ပလက်ဝ၏ တည်ငြိမ်ရေးနှင့် ဖွံ့ဖြိုးရေးလုပ်ငန်း အဟန့်အတားမလုပ်ဖို့ AA ကို ချင်းအရပ်ဖက် လူမှုအဖွဲ့အစည်းကွန်ယက်တောင်းဆို

0

ချင်းပြည်နယ်တောင်ပိုင်း ပလက်ဝမြို့နယ်၏ တည်ငြိမ်အေးချမ်းနှင့် ဒေသဖွံ့ဖြိုးရေးလုပ်ငန်းများ အဟန့်အတားဖြစ်စေသော လုပ်ရပ်များကို လုံးဝပြုလုပ်ခြင်းမပြုရန် ရခိုင်လက်နက်ကိုင်တပ်ဖွဲ့ (AA) ကို ချင်းအရပ်ဖက်လူမှုအဖွဲ့အစည်းကွန်ယက်က ယနေ့တောင်းဆိုလိုက်သည်။

ချင်းတိုင်းရင်းသားများနှင့် ရခိုင်တိုင်းရင်းသားများသည် ရှေးယခင်ကတည်းက ချစ်ခင်ရင်းနှီးစွာ အတူတကွ ယှဉ်တွဲနေထိုင်ခဲ့ကြသည်ကို အသိအမှတ်ပြုပြီး ပလက်ဝမြို့နယ်တွင် AA လက်နက်ကိုင်အဖွဲ့၏ လုပ်ရပ်များကို နားလည်သည်းခံခဲ့ကြသော်လည်း ပလက်ဝ၏ တည်ငြိမ်အေးချမ်းရေးနှင့် ဖွံ့ဖြိုးရေးလုပ်ငန်းများကို အဟန့်အတားဖြစ်စေသည့် လုပ်ရပ်များ ပြုလုပ်လာသည့်အတွက် နောင်တွင် လုံးဝပြုလုပ်ခြင်းမပြုရန် ယနေ့နေ့စွဲဖြင့်ထုတ်ပြန်သော ချင်းအရပ်ဖက်လူမှုအဖွဲ့အစည်းကွန်ယက်၏ ထုတ်ပြန်ကြေညာချက်တွင် ဖော်ပြထားသည်။

“AA က ချင်းပြည်နယ်ကို မတည်ငြိမ်အောင်လုပ်နေတယ်၊ ဖွံ့ဖြိုးရေးလုပ်ငန်းတွေကိုလည်း အဟန့်အတားဖြစ်စေတယ်၊ ကျနောတို့လိုလားတာက ချင်းပြည်နယ်တည်ငြိမ်းအေးချမ်းရေးဖြစ်တယ်၊ အထူးသဖြင့် ပလက်ဝဒေသက ဝေးလံခေါင်းပါးတဲ့ဒေသဖြစ်တယ်၊ ဖွံ့ဖြိုးရေးစီမံကိန်းတွေ များများလုပ်ပေးဖို့ လိုအပ်နေတဲ့အချိန်မှာ မြစ်ကူးတံတားကိစ္စတွေ၊ ဘက်စုံစီမံကိန်းတွေလုပ်နေတဲ့အချိန်မှာ အဟန့်အတားဖြစ်စေတဲ့ကိစ္စကို ကျနော်တို့ လုံးဝမလိုချင်ဘူး၊ AA က ချင်းပြည်နယ်ကို အနှောက်အယှက်မပေးဖို့ တောင်းဆိုပါတယ်’’ ချင်းအရပ်ဖက်လူမှုအဖွဲ့အစည်းကွန်ယက် ဦးဆောင်သူ ဦးယာကုတ်ထန်ကပြောသည်။

AA တပ်ဖွဲ့သည် ပြီးခဲ့သည့် မတ်လအတွင်းက ပလက်ဝမြို့တွင် တည်ဆောက်လျက်ရှိသော ကုလားတန်မြစ်ကူးတံတာအတွက် အသုံးပြုမည့် တံတားသံဘောင် တန်ချိန် (၃၀၀) ကျော်တင်ဆောင်လာသည့် သင်္ဘောကို မီးရှို့ဖျက်ဆီးခဲ့သည်။

ထို့အပြင် ကုလားတန်ဘက်စုံဖွံ့ဖြိုးရေးစီမံကိန်း၏ အစိတ်အပိုင်းတစ်ခုဖြစ်သော နယ်စပ်ကားလမ်းဖောက်လုပ်သည့် ဆုထူးစံကုမ္ပဏီဝန်ထမ်း (၈) ဦးကိုလည်း ဖမ်းဆီးခဲ့သည့်အတွက် လုပ်ငန်းများ ယာယီရပ်ဆိုင်းထားရသည့် အနေအထားဖြစ်နေသည်။

ပလက်ဝမြို့နယ် တည်ငြိမ်အေးချမ်းရေးနှင့် ဖွံ့ဖြိုးရေးလုပ်ငန်းများ ဆက်လက်ဆောင်ရွက်နိုင်ရန် နိုင်ငံတော်အစိုးရမှ ကြိုးပမ်းဆောင်ရွက်ပေးရန်နှင့် AA နှင့် တပ်မတော်အကြားတိုက်ပွဲကြောင့် ထွက်ပြေးတိမ်းရှောင်နေကြရသည့် စစ်ဘေးဒုက္ခသည်များကိုလည်း လူသားချင်းစာနာထောက်ထားမှုအကူအညီများ ဆက်လက်ထောက်ပံ့ပေးကြရန် ချင်းအရပ်ဖက်လူမှုအဖွဲ့အစည်းကွန်ယက်ကတောင်းဆိုထားသည်။

ချင်းအရပ်ဖက်လူမှုအဖွဲ့အစည်းကွန်ယက်သည် ​၂၀၁၄ ခုနှစ်က အဖွဲ့ဝင်ပေါင်း (၁၀၀) ကျော်ဖြင့် ဖွဲ့စည်းသည့်အဖွဲ့အစည်းဖြစ်သည်။

Share.

About Author

Leave A Reply

*

code