“ကျနော်တို့ ငါးလကျော် တိုက်ခိုက်ခဲ့ရတဲ့ အကြောင်းအရင်းက ဖလမ်းက ဗျူဟာအရ အရမ်းကို အချက်အချာကျတဲ့ မြို့တစ်မြို့ဖြစ်ပါတယ်”

CNO/CNDF ပြောရေးဆိုခွင့်ရှိသူ ဆလိုင်းတီမီ နှင့် ဆက်သွယ်မေးမြန်းချက်

(006SV)

ချင်းညီနောင်စစ်ဆင်ရေးအဖြစ် ဖော်ဆောင်ခဲ့တဲ့ ဖလမ်းမြို့သိမ်းတိုက်ပွဲဟာ စစ်ဆင်ရေးကာလ ၅ လ ပြည့်တဲ့ ဧပြီလ ၉ ရက်နေ့မှာ ဖလမ်းမြို့နယ်တခုလုံး စစ်ကောင်စီကင်းစင်နယ်မြေဖြစ်သွားပြီလို့ ချင်းညီနောင်အဖွဲ့က ကြေညာပါတယ်။

နှစ်ဖက်လုံးအတွက် စစ်ရေးနဲ့ သယ်ယူပို့ဆောင်ရေး မဟာဗျူဟာကျတဲ့ မြို့ဖြစ်တဲ့ ဖလမ်းမြို့တိုက်ပွဲမှာ စစ်ကောင်စီဟာ ဖလမ်းမြို့ကို လက်မလွှတ်ရရေးအတွက် စစ်ကူအင်အားတွေ ထပ်တလဲလဲ ဖြည့်တင်းပြီး လေကြောင်းပစ်ကူအကြိမ် ၁၀၀၀ ကျော်နဲ့ ခုခံခဲ့ပါတယ်။

တဖက်မှာလည်း ချင်းညီနောင်နဲ့ မဟာမိတ်တော်လှန်ရေးအင်အားစုတွေဟာ တိုက်ပွဲ ၅ လတာအတွင်း အခက်အခဲ၊ စိန်ခေါ်မှု ပေါင်းစုံနဲ့အတူ စစ်ကူအင်အားတွေ ထပ်မံဖြည့်တင်းပြီး တရပ်စပ် ဖိအားပေး တိုက်ခိုက်နေခဲ့ကာ နောက်ဆုံးမှာ အပြီးသတ် သိမ်းနိုင်ခဲ့ပါတယ်။

ချင်းတော်လှန်ရေးအင်အားစုတွေ ဖလမ်းမြို့ကို သိမ်းပိုက်နိုင်ခြင်းဟာ နွေဦးတော်လှန်ရေးကာလ ၄ နှစ်ကျော်ရှိလာချိန်မှာ ချင်းပြည်နယ်တခုလုံး စစ်ကောင်စီ ကင်းစင်ရေးအတွက် အချိုးအကွေးတခု ဖြစ်လာခဲ့ပါပြီ။

၂၀၂၅ ခုနှစ်မှာ ချင်းပြည်နယ်တခုလုံး စစ်ကောင်စီ ကင်းစင်ရေး ရည်မှန်းထားကြတဲ့ ချင်းတော်လှန်ရေး အင်အားစုတွေထဲက ဖလမ်းမြို့သိမ်းတိုက်ပွဲကို အောင်မြင်စွာ ဖော်ဆောင်နိုင်ခဲ့တဲ့ CNO/ CNDF ပြောရေးဆိုခွင့်ရှိသူ ဆလိုင်းတီမီကို ဖလမ်းမြို့ သိမ်းစစ်ဆင်းရေးရဲ့ အောင်မြင်မှုနဲ့ ရှေ့ဆက်ဖော်ဆောင်မယ့် အကြောင်းအရာတွေနဲ့ ပတ်သက်လို့ ဆက်သွယ် မေးမြန်းထားမှုတွေကို ဖော်ပြပေးလိုက်ပါတယ်။

