လူမှုအထောက်အပံ့များ လွတ်လပ်စွာ ဖြန့်ဝေခွင့်ပြုရန် သက်ဆိုင်သူ အားလုံးကို ချင်းပြည်ကောင်စီ တောင်းဆို
(006SV)
ငလျင်ဘေးဒဏ်သင့်ဒေသက ပြည်သူများအတွက် အရေးပေါ်လိုအပ်လျက် ရှိသော ဆေးဝါးများ၊ စားနပ်ရိက္ခာများကို ကူညီထောက်ပံ့ပေးသွားမည်ဖြစ် ကြောင်း ချင်းပြည် (Chinland) အစိုးရက မတ်လ ၃၀ ရက်က ကြေညာသည်။
မတ်လ ၂၈ ရက်ကလှုပ်ခတ်သွားသည့် ငလျင်သည် အပြင်းထန်ဆုံးငလျင်အမျိုးအစားဖြစ်ပြီး ငလျင်ဒဏ်ကြောင့် မြန်မာပြည် သူလူထု အသက်အိုးအိမ်စည်းစိမ်း ထိခိုက် နစ်နာဆုံးရှုံးမှု အများဆုံးဖြစ်ကြောင်း တွေ့ရှိရသည် ထုတ်ပြန်သည်။
ငလျင်ဘေးဒဏ်ကြောင့် မြန်မာပြည်သူများအတွက် အရေးပေါ်လိုအပ်လျက် ရှိသော ဆေးဝါးများ၊ စားနပ်ရိက္ခာနှင့် ပြန် လည်နေရာချထားရေး လုပ်ငန်းများ ဆောင်ရွက်နိုင်ရန် ချင်းပြည်အစိုးရအနေဖြင့် အတတ်နိုင်ဆုံး ကူညီ ထောက်ပံ့ ပေးသွားမည်ဖြစ်ကြောင်း ချင်းပြည်(Chinland) အစိုးရအဖွဲ့က ထုတ်ပြန်သည်။
ချင်းပြည်ကောင်စီကလည်း ငလျင်ဘေးဒဏ်သင့် ပြည်သူများအတွက် အရေးပေါ် လူမှုအကူအညီများ ပံ့ပိုးပေးကြပါရန် နိုင်ငံတကာအစိုးရများ၊ နိုင်ငံတကာအဖွဲ့အစည်းများ၊ NGO နှင့် INGO များ၊ အရပ်ဖက်အဖွဲ့အစည်းများ၊ ပြည်တွင်း ပြည်ပရှိ မြန်မာပြည်သူများထံ မေတ္တာရပ်ခံချက်ကို မတ်လ ၃၀ ရက်က ထုတ်ပြန်သည်။
လူမှုအထောက်အပံ့များ လွတ်လပ်စွာ ဖြန့်ဝေခွင့် နှင့် နစ်နာသူများထံ အမှန်တကယ်ရောက်ရှိရေးကိုလည်း သက်ဆိုင်ရာသူအား လုံးကို ချင်းပြည်ကောင်စီက ထပ်ဆင့်မေတ္တာရပ်ခံ တောင်းဆိုသည်။
စစ်ကောင်စီကြောင့် ပြည်သူများ အသက်အိုးအိမ် စည်းစိမ်များ သေကြေဆုံးရှုံးနေချိန်တွင် သဘာဝကပ်ဘေးဆိုးကြီး ငလျင် ဒဏ်ကြောင့် တစ်ပူပေါ် နှစ်ပူဆင့် ထိခိုက်နစ်နာဆုံးရှုံးကြရသည့် မိဘပြည်သူများနှင့် ထပ်တူထပ်မျှ ဝမ်းနည်းရပါကြောင်း ချင်းပြည်ကောင်စီက ထုတ်ပြန်သည်။
မတ်လ ၂၈ မှာ စစ်ကိုင်းမြို့အနီးကို ဗဟိုပြု၍ အင်အားပြင်း ရစ်တာစကေး ၇.၇ ရှိသည် ငလျင်တခု လှုပ်ခတ်ခဲ့ပြီး ယင်းငလျင်နှင့် မိနစ်အနည်းအကြာမှာ မန္တလေးမြို့ တံတားဦးလေဆိပ်အနီးကို ရစ်တာစကေး ၆.၄ အင်အားပြင်း ငလျင် ထပ်မံလှုပ်ခတ်ခဲ့ကာ မတ်လ ၃၁ ရက် နံနက် ၆ နာရီအထိ နောက်ဆက်တွဲ ငလျင်ငယ် အကြိမ်ပေါင်းများစွာ ထပ်မံလှုပ်ခတ်ခဲ့သည်ဟု သိရသည်။
မတ်လ ၃၀ ရက် မြန်မာစံတော်ချိန် ည ၈ နာရီအထိ ငလျင်ကြောင့် နိုင်ငံတဝန်းမှာ သေဆုံးသူ ၁၇၀၀ ကျော်၊ ထိခိုက်ဒဏ်ရာ ရရှိသူ ၃၄၀၀ ကျော်နှင့် ပျောက်ဆုံးသူ ၃၀၀ ကျော် ရှိနေပြီဟု စစ်ကောင်စီက သတင်းထုတ်ပြန်ထားသည်။
