(006SV)
ငလျင်ဘေးဒဏ်သင့်ပြည်သူများ၏ ပြန်လည်ထူထောင်ရေးလုပ်ငန်းများနှင့် လူသားချင်းစာနာထောက်ထားမှု အကူအညီ ပေး အပ်ရေးအတွက် ပြည်သူများနှင့်အတူ ပူးပေါင်းဆောင်ရွက်သွားမည်ဟု ချင်းအမျိုးသားတပ်ဦး – CNF က ကြေညာသည်။
မတ်လ ၂၈ ရက် လှုပ်ခတ်ခဲ့သော ငလျင်ကြောင့် နိုင်ငံတဝန်းမှ ပြည်သူ ၂၅၀၀ ထက်မနည်း သေဆုံးခြင်း၊ ဘာသာရေးဆိုင်ရာ အဆောက်အဦးများနှင့် အိုးအိမ်များ ပြိုကျ ပျက်စီးခြင်း၊ လမ်းတံတား အခြေခံအဆောက်အအုံများ ပျက်စီးဆုံးရှုံးမှုအပေါ် မြန်မာလူထုနှင့် ထပ်ထူထပ်မျှ ကြေကွဲဝမ်းနည်းရသည်ဟု ဆိုသည်။
မြေငလျင်ဘေးသင့် နေရာအရပ်များမှာ နေထိုင်၊ ခိုလှုံနေကြသော ချင်းအမျိုးသားလူထုအတွက်လည်း အောက်မေ့သတိရလျက်ရှိ သည်ဟု CNF က မတ်လ ၃၁ ရက်မှာ ထုတ်ပြန်သည်။
ပြည်သူများ၏ ငလျင်ဘေးအန္တရာယ် အရေးပေါ်ကာလမှာပင် စစ်ကောင်စီသည် လေကြောင်းတိုက်ခိုက်မှုများ ဆက်လက် လုပ်ဆောင်နေပြီး ငလျင်ကြောင့် ပြည်သူ အများအပြား သေဆုံးမှုများ ဆက်လက်ရှိနေချိန်မှာ လေကြောင်းတိုက်ခိုက်မှုကို ချက်ချင်းရပ်တန့်ရန် CNF က တောင်းဆိုတိုက်တွန်းသည်။
ငလျင်ဘေးဒဏ်သင့် ပြည်သူထံသို့ လူသားချင်း စာနာထောက်ထားမှု အကူအညီများ အပြည့်အဝ ရရှိရေး၊ ဘက်လိုက်မှု ကင်းသော လူသားချင်း စာနာထောက်ထားမှု ပေးအပ်ရေး၊ နိုင်ငံတကာ သတင်းမီဒီယာများမှ မြေပြင်အခြေအနေ သတင်းမှန်ကို လွတ်လပ်စွာ ရယူနိုင်ရေးတို့ကိုလည်း ချင်းအမျိုးသားတပ်ဦးက တောင်းဆိုသည်။
လူသားချင်း စာနာထောက်ထားမှု အကူအညီများ ပေးအပ်ဆောင်ရွက်ရာတွင် နိုင်ငံရေးအမြတ်ထုတ်မှု မရှိစေရေးတို့အတွက် စစ်ကောင်စီနှင့် သက်ဆိုင်သူများကိုလည်း CNF က တိုက်တွန်းသည်။
လူသားချင်း စာနာထောက်ထားမှု အကူအညီများ ပေးအပ်နေသော နိုင်ငံတကာအသိုင်းအဝန်းများ၊ ကယ်ဆယ်ရေး လုပ်ငန်းများတွင် ဝိုင်းဝန်ကူညီပေးနေသော နိုင်ငံတကာအဖွဲ့အစည်းများ၊ ပြည်တွင်း အဖွဲ့အစည်းအသီးသီးများ အားလုံးအပေါ် ကျေးဇူးတင်ရှိကြောင်း CNF က ထုတ်ပြန်သည်။
ချင်းပြည်အစိုးရကလည်း ငလျင်ဘေးဒဏ်သင့် ပြည်သူများ အရေးပေါ် လိုအပ်နေသော ဆေးဝါး၊ စားနပ်ရိက္ခာများကို ကူညီသွားမည်ဖြစ် မတ်လ ၃၀ ရက်က ထုတ်ပြန်ထားသည်။
မတ်လ ၂၈ မှာ စစ်ကိုင်းမြို့အနီးကို ဗဟိုပြု၍ အင်အားပြင်း ရစ်တာစကေး ၇.၇ ရှိသည် ငလျင်တခု လှုပ်ခတ်ခဲ့ပြီး ယင်းငလျင်နှင့် မိနစ်အနည်းအကြာမှာ မန္တလေးမြို့ တံတားဦးလေဆိပ်အနီးကို ရစ်တာစကေး ၆.၄ အင်အားပြင်း ငလျင် ထပ်မံလှုပ်ခတ်ခဲ့ကာ ဧပြီလ ၁ ရက် နံနက်ပိုင်းအထိ နောက်ဆက်တွဲ ငလျင်ငယ် အကြိမ်ပေါင်းများစွာ လှုပ်ခတ်နေသည်ဟု သိရသည်။
