(006SV)
ချင်းတော်လှန်ရေးအင်အားစုအချင်းချင်ကြား လက်နက်ဖြင့် ဖြေရှင်းမှုကို အမြန်ဆုံးရပ်တန့်ပြီး နိုင်ငံရေးနည်းလမ်းဖြင့် ဆွေးနွေးအဖြေရှာရန် အမျိုးသားညီညွတ်ရေးအတိုင်ပင်ခံကောင်စီ – NUCC က ပါဝင်ကူညီဆောင်ရွက်ပေးရန် အသင့်ရှိကြောင်း ကြေညာသည်။
ယနေ့ ဇူလိုင်လ ၈ ရက်တွင် ချင်းပြည်တော်လှန်ရေး မိတ်ဖက်အင်အားစုများနှင့် ပတ်သက်၍ ပန်ကြားချက်ဟူ၍ အမျိုးသားညီညွတ်ရေးအတိုင်ပင်ခံကောင်စီ – NUCC က ထုတ်ပြန်လာခြင်းဖြစ်သည်။
ချင်းပြည်တော်လှန်ရေး မိတ်ဖက်အင်အားစုများအနေဖြင့် တော်လှန်ရေးနှင့် ပြည်သူများ၏ အကျိုးစီးပွားကို ဦးထိပ်ထား၍ အချင်းချင်းကြား လက်နက်စွဲကိုင် ဖြေရှင်းမှုများကို အမြန်ဆုံးရပ်တန့်ပြီး နိုင်ငံရေးနည်းလမ်းဖြင့် ဆွေးနွေးအဖြေရှာကြပါရန် NUCC က မေတ္တာရပ်ခံ တောင်းဆိုသည်။
လိုအပ်ပါက ပဋိပက္ခဖြေရှင်းရေး ညှိနှိုင်းမှုများတွင် အမျိုးသားညီညွတ်ရေး အတိုင်ပင်ခံကောင်စီအနေဖြင့် ပါဝင်ကူညီဆောင်ရွက်သွားရန် အသင့်ရှိပါကြောင်းလည်း ပဋိပက္ခဖြစ်ပွားနေသော ချင်းအင်အားစုများကို အသိပေးသည်။
ချင်းပြည်တော်လှန်ရေး မိတ်ဖက် အင်အားစုများအကြား လတ်တလော ဖြစ်ပွားနေသော သဘောထားကွဲလွဲမှုများနှင့် နောက်ဆက်တွဲ ပွတ်တိုက်မှုမျာကို NUCC အနေဖြင့် အလွန်အမင်း စိုးရိမ်ပူပန်မိသည်ဟု ထုတ်ပြန်သည်။
ဇူလိုင်လ ၂ ရက်မှ စတင်ခဲ့သည့် ချင်းလဲန်းကောင်စီအဖွဲ့ဝင် CDF – ဟွာလ်ငိုးရမ်း နှင့် ချင်းညီနောင်အဖွဲ့ဝင် CNDF တို့ကြားက မျိုးနွယ်စုနှင့် ဒေသအရေးပဋိပက္ခသည် အပြန်အလှန်ပစ်ခတ်မှုများဖြစ်ပွားပြီးနောက် ချင်းအင်အားစုများအကြား နယ်မြေများ အပြန်အလှန်သိမ်းလာကြကာ စစ်ရေးပဋိပက္ခမှာ ပိုမိုကျယ်ပြန့် ပြင်းထန်လာနေသည်။
