ကလေးမြို့အနောက်ဘက် တာဟန်းရပ်ကွက်ရှိ နေအိမ်တစ်လုံးပေါ်သို့ ယမန်နေ့ (မေလ ၂၅) ည ၈ နာရီခွဲဝန်းကျင်ခန့်က လက်နက်ကြီးကျည် ကျရောက်ပေါက်ကွဲကာ အိမ်ရှင်အမျိုးသားတစ်ဦး ဒဏ်ရာရရှိခဲ့သည်ဟု သိရသည်။
“ည ၈ နာရီခွဲလောက်ဖြစ်မယ် လက်နက်ကြီးကျလာတာက အသံတော်တော်ကျယ်တယ် သူတို့ရဲ့ မီးဖိုချောင်ဘက်မှာကျလို့ တော်သေးတာ၊ အိမ်ရှင်အမျိုးသားက ဒဏ်ရာရတယ်၊ သိပ်တော့မပြင်းထန်ဘူးလို့” တာဟန်းဒေသခံတစ်ဦးက ပြောသည်။
ကလေးမြို့တွင် ယမန်နေ့ညက သေနတ်ပစ်ခတ်သံ ထွက်ပေါ်ခဲ့ပြီးနောက် တာဟန်းရပ်ကွက်ဘက်တွင် လက်နက်ကြီး ကျရောက်ပေါက်ကွဲခဲ့ခြင်းဖြစ်ပြီး အနီးနာက နေအိမ်တွေလည်း တုန်ခါသွားကာ အိမ်ခေါင်မိုးပေါ်တွင်လည်း အစနများ ကျရောက်ခဲ့သည်ဟု သိရသည်။
“ကျနော်တို့ မြို့ပေါ်မှာနေတဲ့သူတွေလည်း မလုံခြုံတော့ဘူး၊ ဘယ်ချိန်မှာ ကိုယ့်အိမ်ပေါ်ကို လက်နက်ကြီးကျရောက်လာမလဲဆိုတာ အမြဲစိုးရိမ်ထိပ်လန့်နေရတယ်၊ အခုက စစ်ကောင်စီတပ်က သူတို့ကြိုက်တဲ့နေရာမှာရမ်းသမ်းပစ်ပြီး ကျချင်တဲ့ နေရာကျဆိုတဲ့သဘောဖြစ်နေပြီ” ဟု တာဟန်းဒေသခံတစ်ဦးက ပြောသည်။
စစ်ကောင်စီတပ်ဖွဲ့၏ ရမ်းသမ်းပစ်ခတ်မှုကြောင့် တာဟန်းရပ်ကွက်ဘက်တွင် လက်နက်ကြီး ကျရောက်ပေါက်ကွဲမှု မကြာခဏဖြစ်ပွားလေ့ရှိပြီး မေလ ၁၀ ရက်နေ့ကလည်း တာဟန်းစျေးအနီး KT ထမင်းဆိုင်အိမ်ပေါ်သို့ လက်နက်ကြီးကျည် ကျရောက်ပေါက်ကွဲဖြစ်ပြီးဖြစ်သည်။
