(006SV)
ချင်းလဲန်းကောင်စီ၊ ချင်းပြည်အစိုးရက ဒေသန္တရအစိုးရများကို မြို့နယ်နှင့် ဒေသ ၁၉ ခုတွင် ရှေးယခင်အဆက်ဆက် ကတည်းကတည်ရှိနေသည့် မျိုးနွယ်စု နှင့် ဒေသကို အခြေခံ ဖွဲ့စည်းထားသည်ဟု သိရသည်။
ချင်းပြည် (Chinland) တည်ဆောက်ခြင်း၊ ချင်းပြည်သူတို့၏ ကိုယ်ပိုင် အုပ်ချုပ်ခွင့်ကို ကျင့်သုံးပြီး ၂ နှစ်ခွဲကာလ အတွင်း အုပ်ချုပ်ရေးဖော်ဆောင်မှု အစီရင်ခံစာနှင့်ပတ်သက်၍ ယနေ့ ဩဂုတ်လ ၂၈ ရက်မှာ အွန်းလိုင်းမှတဆင့် ကျင်းပသော သတင်းစာရှင်းလင်းပွဲတွင် ချင်းလဲန်းကောင်စီတာဝန်ရှိသူများက ယင်းသို့ ပြောခြင်းဖြစ်သည်။
“ယခင် ၂၀၂၁ အာဏာမသိမ်းမှီ ကာလက တည်ရှိခဲ့သော အုပ်ချုပ်ရေးနယ်နိမိတ်များကို အခြေမခံဘဲ ရှေးယခင် အဆက်ဆက်ကတည်းက တည်ရှိရှင်သန်နေခဲ့သော ဒေသနှင့် မျိုးနွယ်စု နယ်နိမိတ်များကို အခြေခံ၍ ဖွဲ့စည်း ထားသည်” ဟု ချင်းပြည်ကောင်စီ အတွင်းရေးမှူး Salai Kep Chin Thang က ပြောသည်။
မြို့နယ်နှင့် ဒေသ အစိုးရများသည် ကိုယ်ပိုင်ဖွဲ့စည်းပုံ အခြေခံဥပဒေ ရေးဆွဲပြဌာန်းခွင့် ရှိပြီး ကိုယ်ပိုင်အုပ်ချုပ်ရေး အသီးသီးကို ဖော်ဆောင်ကြကာ မြို့နယ်နှင့် ဒေသများက စုပေါင်း၍ အောက်မှ အထက်သို့ ချဉ်းကပ်မှု ပုံစံဖြင့် ချင်းပြည်ကောင်စီကို အတူတကွ ဖွဲ့စည်း တည်ဆောက်သည်ဟု သိရသည်။
ချင်းပြည်ကောင်စီရှိ မြို့နယ်နှင့် ဒေသန္တရအစိုးရများမှာ Hakha Central Council ၊ Hualngoram Peoples Organization ၊ Kanpetlet Council ၊ Lautu People Affairs Council ၊ Maraland Council ၊ Matupi Township Council ၊ Mindat Council ၊ Ngawnland Peoples Council ၊ Paletwa Council ၊ Senthang Central Council ၊ Siyin Regional Council ၊ Tedim Township Council ၊ Thado Council ၊ Thantland Peng Council ၊ Tonzang Township Council ၊ Zanniatland People Organization ၊ Zopheiram Council ၊ Zotung Regional Council တို့အပြင် လက်ရှိမှာ စစ်ကိုင်းနှင့် မကွေးတို့အတွင်းပါဝင်နေသော ကလေး- ကဘော် – ဂန့်ဂေါဒေသအခြေပြု CDF- KKG စသဖြင့် ၁၉ ဖွဲ့ ရှိသည်ဟု သိရသည်။
ဒေသန္တရအစိုးရများကို ယခင်အစိုးရ အဆက်ဆက်က လစ်လျူရှုခဲ့သော ချင်းပြည် (Chinland) အတွင်း နှစ်ပေါင်းရာချီ တည်ရှိနေသော မျိုးနွယ်စုနှင့် ဒေသများကို အခြေခံ ထူထောင်ပြီး ဒေသန္တရ အစိုးရများကို မြို့နယ်နှင့် ဒေသ ဟူ၍ ၁၉ ခုအဖြစ် ဖွဲ့စည်းလိုက်ခြင်းဖြစ်သည်။
လက်ရှိတွင် ချင်းပြည်ကောင်စီ၏ အုပ်ချုပ်ရေးစနစ်က လူဦးရေ နှစ်သိန်းခွဲကျော်ကို လွှမ်းခြုံထားပြီး နယ်မြေအားဖြင့် စတုရန်းကီလိုမီတာ ၃၀,၀၀၀ ခန့် ကျယ်ဝန်းကာ အိန္ဒိယနိုင်ငံနှင့် ကီလိုမီတာ ၄၀၀ ကျော် နယ်နိမိတ်ချင်း ထိစပ်နေ သည်ဟု အစီရင်ခံစာမှာ ဖော်ပြထားသည်။
လတ်တလောတွင် ချင်းအင်အားစုများအတွင်း ရင်ဆိုင်ကြုံတွေ့နေရသော အမြင်မတူကွဲပြားမှုများကို ကျော်လွှာပြီး ချင်းအမျိုးသားတည်ဆောက်ရေးအတွက် ချင်းပြည်ကောင်စီက ဦးစားပေး ဆောင်ရွက်နေသည်ဟု ချင်းပြည်ကောင်စီ အတွင်းရေးမှူး Salai Kep Chin Thang က အစီရင်ခံစာ၏ အမှာစာမှာ ရေးသားထားသည်။
ချင်းပြည်ကောင်စီ၏ မြို့နယ်နှင့် ဒေသ အစုအဖွဲ့ ၁၉ ခုတွင် ကြားကာလချင်းအမျိုးသားအတိုင်ပင်ခံကောင်စီ (ICNCC) နှင့် ချင်းညီနောင် (CB) တို့၏ မြို့နယ်နှင့် ဒေသအစုအဖွဲ့များနှင့် ထပ်နေမှု ရှိ၊ မရှိကို မသိရသေးပေ။
ချင်းပြည်ကောင်စီကို ၂၀၂၀ အထွေထွေရွေးကောက်ပွဲတွင် ရွေးကောက်တင်မြှောက်ခြင်း ခံရပြီး စစ်အာဏာရှင်တော် လှန်ရေးမှာ ပူးပေါင်းပါဝင်သော ချင်းလွှတ်တော်အစုအဖွဲ့၊ ချင်းအမျိုးသားတပ်ဦး (CNF) အစုအဖွဲ့နှင့် မြို့နယ်နှင့် ဒေသအစုအဖွဲ့တို့ဖြင့် စုပေါင်းတည်ထောင်ထားပြီး ချင်းပြည်ကောင်စီ ဦးဆောင်မှုအဖွဲ့ကို လူပုဂ္ဂိုလ် ၂၅ ဦးဖြင့် ဖွဲ့စည်းထားသည်ဟု သိရသည်။
