(006SV)
ချင်းပြည်နယ်၊ မင်းတပ်မြို့နယ်အတွင်း ယမန်နေ့ညသန်းခေါင်မှာ စစ်ကောင်စီက လေကြောင်း ဗုံးကြဲမှု ထပ်မံပြုလုပ်ပြီး မင်းတပ်မှာ လေကြောင်းတိုက်ခိုက်မှု ပိုပြုလုပ်လာကြောင်း ဒေသခံများက ပြောသည်။
ဩဂုတ်လ ၂၀ ရက် နံနက် ၂ နာရီခန့်တွင် မင်းတပ်မြို့ အနောက်ခြမ်း တစ်နေရာနှင့် တိုက်နယ် ၃ ဘက်က တစ်နေရာတို့ကို ဂျက်ဖိုက်တာများဖြင့် လေကြောင်းတိုက်ခိုက်မှုများ ပြုလုပ်ခဲ့ပြီး ပြည်သူများ ထိခိုက်မှု မရှိသော်လည်း အဆောက်အဦးတချို့ ထိခိုက်ပျက်စီးသွားကြောင်း ဒေသခံများက ပြောသည်။
“ည ၂ နာရီ ပတ်ဝန်းကျင်မှာ လေကြောင်းက ရောက်လာပြီးမှ အနောက်ဘက်ခြမ်းက ကျေးရွာတစ်ခုက စာသင်ကျောင်းဘက်ကို ဗုံးကြဲတယ်လို့ သတင်းကြားတယ်။ လူထိခိုက်မှုကတော့ မရှိဘူး။ အဆောက်အဦးက ထိခိုက်မိတယ်လို့ ကြားတယ်” ဟု မင်းတပ်မြို့ခံတစ်ဦးက ပြောသည်။
မင်းတပ်မြို့ တိုက်နယ် (၁) နှင့် မကွေးတိုင်း၊ ကျောက်ထုနယ်အစပ်က တစ်နေရာကိုလည်း ညသန်းခေါင်ကျော် ၂ နာရီ ၂၀ ခန့်တွင် လေကြောင်းတိုက်ခိုက်မှုများ ထပ်မံပြုလုပ်ခဲ့ပြီး ပြည်သူတချို့ သေဆုံးမှု ရှိကြောင်း ဒေသခံက ပြောသည်။
“အဲဘက်မှာ လူ ၃ ဦးလောက်တော့ သေတယ်လို့ သတင်းကြားတယ်။ အတည်တော့ မပြုနိုင်သေးဘူး။ ချင်းပြည်နယ်နဲ့ မကွေးတိုင်း အစပ်က လူငယ်စခန်းကို ကြဲတယ်လို့ သတင်းကြားမိပါတယ်” ဟု မင်းတပ်မြို့ ဒေသခံက ပြောသည်။
တိုက်နယ် ၁ နှင့် ယောအစပ်က တစ်နေရာကို ယမန်နေ့ညက လေကြောင်းတိုက်ခိုက်မှု ပြုလုပ်ရာတွင် သေဆုံးထိခိုက်ပျက်စီးမှုများရှိသည်ဟု Hkl Mindat ထံမှလည်း သိရသည်။
ယမန်နေ့ ဩဂုတ်လ ၁၉ ရက်ကလည်း မင်းတပ်မြို့ ခလရ – ၂၇၄ တပ်ရင်းမှ ၁၂၀ မမ လက်နက်ကြီးဖြင့် တိုက်နယ် ၄ ဘက်သို့ ၂ ကြိမ် ပစ်ခတ်တိုက်ခိုက်မှု ပြုလုပ်ခဲ့ရာ သေဆုံးထိခိုက်ပျက်စီးမှုများ ရှိသည်ဟု ဒေသခံများက ပြောသည်။
ချင်းညီနောင်အဖွဲ့နှင့် အာရက္ခတပ်တော် AA/ULA တို့သည် မင်းတပ်မြို့သိမ်းတိုက်ပွဲကို စတင်ဆင်နွှဲရန် ပြင်ဆင်နေသည်ဟု သတင်းတွေ ထွက်ပေါ်နေပြီးနောက် စစ်ကောင်စီက မင်းတပ်မြို့နယ်အတွင်း လေကြောင်းတိုက်ခိုက်မှုများ ရက်ဆက်ပြုလုပ်လာနေကြောင်း ဒေသခံများက ပြောသည်။
ယနေ့ မင်းတပ်မြို့ပေါ်တွင် ကျောင်းပုံမှန် ဖွင့်ထားပြီး ဈေးရောင်သူများ၊ ဥယျာဉ်ခြံသွားလုပ်သူများဖြင့် ပုံမှန်အခြေအနေ ရှိနေသေးကြောင်း သိရသည်။
စစ်ကောင်စီသည် မင်းတပ်မြို့နယ်အတွင်း လေကြောင်းတိုက်ခိုက်မှု ဆက်တိုက်ပြုလုပ်နေသောကြောင့် လူစုလူဝေးပြုလုပ်ခြင်း၊ မိမိနေအိမ်များအနီး အိမ်အောက်မဟုတ်သည့် နေရာ၌ ပုန်းခိုစရာနေရာများ သေချာပြင်ဆင်ခြင်း၊ မိမိအန္တရယ်ကင်းရန် သတင်းများကို အုပ်ချုပ်ရေးမှူး သို့မဟုတ် တာဝန်ရှိသူများထံသာ မေးမြန်းခြင်း၊ အများပြည်သူများစိတ်သောက ရောက်စေသည့် သတင်းမှားဖြန့်ဝေခြင်းများ မပြုလုပ်ကြရန် CDF-Mindat က သတိပေးထုတ်ပြန်ထားသည်။
