ချင်းပြည်နယ်မှာ စစ်ကောင်စီတပ်နဲ့ ချင်းပြည်သူ့ကာကွယ်ရေးတပ်ဖွဲ့တို့တိုက်ပွဲဆက်လက်ပြင်းထန်နေပြီး ဇန်နဝါရီလ ၂၂ နဲ့ ၂၃ ရက်နေ့ ၂ ရက်အတွင်းမှာ ပြည်သူ့ကာကွယ်ရေးပူးပေါင်းတပ်ဖွဲ့ဘက်က တပ်ရင်းမှူးအပါအဝင် ရဲဘော် ၅ ဦး ကျဆုံးခဲ့ရသည်ဟုသိရသည်။
ယမန်နေ့ဇန်နဝါရီလ ၂၃ ရက်နေ့က ချင်းပြည်နယ် မတူပီ၊ ကန်ပက်လက်နဲ့ ဖလမ်းမြို့နယ်တွေမှာ စစ်ကောင်စီနဲ့ ချင်းပြည်သူ့ကာကွယ်ရေးပူးပေါင်းတပ်ဖွဲ့တွေ တိုက်ပွဲဆက်လက်ဖြစ်ပွားခဲ့ကြရာမှာ ချင်းပြည်သူ့ကာကွယ်ရေးတပ်ဘက်က တပ်ရင်းမှူးတစ်ဦးအပါအဝင် ရဲဘော် ၃ ဦး ကျဆုံးခဲ့ပါတယ်။
မတူပီမြို့နယ် ရေဇွာမြို့အနီးမှာ ယမန်နေ့က စစ်ကောင်စီတပ်နဲ့ ချင်းပြည်သူ့ကာကွယ်ရေး ပူးပေါင်းတပ်ဖွဲ့တို့ တိုက်ပွဲဖြစ်ပွားခဲ့ကြပြီး CDF-Matupi တပ်ရင်း ၂ က ဆလိုင်း San Thar ကျဆုံးခဲ့ပြီး ခုချိန်ထိအလောင်းပြန် မရသေးဘူးလို့ CDF-Matupi ပြန်ကြားရေးတာဝန်ခံတစ်ဦးက ခုလိုပြောဆိုပါတယ်။
“ကျနော်တို့ ရဲဘော်တစ်ယောက်ကျသွားတယ် မနေ့ကဖြစ်တဲ့တိုက်ပွဲမှာ ၃ နာရီလောက်စဖြစ်တယ် ၄ နာရီလောက်မှာ ကျသွားတာပါ ခုထိကိုအလောင်းမရသေးဘူး သူရှိတဲ့အလောင်းနေရာက CDF ရှိတဲ့နေရာနဲ့ အလောင်းရှိတဲ့နေရာကြားမှ စစ်ကောင်စီက နေရာယူထားတော့ အလောင်းကိုသွားမယူနိုင်သေးဘူး” လို့ သူကပြောပါတယ်။
ဆလိုင်း San Thar ဟာ CDF-Matupi တပ်ရင်း ၂ မှာ တပ်ရင်းမှူးအဆင့်ထိတာဝန်ထမ်းဆောင်ခဲ့ဖူးသူဖြစ်သလို ရေဇွာမြို့အနီး တိုက်ပွဲမှာ စစ်ကြောင်းမှူးအဖြစ် တာဝန်ယူထားသူဖြစ်တယ်လို့လည်း သိရပါတယ်။
စစ်ဗျူဟာအခြေစိုက်တဲ့နေရာဖြစ်တဲ့ မတူပီမြို့မှာ မကြာသေးခင်ရက်ပိုင်းက စစ်ကားအစီး ၉၀ လောက် ထပ်မံရောက်ရှိလာပြီး ချင်းပြည်သူ့ကာကွယ်ရေးတပ်ဖွဲ့တွေကို ထိုးစစ်ဆင်တိုက်ခိုက်မှုတွေ ပိုမိုလုပ်ဆောင်လာနိုင်တယ်လို့လည်း သိရပါတယ်။
ချင်းပြည်နယ်တောင်ပိုင်း ကန်ပက်လက်မြို့နယ်နဲ့ မကွေးတိုင်းနယ်စပ်ဘက်မှာလည်း မနေ့က စစ်ကောင်စီနဲ့ CDF-Kanpetlet တို့ တစ်နာရီကျော်ကြာလောက် ပစ်ခတ်မှုဖြစ်ခဲ့ပြီး CDF-Kanpetlet က ရဲဘော်ဆလိုင်းစည်သူအောင် ကျဆုံးခဲ့တယ်လို့ CDF-Kanpetlet တပ်မမှူးကပြောပါတယ်။
