ချင်းပြည်နယ်၊ တီးတိန်မြို့နယ်၊ ဟိုင်မွာလ်ရွာသစ်ကို စစ်ကောင်စီတပ်ဖွဲ့က သြဂုတ်လ ၁၄ ရက်နေ့ ညနေပိုင်း ၃ နာရီခွဲကျော်ကျော်ခန့်က မီးရှို့ခဲ့ရာတွင် လူနေအိမ်ခြေ ၁၅ လုံးခန့် လောင်ကျွမ်းခဲ့သည်ဟု ဒေသခံများထံမှ သိရသည်။
ထို့အပြင် စစ်ကောင်စီတပ်ဖွဲ့များ ရွာထဲသို့ဝင်ရောက်လာပြီးနောက် ပြည်သူတချိူ့ကို ဖမ်းဆီးကာ ပြန်လွှတ်ပေးခဲ့သော်လည်း အသက် ၁၇ နှစ်အရွယ်ရှိသော မ Lalnunpuii နှင့် မောင်ဖြစ်သူ အသက် ၁၅ နှစ်အရွယ် Lalruatmawia တို့နှစ်ဦးကို ဆက်လက်ဖမ်းဆီးထားဆဲဟု ဟိုင်မွာလ်ဒေသခံတစ်ဦးက ပြောသည်။
ဟိုင်မွာလ်ရွာသစ်သည် အိန္ဒိယ-မြန်မာနယ် နယ်စပ်ကုန်သွယ်ရေးလမ်း ကလေး-တီးတိန်-ရိ ကားလမ်းမပေါ်တွင်တည်ရှိသော ကျေးရွာဖြစ်ပြီး ယခုလက်ရှိတွင် ရွာသားအားလုံးသည် တဖက်မီဇိုရမ်ပြည်နယ်သို့ ထွက်ပြေးတိမ်းရှောင်ကြရသည်ဟု သိရသည်။
အင်အား ၃၀ ခန့်ရှိသော စစ်ကောင်စီတပ်ဖွဲ့သည် ဟိုင်မွာလ်ကျေးရွာသို့ ယနေ့တိုင် စခန်းချရှိနေသေးကြောင်း သိရသည်။
ချင်းပြည်သူ့ကာကွယ်ရေးတပ်ဖွဲ့တစ်ခုဖြစ်သည့် CDF-Hualngoram တပ်ဖွဲ့ကလည်း ယနေ့ သြဂုတ်လ ၁၅ ရက်နေ့ကစ၍ ကလေးမြို့နှင့် ရိခေါဒါရ်မြို့အကြား မော်တော်ယာဉ်လိုင်းပြေးဆွဲမှုကို နယ်မြေလုံခြုံရေးအရ ခေတ္တပိတ်ပင်လိုက်ကြောင်း အသိပေးထုတ်ပြန်ထားသည်။