မေး – ဖလမ်းမြို့သိမ်းတိုက်ပွဲ ဖြစ်စဉ်အကျဉ်းကို အရင်ပြောပြပေးပါ။

ဖြေ – ဖလမ်းမြို့စစ်ဆင်ရေးက ၂၀၂၄ နိုဝင်ဘာလ ၉ ရက်က စစ်ဆင်ရေးကို စတင်ခဲ့တာပါ။ သိမ်းတာက ၂၀၂၅ ဧပြီလ ၇ ရက်မှာ အပြီးပိုင် သိမ်းပိုက်ရရှိခဲ့ပါတယ်။

နိုဝင်ဘာလ ၉ ရက်၊ ၂၀၂၄ မှာ စတင်ပြီးတော့ အဲဒီလအတွင်းမှာပဲ မြို့ထဲမှာ ရှိတဲ့ ရဲစခန်းနဲ့ တခြားသော စကစ စခန်းတည်ရှိတဲ့ နေရာတွေ သိမ်းပိုက်ပြီး မြို့ကို ထိန်းချုပ်နိုင်ခဲ့ပါတယ်။ အဲလိုနဲ့ပဲ ကျန်ရှိနေတဲ့ ခလရ – ၂၆၈ ကို ကျနော်တို့ ဝိုင်းပြီးတော့ စစ်ဆင်ရေး လုပ်နေတဲ့အချိန်မှာ ၂၀၂၄ ဒီဇင်ဘာလမှာ တကြိမ်၊ စစ်ကူအင်အား ၁၀၀ လောက် ချထားပါတယ်။ နောက် ၂၀၂၅ ဇန်နဝါရီလမှာ တကြိမ် ၊ မတ်လမှာ ၂ကြိမ် အဲလို စကစ ဘက်က တပ်ကူအင်အား ၂၀၀ ကျော်ကို ခလရ – ၂၆၈ ကို စစ်ကူပေးတဲ့ အခြေအနေမှာ ရှိတယ်။

လေကြောင်းအနေနဲ့ ကျတော့ ဂျက်ဖိုက်တာရယ်၊ Y- 12 ရယ်နဲ့ တော်တော်လေးကို ဖလမ်းမြို့ ခလရ – ၂၆၈ ကို ခုခံကာကွယ်တဲ့ အခြေအနေမှာ ရှိပါတယ်။ အကြိမ်ပေါင်း ၁၀၀၀ ကျော်ကို ပစ်ခတ်တိုက်ခိုက်ခဲ့ပေမယ့်လည်း ၂၀၂၅ ဧပြီလ ၇ ရက်မှာ အပြီးပိုင် ဒီဖလမ်းမြို့ ခလရ – ၂၆၈ ရယ်၊ ဖလမ်းမြို့တခုလုံး အကုန်လုံးကို အပြီးပိုင် ထိန်းချုပ်နိုင်ခဲ့တာဖြစ်ပါတယ်။

မေး – ဖလမ်းမြို့သိမ်းတိုက်ပွဲဟာ ၅ လဝန်းကျင်ကြာမြင့်ခဲ့ပါတယ်။ ဖလမ်းမြို့သိမ်းတိုက်ပွဲဟာ ချင်းတော်လှန်ရေး အင်အားစု တွေအတွက် ဘယ်လိုအရေးကြီးပါသလဲ။ စစ်ရေးမှာ ဘယ်လိုအချက်အချာ ကျနေပါသလဲ။

ဖြေ – ကျနော်တို့ ငါးလကျော် တိုက်ခိုက်ခဲ့ရတဲ့ အကြောင်းအရင်းက ဖလမ်းက ဗျူဟာအရ အရမ်းကို အချက်အချာကျတဲ့ မြို့တစ်မြို့ဖြစ်ပါတယ်။ ဘာလို့လဲဆိုတော့ ပြည်ထောင်စုလမ်းမကြီး၊ ကလေးကနေ ဟားခါးကြားထဲမှာ ရှိတဲ့ မြို့တစ်မြို့ ဖြစ်သလို ၊ စီးပွားရေးအရသော်လည်းကောင်း၊ အိန္ဒိယနယ်စပ်နဲ့လည်း ထိစပ်နေတဲ့ မြို့လည်းဖြစ်တယ်။ ချင်းပြည်နယ် မြောက်ပိုင်းမှာဆိုရင် နိုင်ငံတကာ နယ်နိမိတ်ရှိတာဟာ ဖလမ်းမြို့ဖြစ်တယ်ဆိုတော့ စီးပွားရေးအရသော်လည်းကောင်း၊ ထောက်ပို့လမ်းကြောင်းအရသော်လည်းကောင်း ၊ မြို့တော် ဟားခါးကိုသော်လည်းကောင်း ၊ ဒီဘက် ကလေးမြို့အတွက် သော်လည်းကောင်း လုံခြုံရေးအရ အချက်အချာကျတဲ့ မြို့ဖြစ်တဲ့အတွက်ကြောင့် ငါးလလောက်ကို စကစဘက်ကနေ လူအလုံးအရင်းရော၊ ဂျက်ဖိုက်တာတွေနဲ့ရော ခုခံကာကွယ်နေတာ ဖြစ်ပါတယ်။