“စေတုတ္တရာဘက်ကနေ ထိုးစစ်ဆင်လာတာ ကန်ပက်ကက်မြို့နယ်နဲ့ စေတုတ္တရာရဲ့နယ်စပ်ပေါ့နော ကျနော်တို့ ကာကွယ်ရေးတပ်ဖွဲ့တွေနဲ့ အဲဒီမှာတိုက်ပွဲဖြစ်တာ အဲဒီမှာ ကျနော်တို့လူတစ်ယောက် ကျသွားတယ်၊ သူတို့ဘက်က အကျအဆုံးအထိခိုက်ကတော့ ကျနော်တို့မသိရဘူး” လို့သူကပြောပါတယ်။
ဒါ့အပြင် ဖလမ်းမြို့နယ်မှာလည်း ဇန်နဝါရီလ ၂၃ ရက်နေ့က ချင်းအမျိုးသားကာကွယ်ရေးတပ်မတော် CNDF နဲ့ စစ်ကောင်စီတပ်ဖွဲ့အကြား တိုက်ပွဲအတွင်းမှာ CNDF က ရဲဘော်ဆလိုင်းဆပ်ဒင့်ထွာမ်းမာ ကျဆုံးခဲ့တယ်လို့ သိရပါတယ်။
ယခုလို ချင်းပြည်သူ့ကာကွယ်ရေးတပ်ဖွဲ့က ရဲဘော်တွေထိခိုက်ကျဆုံးမှုတွေရှိနေပေမယ့် စိတ်ဓာတ်ကျစရာမလိုဘဲ ဒီထက် ပိုမိုတိုက်ခိုက်သွားမယ်လို့ CDF-Kanpetlet က တပ်မမှူးက ပြောပါတယ်။
“ချင်းမှာတော့ ကိုယ့်မြို့နယ်အလိုက် ကာကွယ်ရေးတပ်ဖွဲ့တွေရှိတယ် ပူးပေါင်းစစ်ဆင်ရေးတွေလည်းရှိတယ် တပ်ရင်းတပ်မတွေဖွဲ့တယ် အဲဒီအောက်မှာ ကော်မတီတွေဖွဲ့တယ် ဒီလိုမျိုးဆိုတော့ ခေါင်းဆောင်ပိုင်းပဲဖြစ်ဖြစ် တစ်ဦးတစ်ယောက် ထိခိုက်တာနဲ့ စိတ်ဓာတ်ပိုင်းဆိုင်ရာ ဖြိုကွဲတာတို့ ဒီလိုမျိုးကတော့ စိုးရိမ်စရာမရှိပါဘူး ကျနော်တို့ ရဲဘော်တစ်ယောက်ကျလို့ရှိရင် ပိုပြီးခါမှ ခံပြင်းစိတ် strong ဖြစ်တယ် စိတ်ဓာတ်ကျသွားတာမျိုးမရှိပါဘူး ပိုပိုပြီးမှ အားကောင်းလာဖို့ပဲရှိတယ်” လို့ CDF-Kanpetlet တပ်မမှူးက ပြောပါတယ်။
ပြီးခဲ့တဲ့ ဇန်နဝါရီလ ၂၂ ရက်နေ့ကလည်း ကလေး-တီးတိန်ကားလမ်းပေါ်က ဟိန်ဇိန်ကျေးရွာအနီးတိုက်ပွဲမှာ ချင်းပြည်သူ့ကာကွယ်ရေးတပ်ဖွဲ့ဘက်က ချင်းအမျိုးသားတပ်မတော် CNA က ဆလိုင်းကျူံးလျန်ဆန်းနဲ့ PDF-Zoland က ကိုမှုန်နိုးတို့ မိုင်းမတော်တဆမှုကြောင့် ကျဆုံးခဲ့ရပြီး စစ်ကောင်စီဘက်ကလည်း အနည်းဆုံးအယောက် ၄၀ လောက် သေဆုံးခဲ့တယ်လို့ သိရပါတယ်။
အဲဒီတိုက်ပွဲမှာ လူအင်အား လက်နက်အင်အား မမျှတာကြောင့် ချင်းပြည်သူ့ကာကွယ်ရေးတပ်ဖွဲ့တွေဟာ ကလေး-တီးတိန် ကားလမ်းမပေါ်က အချက်အချာကြတဲ့ သိုင်းငင်ကျေးရွာကို စွန့်လွှတ်လိုက်ရတယ်လို့လည်း သိရပါတယ်။
