(04SS)
စစ်ကိုင်းတိုင်း၊ တမူးမြို့ အနီးတဝိုက်တွင် တိုက်ပွဲများဖြစ်ပွါးခဲ့ခြင်းကြောင့် ကလေး-တမူး အာရှလမ်းမအား ဖြတ်သန်းသွားလာ၍မရသည်မှာ တစ်လကျော် ကြာမြင့်လာပြီဖြစ်ပြီး တမူးမြို့ပေါ်သို့ စားသောက်ကုန် စီးဆင်းနိုင်ရန် ဆိုင်ကယ်များအား အဓိက အသုံးပြုနေရကြောင်း ဒေသခံများထံမှ သိရသည်။
ယခုတွင် အခြေခံကုန်ပစ္စည်းများအား ဆိုင်ကယ်ဖြင့် သယ်ယူနေကြသောကြောင့် ယခုတွင် ကုန်စျေးနှုန်းများ ယခင်ကထက် အနည်းငယ် ပြန်လည်သက်သာလာသည်ဟု ဒေသခံတစ်ဦးက ပြောသည်။
“အခုကတော့ ဆိုင်ကယ်တေနဲ့ပဲ ပစ္စည်းတွေ သယ်နေကြရတယ်ပေါ့၊ ကားတေလဲရှိတော့ရှိမှာပေါ့နော် ဒါပေမဲ့ ဆိုင်ကယ်နဲ့သယ်တာ ပိုများတယ်။ အခုက အရင်လောက်မဟုတ်ပေမဲ့ ပစ္စည်းတွေရောက်ပါတယ်။ ပြီးတော့ လမ်းက တမူး-ဘုတ်ကန်-ကလေး ပေါ့နော် အဲလိုနဲ့ မိုးရေးဘက်ကနေဝင်တာပေါ့။ ဂိတ်တွေတော့ပိုက်ဆံ ပေးရတယ်လို့လဲကြားတယ်။ အဲဒီ ကယ်ရီဆွဲတဲ့ ဆိုင်ကယ်တွေကလဲ အိန္ဒိယကဒ်ရှိတဲ့သူတွေပဲ သွားလာလို့ရတာ မရှိရင်တော့မရဘူး” ဟု ဒေသခံတစ်ဦးက ပြောသည်။
လွန်ခဲ့သည့် ဇွန်လလယ်ပိုင်းမှစတင်ကာ တမူးမြို့ပေါ်သို့ ကားအဝင်/အထွက်လမ်းများ ပိတ်ထားခြင်းကြောင့် ကုန်စီးဆင်းမှု နည်းပါးလာပြီး မြို့တွင်းကုန်စျေးနှုန်းများ အဆမတန် မြင့်တက်ခဲ့သည့်အပြင် အချို့စားသောက်ကုန်များ ပြတ်လပ်နေခြင်းများ ရင်ဆိုင်ခဲ့ရသည်။
ယခုလက်ရှိ တမူးမြို့ပေါ်တွင် အခြေခံသုံး ကုန်ပစ္စည်းစျေးနှုန်းများ အနည်းငယ်သက်သာလာပြီဟု သိရပြီး ဟင်းသီးဟင်း ရွက်များမှာမူ စျေးအသင့်အတင့် တက်နေသေးကြောင်း သိရသည်။
ယခင်ဇွန်လအတွင်း လမ်းပိတ်ခါစတွင် ဓါတ်ဆီ လိုအပ်သလောက် ဝယ်ယူရန်ခက်ခဲသည့်အပြင် ၃၀၀ စီစီဆံ့ ဓါတ်ဆီတစ်ဗူး- ၃၀၀၀-၅၀၀၀ ကျပ်ဖြင့်ဝယ်ယူခဲ့ရာ ယခုတွင် ဓါတ်ဆီ ၁ ဂါလံ- ၁၆၀၀၀-၁၈၀၀၀ ကျပ်ဖြင့် ဝယ်ယူနေကြရသည်။
ယခုလက်ရှိ တမူးမြို့ပေါ်တွင် အခြေခံစားသောက်ကုန်များဖြစ်သည့် ဧရာမင်းကော်ချက်ဆန်၁ အိတ်- ၁ သိန်းဝန်းကျင် ၊ ခရမ်းချဉ်သီး၁ ပိသာ- ၆၀၀၀ကျပ်၊ အာလူး ၁ ပိသာ- ၄၀၀၀ ကျပ်၊ ကြက်ဉ ၁၀၀၀ ဖိုး- ၅ လုံးစသည်ဖြင့် အသီးသီးရှိကြသည်။
ယခုကဲ့သို့ ကလေး-တမူး အားရှလမ်းမအား ပိတ်ထားရသည်မှာ တမူးမြို့ အနီးတဝိုက်တွင် စစ်ကောင်စီတပ်ဖွဲ့နှင့် ပြည်သူ့ကာကွယ်ရေးတပ်ဖွဲ့အကြား ထိတွေ့တိုက်ပွဲမရှိသော်လည်း ပန်းသာရွာအနီးတွင် စစ်ရေးတင်မာလျက်ရှိခြင်းကြောင့်ဟု သိရသည်။
တမူးမှ ကလေးမြို့သို့ တိုက်ရိုက်သွားလာနိုင်ခြင်းမရှိသော်လည်း အရေးကြီးသွားလာလိုသူများသည် တမူး- ဘုတ်ကန်မှတဆင့် ကလေးမြို့သို့ ဆိုင်ကယ်ဖြင့် သွားလာနိုင်ပြီး တမူး-ဘုတ်ကန်အထိ ခရီးသည်တစ်ဦးမှာ ယာဉ်စီးခ ၅၀၀၀၀ ကျပ်နှင့် ဘုတ်ကန်-ကလေးကြား ၂၀၀၀၀ ကျပ်ဖြင့် သွားလာနေကြရဆဲဖြစ်သည်။
ယခင်က တမူး-ကလေး အကြား ယာဉ်စီးခ တစ်ဦးလျှင် ၁၃၀၀၀ ကျပ်သာရှိသော်လည်း ယခုတွင် အနည်းဆုံး ၇၀၀၀၀ ကျပ်ဖြင့် သွားလာနေရသောကြောင့် ခရီးသွားလာသူများ သိသိသာသာနည်းပါးနေပြီး ကျန်းမာရေးအရ အရေးကြီးကိစ္စရပ်များသာ သွားလာကြသည်။
