ကလေးမြို့မှ တမူးမြို့သို့ သွားသည့် စစ်ကောင်စီယာဉ်တန်းကို ဇူလိုင်လ ၃၀ ရက်နေ့က PDF-Kalay တပ်ဖွဲ့ဝင်များမှ ကလေး-တမူးကားလမ်းမကြီးပေါ်တွင် သုံးကြိမ် မိုင်းဆွဲတိုက်ခိုက်ခဲ့ပြီး စစ်ကောင်စီတပ်သား ၁၅ ဦး သေဆုံးခဲ့သည်ဟု သိရသည်။
တမူးမြို့ဘက်သို့ သွားသည့် စစ်ကား ၄ စီးနှင့် ၁၂ ဘီးကားကြီးတစ်စီးကို PDF-Kalay တပ်ဖွဲ့ဝင်များမှ ၅၆ မိုင်အနီးတွင် တစ်ကြိမ်၊ နေကျော်လေးအနီးတွင် တစ်ကြိမ် မိုင်းဆွဲတိုက်ခိုက်ရာ စစ်ကား ၃ စီးပျက်စီးကာ စစ်ကောင်စီတပ်သား ၁၀ ဦး သေဆုံးခဲ့သည်ဟု PDF-Kalay က ထုတ်ပြန်သည်။
အဆိုပါ မိုင်းဆွဲတိုက်ခိုက်ခံရမှုကြောင့် သေကြေပျက်စီးသည့် စစ်ကောင်စီတပ်သားများ၏အလောင်းအား ကောက်ယူရန် ကလေးမြို့ဘက်မှ ထပ်မံထွက်ခွါလာသော ကား ၂ စီးကို မိုင်းဆွဲတိုက်ခိုက်ကာ စစ်ကောင်စီတပ်သား ၅ ဦး ထပ်မံသေဆုံးကာ အများအပြားဒဏ်ရာရရှိခဲ့သည်ဟု PDF-Kalay ၏ ထုတ်ပြန်ချက်တွင် ဖော်ပြထားသည်။
မိုင်းထိမှန်သေဆုံးသော စစ်ကောင်စီတပ်သားများ၏ အလောင်းများနှင့် ဒဏ်ရာရရှိသူများကို ၁၂ ဘီးကားကြီး ပေါ်တင်ဆောင်ကာ ကလေးမြို့ဘက်သို့ ပြန်လည်မောင်းနှင်ပြီး ကျန်ရှိသော စစ်ကောင်စီတပ်ဖွဲ့ဝင်များသည် တမူးမြို့ဘက်သို့ ဦးတည်ထွက်ခွာသည်ဟု သိရသည်။
ထို့ပြင် စစ်ကောင်စီတပ်ဖွဲ့သည် ၅၆ မိုင်နှင်းဆီခြံအနီးမှ ပြည်သူ ၃ ဦးနှင့် နေကျော်လေးအနီး လမ်းဘေးစားသောက်ဆိုင်မှ ပြည်သူတချို့ကိုလည်း ဖမ်းဆီးခေါ်ဆောင်သွားခဲ့သည်ဟု PDF-Kalay က ဆိုသည်။
လက်ရှိ စစ်ရေးအခြေနေများအရ ကလေး-တမူးလမ်းမကြီးအား ည ၉ နာရီမှ မနက် ၅ နာရီအထိ ဖြတ်သန်းသွားလာခြင်းမပြုကြရန် PDF-Kalay က ထုတ်ပြန်ထားသည်။
