ်အထက်ပိုင်းဖလမ်းမြို့သို့ ပြောင်းရွှေ့ပစ်ခဲ့သည်ဟု သိရသည်။

 

ကြက်ခြံကျေးရွာအုပ်စုတွင် ယနေ့ချိန်ထိ အုပ်စု စာရေး ပြန်လည်ချထားပေးခြင်းမရှိသဖြင့်ပြည်လုံး ကျွတ် သန်း ခေါင်းစာရင်းကောက်ခံချိန်၌လည်း ကျေးရွာအုပ်ချုပ်ရေးမှူးနှင့် ကျောင်းဆရာ၊ဆရာတို့သည် အခက် အခဲ များကြုံ တွေ့ခဲ့ရ သည်ဟုကြက်ခြံရွာ သားမျာပြောဆိုချက်များအရသိရှိရသည်။

ဝန်ကြီးချုပ်၏ ခြိမ်းခြောက်မှုများကြောင့် ကြက်ခြံကျေးရွာမှ ရွာသား(၄)ဦးတို့သည် နိုင်ငံခြားသို့ ထွက်ပြေးခဲ့ရ သည်ဟုလည်းသိရသည်။ ၀န်ကြီးချုပ် နှင့် လက်နက်ကိုင်ပြည်သူ့ရဲများသည် ၂၀၁၄ ဖေဖော်ဝါရီလ ၂ရက် နေ့က ကြက်ခြံ ကျေးရွာသို့ ထပ်မံ သွားရောက် ကာ ကြက်ခြံကျေးရွာတွင်ကျန်ရှိနေသေးသော ရွာသားများ ကို လည်း လက်နက်ဖြင့်ခြိမ်း ခြောက်ကာနေအိမ်များ ဖျက်သိမ်းရန်ထပ်မံသတိပေးခဲ့ပြန်သည်။

 

ဝန်ကြီးချုပ်က ရွာသားများထံ “ ကျနော်ပိုင်တဲ့နယ်မြေကိုနိုင်ငံတော်သမ္မတကြီးက မင်းတို့ကိုပေးရင်တောင် ငါက ခွင့်မပြုဘူး၊သမ္မတကြီးမကလို့ သကြားမင်းကြီးကပေးရင်တောင် ငါချင်းပြည်နယ်ဝန်ကြီးချုပ်ကခွင့်မပြုဘူး၊ မကျေ နပ်ပါက နိုင်ငံ တော် သမ္မတမကလို့ ကမ္ဘာ့ကုလသမဂ္ဂအထိတိုင်ကြငါမပြုတ်ဘူး’’ ဟု ကြုံးဝါးခဲ့ သည်ဟု သိရသည်။

 

ကြက်ခြံကျေးရွာရှိ နေအိမ်များမဖျက်သိမ်းပါကကျေးရွာအုပ်ချုပ်ရေးမှူးအပါအ၀င် ကျေးရွာလူထု (၈၀) ဦးတို့ အား (၃၆ – ဂ၊ခ) ပုဒ်မအရ အမှုဖွင့်ကာ ထောင်ထဲထည့် မတရားနှိပ်စက်မည်ဟု ပြောခဲ့သည်။ ထို့ နောက် ၂၀၁၄ ဧပြီလ ၁၁ ရက်နေ့တွင် ကြက်ခြံကျေးရွာရှိကျောင်းဆရာနေအိမ်တစ်လုံး ဖျက်ဆီးခံခဲ့ရသည်ဟုကြက်ခြံရွာ သားများက ပြောသည်။

ဆင်းရဲနွမ်းပါးသော ကျေးရွာလူထုများကို ယခုကဲ့သို့ ရင့်သီးကြမ်းတမ်းသောစကားများဖြင့် ပြောဆိုခြင်းသည် ပြည်နယ် ၀န်ကြီးချုပ်ရာထူးဂုဏ်သိက္ခာ နှင့်ဘယ်လိုမှ အပ်စပ်မှုမရှိပေ။ ပြည်နယ်တစ်ခု၏ အမြင့်ဆုံး ရာထူးကို လက်ခံထားသော
ဦးဟုန်းငိုင်း လုပ်ရပ်များ သည် ၀န်ကြီးချုပ် တစ်ဦးမှ ပြုမူရမည့်လုပ်ဆောင်ချက်မျိူး နှင့်မတူတော့ဘဲ စစ်မြေပြင်ကို ရောက် စစ်သားတစ်ဦး၏ စရိုက်လက္ခဏာကဲ့သို့ပင်ဖြစ်နေပေသည်။

 

ယခုကဲ့သို့ ချင်းပြည်နယ် ၀န်ကြီးချုပ်၏ အာဏာရှင်ဆန်ဆန်လုပ်ရပ်များချင်းပြည်နယ်အတွင်း ဖြစ်ပေါ်နေခြင်းသည် ဒီမိုကရေစီအုပ်ချုပ်မှုစနစ်စတင်ကျင့်သုံး နေပြီဟု ကြွေးကျော်နေသောဦးသိန်းစိန်အစိုးရ အပေါ် မေးခွန်း ထုတ်ရ တော့မည်ဖြစ်သည်။

Share.

About Author

Leave A Reply