(03PT)
ချင်းပြည်နယ် ဖလမ်းမြို့နယ်တွင် အခြေစိုက်လှုပ်ရှားနေသော ချင်းအမျိုးသားအဖွဲ့ချုပ် (CNO/CNDF) သည် မကြာသေးခင်ရက်ပိုင်းက CNDF စစ်ဦးစီးချုပ်ရာထူး အပြောင်းအလဲပြုလုပ်ခဲ့ကြ သည်ဟု သိရသည်။
CNDF တွင် ယခင်က စစ်ဦးစီးချုပ်ရာထူးထမ်းဆောင်ခဲ့သော် Salai Peter Thang သည် ချင်းအမျိုးသားအဖွဲ့ချုပ် (CNO) ၏ ဒု ဥက္ကဌ (၁) ရာထူးပေးအပ်ခံရပြီးနောက် လစ်လပ်သွားသော CNDF စစ်ဦးစီးချုပ်ရာထူးအတွက် Salai Daniel ကို သြဂုတ်လ ၂၆ ရက်နေ့က ခန့်အပ်လိုက်ကြောင်း CNDF က ထုန်ပြန်သည်။
“ချင်းအမျိုးသားအဖွဲ့ချုပ်ရဲ့ ဒုဥက္ကဌ ၁ နေရာကို ယုံယုံကြည်ကြည်ပေးအပ်ကြတဲ့ ဗဟိုကောင်စီ အဖွဲ့ဝင်များကို အထူးကျေးဇူးတင်ရှိပါတယ်။ အဖွဲ့ချုပ်က ပေးအပ်တဲ့ ချင်းအမျိုးသားရေးတာဝန်ကို ဆထက်တပိုး ထမ်းဆောင်သွား ပါမယ်လို့လည်း ဂတိပြုအပ်ပါတယ် ယခင် ဒုဥက္ကဌ ၁ သည် အမျိုးသားရေး တာဝန်ထမ်းဆောင်ရင်း တိုင်းပြည်အတွက် အသက်ပေးဆပ်ခဲ့ရာ ၎င်းနေရာလစ်လပ်သဖြင့် လစ်လပ်နေရာတွင် တာဝန်ပေးခဲ့ကြခြင်း ဖြစ်ပါတယ်’’ ဟု Salai Peter Thang က ၎င်း၏ လူမှုကွန်ယက်စာမျက်နှာတွင်ရေးသားသည်။
ချင်းအမျိုးသားအဖွဲ့ချုပ် CNO သည် နိုင်ငံရေးဦးဆောင်ပါတီဖြစ်ပြီး CNDF မှာ သူ၏ လက်နက်ကိုင်တပ်ဖွဲ့ ဖြစ်သည်။
ယခု စစ်ဦးစီးချုပ်သစ်အဖြစ်ခန့်အပ်ခံရသော Salai Daniel သည် ယခင်က ကျောင်းဆရာတစ်ဦးဖြစ်ပြီး ၂၀၂၁ ခုနှစ် စစ်အာဏာသိမ်းမှုဖြစ်ပွားပြီးနောက်ပိုင်း CDM လှုပ်ရှားမှုတွင်ပါ၀◌င်လာကာ လက်နက်ကိုင်တပ်ဖွဲ့ထဲ ၀◌င်ရောက်ပြီး CNDF စတင်ဖွဲ့စည်းအချိန်ကတည်းကပင် ပါ၀◌င်လာသူနှင့် တပ်မဟားမှူး (၁) ရာထူး ထမ်းဆောင်နေသူဟု သိရသည်။
Salai Daniel သည် CNDF တပ်မဟာမှူး ၁ ရာထူးတာဝန်ထမ်းဆောင်နေချိန်အတွင်း ကလေးမြို့နယ် နတ်ချောင်းကျေးရွာ တိုက်ပွဲအပါဝင် တိုက်ပွဲပေါင်းများစွာကို အောင်မြင်စွာဖော်ဆောင်နိုင်ခဲ့သည့်အပြင် လွန်ခဲ့သည့် ဧပြီလ ၁၀ ရက်နေ့ ဖလမ်းမြို့နယ် ဗာရ်ကျေးရွာရှိ စစ်ကောင်စီစခန်းကို စစ်ရေးနည်းဗျူဟာ ပြောင်မြောက်စွာ သိမ်းပိုက်လိုက်နိုင်ခဲ့မှုတွင်လည်း အဓိကဦးဆောင်သူတစ်ဦးဖြစ်သည်။
၂၀၂၁ နွေဦးတော်လှန်ရေး စတင်ပေါ်ပေါက်ချိန်တွင် ဖလမ်းမြို့နယ်အတွင်းရှိ ချင်းလူမျိုးများနှင့် ဖလမ်းမြို့နယ်မှ အထက်ချင်းတွင်း ဒေသ သို့ ရွေ့ပြောင်းနေထိုင်သော ချင်းလူမျိုးက CNDF ကို ၂၀၂၁ ဧပြီလတွင် စတင်ဖွဲ့စည်းပြီး တိုက်ပွဲပေါင်း ၁၃၀ ကျော် ဆင်နွှဲထားပြီဟုသိရသည်။
