စစ်ကိုင်းတိုင်း ကလေးမြို့နယ် နည်းပညာတက္ကသိုလ်ကနေ တောင်ပိုင်းဘက်ကို စစ်ကြောင်းထိုးလာတဲ့ အင်အား ၂၀၀ ဝန်းကျင်လောက်ရှိတဲ့ စစ်ကောင်စီတပ်ဖွဲ့ကို ပြည်သူ့ကာကွယ်ရေးပူးပေါင်းတပ်ဖွဲ့က သြဂုတ်လ ၂ ရက်နေ့က တိုက်ခိုက်ခဲ့တာကြောင့် စစ်ကောင်စီဘက်က အကျဆုံးများပြီး အထိနာနေတယ်လို့ သိရပါတယ်။
ကလေး-ဂန့်ဂေါလမ်းမအတိုင်း စစ်ကြောင်းထိုးလာတဲ့ စစ်ကောင်စီတပ်ဖွဲ့ကို သာယာကုန်းကျေးရွာအနီးမှာ PDF (Kalay) တပ်ရင်း ၁၊ ၂၊ ၅၊ ၆၊ ပ.က.ဖ (ကလေး) ၊ CNDF ၊ CDF (KKG) နဲ့ RKDF ပူးပေါင်းတပ်ဖွဲ့တွေက သြဂုတ်လ ၂ ရက်နေ့က စတင်ဖြတ်တောက် တိုက်ခိုက်ခဲ့ပြီး နံနက် ၆ နာရီခွဲကနေ မွန်းလွဲ ၃ နာရီ ခန့်အထိ တိုက်ပွဲအပြင်းအထန် ဖြစ်ပွားခဲ့ကြ တယ်လို့ PDF (Kalay) က ထုတ်ပြန်ပါတယ်။
အဲဒီတိုက်ပွဲအတွင်းမှာ စစ်ကောင်စီတပ်သားအနည်းဆုံး ၁၅ ဦးသေဆုံးပြီး အများအပြား ထိခိုက်ဒဏ်ရာရရှိခဲ့တယ်လို့ Kalay-PDF တပ်ရင်း-၁ မှ တာဝန်ရှိသူတစ်ဦးက ပြောပါတယ်။
“မနေ့က မနက်ခြောက်နာရီခွဲလောက်မှာ ကျွန်းချောင်းနဲ့ သာယာကုန်းကြားမှာ ထိတွေ့မှုစဖြစ်တယ် သာယာကုန်းရွာအဝင်နားမှာ ပြန်ပြီးထိတွေ့မှုပြန်ဖြစ်တယ် ညနေခြောက်ခွဲအထိ၊ စစ်ကောင်စီဘက်က ၂၀ လောက်တော့ကျတယ် GTI ကျောင်းဝင်းထဲကို ၁၅ လောင်းပဲသယ်သေးတယ်ဆိုတော့ ကျန်တဲ့အလောင်းကိုတော့ ညမှနောက်ထပ်ကားနဲ့ လာ သယ်တာရှိသေးတာဆိုတော့ ဘယ်လောက်လဲမသိရသေးဘူး အနည်းဆုံး ၁၅ ယောက်ဖြစ်မယ်” ဟု Kalay-PDF တပ်ရင်း-၁ မှ တာဝန်ရှိသူတစ်ဦးက ပြောသည်။
စစ်ကောင်စီတပ်ဖွဲ့တွေဟာ သြဂုတ်လ ၂ ရက်နေ့မွန်းလွဲ ၂ နာရီခန့်မှာတော့ သာယာကုန်းရွာကို ဝင်ရောက်ပြီး ကျေးရွာအတွင်းက အပြစ်မဲ့ပြည်သူ ၁၀ ယေက်ကျော် ဖမ်းဆီးကာ အဲဒီထဲက အမျိုးသား ၁ ဦးကို သတ်ဖြတ်ခဲ့တယ်လို့ PDF (Kalay) က ဆိုပါတယ်။
“ပြည်သူတွေ၊ မသန်စွမ်းတွေ၊ ကလေးငယ်ငယ်တွေကျန်နေခဲ့တဲ့ဟာတွေရော ဖမ်းခေါ်သွားတာ၊ ပထမဆုံးက ဆယ်ယောက်ပဲဖမ်းတာ၊ ပြီးမှ ဆက်တိုက်ဆက်တိုက် ဖမ်းတာ။ သူတို့တွေကို ရွာထဲမှာထားတယ်။ ပြီးတော့ ဓားစာခံအနေနဲ့ ဘယ်နှစ်ယောက်လောက်ရှိမလဲမသိဘူး ရှေ့ကိုထုတ်ပြီးမှ ကြိုးတုပ်ပြီးမှ အရှေ့ကို အရင်လွတ်တယ်ပြီးမှ သူတို့က အနောက်ကနေ သေနတ်နဲ့လိုက်တယ်” ဟု Kalay-PDF တပ်ရင်း-၁ ကတာဝန်ရှိသူက ပြောပါတယ်။
စစ်ကောင်စီတပ်ဖွဲ့တွေဟာ သူတို့ဖမ်းဆီးထားတဲ့ပြည်သူတွေကိုလူသားဒိုင်းအဖြစ် စစ်ကြောင်းမှာ ဆက်လက်ခေါ်သွားပြီး တိုက်ပွဲအခြေအနေဆက်လက်ပြင်းထန်လာနိုင်တာကြောင့် ကလေး-ဂန့်ဂေါလမ်းမကြီးကို အသုံးမပြုကြဖို့ PDF (Kalay) က သတိပေးထားပါတယ်။
