ချင်းပြည်နယ်၊ ဟားခါးမြို့တွင် စက်တင်ဘာလ ၉ ရက်နေ့ နံနက်ပိုင်း ၁ နာရီခန့်က စစ်ကောင်စီတပ်ဖွဲ့နှင့် CDF တို့အကြား မြို့တွင်း ထပ်မံပစ်ခတ်ခြင်းရှိခဲ့ပြီး တိုက်ပွဲပြင်းထန်မှုရှိခဲ့သောကြောင့် လူနေအိမ် အဆောက်အအုံပျက်စီးမှုများ ရှိသည်ဟု သိရသည်။
“တိုက်ပွဲက တော်တော်လေး ပြင်းထန်တယ်။ အထိခိုက်ကတော့မသိရသေးဘူး၊ အိမ်တွေပျက်စီးတာတော့ရှိတယ်၊ ဘယ်နှစ်အိမ်လောက် ပျက်စီးလဲမသိရသေးဘူး သေနတ်သံတွေလဲ တော်တော်များတယ်၊ ဗုံးသံလည်း အရမ်းများတယ် အရင်ညက သူတို့တိုက်တာထက် ပိုပြီးတော့များ တယ် မနက် ၄နာရီလောက်ကလည်း သေနတ်သံ ၂ ချက် ၃ ချက်လောက် ပြန်ကြားတယ်။ ဖြစ်တာကလဲ ဟိုတနေ့ကဖြစ်တဲ့နေရာပတ်ဝန်းကျင်ပဲ” ဟု ဟားခါးမြို့ခံတစ်ဦးက ပြောသည်။
အဆိုပါပသ်ခတ်မှုကြောင့် ဟားခါးမြို့၊ ချင်းဦးစီးရပ်ကွက်၊ မြန်မာ့စီးပွားရေးဘဏ်များနှင့် မရာဘုရားကျောင်းအနီးအနားတွင် လက််နက်ကြီးကျည်များ ကျရောက်ပေါက်ကွဲကာ အဆောက်အအုံများပျက်စီးပြီး ဒဏ်ရာရ ထိခိုက်သူ ရှိ/မရှိကိုမှု မသိရှိရသေးပေ။
စက်တင်ဘာလ ၇ ရက်နေ့ ည ၁၀ နာရီအချိန်တွင်လည်း စစ်ကောင်စီတပ်ဖက်မှ လက်နက်ကြီးဖြင့် ရမ်းသမ်းပစ်ခတ်မှုကြောင့် လူနေအိမ်အချို့ ပျက်စီးမှုများရှိခဲ့ပြီး နေအိမ်အတွင်း ပုန်းခိုနေသော အမျိုးသားတစ်ဦးလည်း ပုခုံးတွင် ကျည်ထိမှန်ဒဏ်ရာရရှိခဲ့သည်ဟု သိရသည်။