မေး – လက်ရှိ ဖလမ်းမြို့ပေါ်အခြေအနေနဲ့ နယ်မြေရှင်းလင်းရေး အခြေအနေက ဘယ်လိုရှိပါသလဲ။

ဖြေ – လက်ရှိ ဖလမ်းအခြေအနေကတော့ မြို့တွင်း သန့်ရှင်းရေးနဲ့ နယ်မြေရှင်းလင်းရေးကို ဆောင်ရွက်နေဆဲ အခြေအနေမှာ ဖြစ်တဲ့အတွက် ဘယ်သူမှ ဝင်ခွင့်မရသေးပါဘူး။ လက်နက်ကိုင်အဖွဲ့တွေပဲ လုံခြုံရေးအရ ကျနော်တို့ နယ်မြေရှင်းလင်းရေး လုပ်ဆောင်နေဆဲ အခြေအနေ ဖြစ်တယ်။ စကစဘက်ကတော့ တုန့်ပြန်မှု ဘာမှတော့ မရှိဘူး။ နောက်ပြီးတော့ ခလရ – ၂၆၈ ကနေ ထွက်ပြေးတိမ်းရှောင်သွားတဲ့ သူတွေကိုလည်း ကျနော်တို့ လိုက်နေဆဲဖြစ်တယ်။

မေး – မြို့သိမ်းတိုက်ပွဲမှာ လက်နက်ခဲယမ်းတွေ သိမ်းဆည်းရမိမှုတွေအကြောင်း ပြောပြပေးပါ။ သတင်းထုတ်ပြန်တဲ့ ဓါတ်ပုံတွေထဲမှာ ငွေပမာဏအများအပြား သိမ်းဆည်းရမိတာလည်း တွေ့ရပါတယ်။

ဖြေ – ကျနော်တို့ လက်နက်ခဲယမ်းကတော့ ဟောင်ဝစ်ဇာ အပါအဝင် လက်နက်ခဲယမ်းတွေ၊ လက်နက်ကြီး ၊ လက်နက်ငယ်ပေါင်း မြောက်များစွာ ၊ နောက်ပြီးတော့ ငွေလည်း အလုံးအရင်းနဲ့ပေါ့လေ၊ သိန်း လေးထောင်ကျော် သိမ်းဆည်း ရရှိထားပါတယ်။

မေး – စစ်ကောင်စီ စစ်သုံ့ပန်းတွေကို အရှင် ဖမ်းဆီးရမိတာတွေ ထပ်မံရှိပါသေးလားခင်ဗျာ။

ဖြေ – လက်ရှိအခြေအနေမှာ စစ်သုံ့ပန်း ၂၀၀ ကျော်ကို ကျနော်တို့ ထိန်းသိမ်းထားပါတယ်။ ဒါပေမယ့် နောက်ထပ် ရှိနိုင်သေးတာမို့ စာရင်းကတော့ အတိအကျ ပြန်လည်ပြီးတော့ ကြေညာပေးပါမယ်။

မေး – ဖလမ်းမြို့သိမ်းတိုက်ပွဲမှာ ချင်းပူးပေါင်းတပ်တွေ၊ ရခိုင် ULA/AA နဲ့ အညာတကြောက တပ်တွေ အများအပြား ပါဝင်ခဲ့တာ တွေ့ပါတယ်။ အဲဒီမှာ ဘယ်လိုပူးပေါင်းဖော်ဆောင်ခဲ့ရသလဲဆိုတာ သိချင်ပါတယ်။ ချင်း၊ ရခိုင်နဲ့ ဗမာတွေ ပူးပေါင်းတပ်တွေရဲ့ အမှတ်ရစရာတွေလည်း ပြောပြပေးပါဦးခင်ဗျာ။

