ချင်းပြည်နယ် မင်းတပ်မြို့တွင် စစ်ကောင်စီမှဖွင့်လှစ်သော ကျောင်းများတွင် သင်ကြားလျက်ရှိသော ကျောင်းဆရာ/ဆရာမ ၉၀ ကျော်ကို စစ်ကောင်စီနှင့် ပူးပေါင်းဆောင်ရွက်သော အမျိုးသားသစ္စာဖောက်အမည်ပျက်များအဖြစ် ပထမအကြိမ် မှတ်တမ်းစာရင်းထည့်သွင်း ကြေညာလိုက်သည်ဟု မင်းတပ်မြို့နယ် ပြည်သူ့အုပ်ချုပ်ရေးအဖွဲ့က သြဂုတ်လ ၂၄ ရက်နေ့က ထုတ်ပြန်သည်။
သြဂုတ်လ ၂၀ ရက်နေ့က ကျင်းပပြုလုပ်သော မင်းတပ်မြို့နယ် ပြည်သူ့အုပ်ချုပ်ရေးအဖွဲ့၊ CDF-Mindat ပညာရေးဘုတ်အဖွဲ့ (ပအဖ) နှင့် MUSU အဖွဲ့တို့ တွေ့ဆုံညှိနှိုင်းအစည်းအဝေးဆုံးဖြတ်ချက်အရ မင်းတပ်မြို့ပေါ်ရှိ အ.ထ.က (၁)၊ အ.ထ.က (၃) နှင့် အ.ထ.က (ခွဲ) တပ်မြေကျောင်းများတွင် စာသင်ကြားပေးနေသော ဆရာ/ဆရာမ (၉၅) ကို အမျိုးသားသစ္စာဖောက် အမည်ပျက်စာရင်းအဖြစ် ကြေညာခဲ့ကြခြင်းဖြစ်သည်။
မင်းတပ်မြို့နယ်အတွင်းရှိ စစ်ကောင်စီနှင့်ပူးပေါင်းသော အခြားသော ဌာနဆိုင်ရာဝန်ထမ်းများကိုလည်း အမည်ပျက်စာရင်းအဖြစ် ဆက်လက်ကြေညာသွားမည်ဟု မင်းတပ်မြို့နယ် ပြည်သူ့အုပ်ချုပ်ရေးအဖွဲ့ ထုတ်ပြန်ထားသည်။
