(006SV)
ချင်းပြည်ကောင်စီ၊ ချင်းပြည်အစိုးရ၏ ပညာရေးဝန်ကြီးဌာနလက်အောက်တွင် ပြည်တွင်းပြည်ပ ကျောင်းပေါင်း ၆၆၀ ဝန်းကျင်ဖွင့်လှစ်ထားပြီး ကျောင်းသူကျောင်းသား ၅၆၀၀၀ ကျော် ပညာသင်ယူနေကြောင်း သိရသည်။
ချင်းပြည်နယ်အတွင်း ကျောင်းပေါင်း ၆၁၉ ကျောင်းကို ဖွင့်လှစ်ထားပြီး ကျောင်းသူကျောင်းသားပေါင်း ၅၃၂၀၀ ကျော် ပညာဆည်းပူးလျက်ရှိသည်ဟု ချင်းပြည်အစိုးရ၊ ပညာရေးဝန်ကြီးဌာန ဝန်ကြီး Salai Cross Thang က ပြောသည်။
ချင်းပြည်နယ်ပြင်ပ အိန္ဒိယနိုင်ငံ၊ မီဇိုရမ်ပြည်နယ်တွင် ဒုက္ခသည်ကျောင်းများအနေဖြင့် ကျောင်းပေါင်း ၄၀ ကျော် ဖွင့်လှစ်ထားပြီး ကျောင်းသားကျောင်းသူပေါင်း ၃၃၀၀ ကျော် တက်ရောက်လျက်ရှိသည်ဟု သိရသည်။
ချင်ပြည်ပညာရေးနှင့် ပတ်သက်၍ ဖေဖော်ဝါရီလ ၆ ရက်တွင် အွန်လိုင်းက ပြုလုပ်သည့် ချင်းပြည်ကောင်စီ ၁ နှစ်ပြည့် သတင်း စာရှင်းလင်းပွဲတွင် ချင်းပညာရေးဝန်ကြီးက အသိပေးလာခြင်းဖြစ်သည်။
“ရှေ့ဆက်လုပ်ငန်းက ချင်းပြည်ပညာရေးကောင်စီအစည်းအဝေး လုပ်ဖို့ ရှိပါသေးတယ်။ ဆရာ/မတွေအတွက် ဘာသာရပ် ကျွမ်းကျင်မှု သင်တန်း ဆက်လုပ်ဖို့ ရှိတယ်။ ဆရာအတတ်ပညာသင်တန်းလည်း လုပ်ဖို့ရှိပါမယ်။ မြို့နယ်/ဒေသ ပညာရေး ကောင်စီ၊ ဌာနတွေနဲ့ အုပ်ချုပ်ရေးအဖွဲ့တွေကို စီမံခန့်ခွဲမှုနဲ့ သတင်း ၊ သတင်းအချက်အလက် နည်းပညာကို စနစ်တကျ ဆက်လက် ဆောင်ရွက်ဖို့ ရှိပါတယ်။ မြို့နယ်ဒေသ ပညာရေးတွေကို ထောက်ပံ့ကြေးပေးနိုင်ဖို့ နဲ့ ကျောင်းအဆောက်အဦးတွေ ဆောက်လုပ် ပေးနိုင်ဖို့ ဆောင်ရွက်နေပါတယ်။ ချင်းအမျိုးသားတက္ကသိုလ်ကိုတော့ စတင်ဖွင့်လှစ်နေပါပြီ” ဟု Salai Cross Thang က ပြောသည်။
ချင်းပြည်နယ်အတွင်း ကျောင်းဆရာ/ဆရာမ ပေါင်းမှာ ၄၁၀၀ ဦးအထိ ရှိပြီး မီဇိုရမ်ပြည်နယ်တွင် ဆရာ/မ ပေါင်းမှာ ၃၀၀ ကျော်ရှိသည်ဟု သိရသည်။
ချင်းပြည်ပညာရေးဝန်ကြီးဌာနသည် ပညာရေးဝန်ဆောင်မှုများကို CDM ပြုလုပ်ထားသော ဆရာ/မ ၃၃ ရာခိုင်နှုန်းဖြင့် လည်ပတ်နေပြီး ကျန် ၆၇ ရာခိုင်နှုန်းမှာ စေတနာ့ဝန်ထမ်း ဆရာ/မ များဖြင့် ဆောင်ရွက်နေခြင်းဖြစ်သည်ဟု သိရသည်။
မိတ်ဖတ်အဖွဲ့အစည်းများအနေဖြင့် အမျိုးသားညီညွတ်ရေးအစိုးရ၊ ပညာရေးဝန်ကြီးဌာန၊ ကြားကာလဖက်ဒရယ် ပညာရေး ကောင်စီ၊ အရပ်ဖက်အဖွဲ့အစည်းများ၊ အစိုးရမဟုတ်သော အဖွဲ့အစည်းများဖြင့် ပူးပေါင်းဆောင်ရွက်လျက်ရှိသည်ဟု သိရသည်။
ချင်းပြည်ပညာရေးဝန်ကြီးဌာန ဖွဲ့စည်းတည်ထောင်ပြီးနောက် ချင်းပြည် ဒီမိုကရေစီဖက်ဒရယ်ပညာရေး မူဝါဒကို ရေးဆွဲအတည် ပြုခြင်း၊ ၂၀၂၄- ၂၀၂၅ ပညာသင်နှစ်ကို ချမှတ်နိုင်ခြင်း၊ အဆင့်မြင့်ပညာကဏ္ဍ အလုပ်ရုံဆွေးနွေးပွဲများ လုပ်ဆောင်ခြင်း၊ အကြို ကော်လိပ် သင်ရိုးညွှန်းတမ်း ရေးဆွဲခြင်း၊ ချင်းပြည်ပညာရေး မဟာဗျူဟာ စီမံကိန်း ၂၀၂၅ – ၂၀၃၀ ကို ရေးဆွဲအတည်ပြုခြင်း၊ ဆရာအတတ်ပညာ ရက်တိုသင်တန်းများ ဖွင့်လှစ်နိုင်ခြင်း၊ ဘာသာရပ်ကျွမ်းကျင်မှု အလုပ်ရုံဆွေးနွေးပွဲများ ပြုလုပ်ခြင်းတို့ လုပ်ဆောင်နိုင်ခဲ့သည်ဟု သိရသည်။