ဖြေ – အာရက္ခတပ်တော် ULA/ AA အနေနဲ့ ကျနော်တို့ကို ဖလမ်းမြို့မှာ ကျနော်တို့ လိုအပ်တဲ့ လက်နက်ခဲယမ်းနဲ့ စစ်ပိုင်းဆိုင်ရာ နည်းဗျူဟာတချို့ လမ်းညွှန်ပြသတာတွေ ရှိပါတယ်။ နောက်ပြီးတော့ အညာမှာ ရှိတဲ့၊ ကျနော်တို့ ချင်းညီနောင်က ကောင်းမွန်တဲ့ အိမ်နီးချင်းကောင်းကို ပိုင်ဆိုင်ချင်တာ ဖြစ်တယ်။ ဆိုတော့ စစ်ကိုင်းမှာ ရှိတဲ့ လက်နက်ကိုင်တွေနဲ့ မကွေးမှာ ရှိတဲ့ ယောမှာ ရှိတဲ့ လက်နက်ကိုင်သော်လည်းကောင်း ၊ ရခိုင်တပ်တော် AA နဲ့သော်လည်းကောင်း ပူးပေါင်းနိုင်တဲ့ လမ်းကြောင်း ရှိရင် ပူးပေါင်းနိုင်တဲ့ လမ်းကြောင်းအဖက်ဖက်ကနေ ကျနော်တို့ ပူးပေါင်းပြီးတော့ စကစ(စစ်ကောင်စီ) ကင်းစင်ဖို့အတွက် ဆက်လက်ပြီး လုပ်ဆောင်သွားမှာ ဖြစ်သလို၊ ဖလမ်းမြို့သိမ်းတိုက်ပွဲမှာလည်း အဲလို လုပ်ဆောင်ခဲ့တာဖြစ်ပါတယ်။

မေး – ဖလမ်းမြို့သိမ်းစစ်ဆင်ရေးပြီးသွားရင် ရှေ့ဆက်ဘာတွေ ဆောင်ရွက်သွားဖို့ ရှိပါသလဲခင်ဗျာ။

ဖြေ – ဖလမ်းမြို့ကို နယ်မြေရှင်းလင်းရေးတွေအနေနဲ့ မိဘပြည်သူများ ပြန်လည်နေထိုင်လို့ ရအောင်၊ မိဘပြည်သူများအတွက် လုံခြုံတဲ့ အခြေအနေ တခုရောက်တဲ့အခြေအနေမှာ ကျနော်တို့ CNO/ CNDF ကနေ ပြန်လည်ကြေညာပြီးတော့ ၊ ပြန်လည် နေထိုင်လို့ ရအောင် ကျနော်တို့ အမြန်ဆုံး လုပ်ဆောင်သွားဖို့ ရှိပါတယ်။ နောက်ပြီးတော့ ကျနော်တို့ အစိုးရအုပ်ချုပ်ရေးယန္တရား ပြန်လည် လည်ပတ်နိုင်အောင်လည်း ကျနော်တို့ ဆက်လက်ပြီးတော့ အချိန်တခု ယူပြီးမှ ဆောင်ရွက်သွားမှာဖြစ်ပါတယ်။

မေး – နောက်ဆုံး ဖြည့်စွက်ပြောကြားချင်တာ ရှိရင် ပြောပါ။

ဖြေ – ဖလမ်းမြို့သိမ်းစစ်ဆင်ရေးမှာ အသက်ပေးလှူကြတဲ့ အာဇာနည် သူရဲကောင်းတွေ၊ ကိုယ်လက်အင်္ဂါပေးဆပ်တဲ့ ရဲဘော်တွေ၊ ရှေ့တန်းမှာ ရွံ့ရွံ့ချွံချွံတိုက်ပွဲဝင်ကြတဲ့ မဟာမိတ်အဖွဲ့ဝင်တွေနဲ့ ချင်းညီနောင်အဖွဲ့များ အားလုံးကို ဒီကနေ ကျေးဇူးတင်ကြောင်း၊ လေးစားကြောင်း၊ အလေးအနက်ပြုပါကြောင်း နောက်ဆုံးပြောချင်ပါတယ်။