ကချင်ပြည်နယ် ဖားကန့်မြို့နယ်တွင် စစ်ကောင်စီတပ်ဖွဲ့က လေကြောင်းမှ တိုက်လေယာဉ်ဖြင့် ဗုံးကြဲတိုက်ခိုက်မှုသည် အလွန်စက်ဆုပ်ရွံရှာဖွယ်ကောင်းသောလုပ်ရပ်ဖြစ်ပြီး စစ်ရာဇဝတ်မှုကို ပြောင်ပြောင်တင်းတင်း ကျူးလွန်ခြင်းဖြစ်သည်ဟု ကြားကာလ ချင်းအမျိုးသားအတိုင်ပင်ခံကောင်စီ ICNCC ပြောဆိုလိုက်သည်။
ယမန်နေ့ အောက်တိုဘာ ၂၃ ရက်ည ၈ နာရီခန့်က ဖားကန့်မြို့နယ် KIO/KIA တပ်မဟာ ၉ နယ်မြေရှိ အနန်ပါတွင် KIO/KIA ဖွဲ့စည်းတည်တောင်ခြင်း အထိမ်းအမှတ်နေ့ အကြိုဂီတပွဲကျင်းပပြုလုပ်နေကြစဉ် စစ်ကောင်စီမှ တိုက်လေယာဉ်အသုံးပြုကာ ဗုံးကြဲတိုက်ခိုက်ခဲ့ခြင်းဖြစ်သည်။
ယင်းဗုံကြဲတိုက်ခိုက်မှုကြောင့် ကချင်းတိုင်းရင်းသား အနုပညာရှင်များ၊ လုပ်ငန်းရှင်များနင့် ပြည်သူများ အနည်းဆုံး ယောက် ၅၀ ခန့် သေဆုံးခဲ့ပြီး၊ အရေအတွက်ဆယ်ချီ ထိခိုက်ဒဏ်ရာရရှိခဲ့ကြောင်း ဒေသခံသတင်းများတွင် ရေးသားဖော်ပြချက်နင့် KIO/KIA ပြောရေးဆိုခွင့်ရှိသူ၏ ပြောပြချက်များမှ ကြားသိရသဖြင့် များစွာ ဝမ်းနည်းစိတ်မကောင်းဖြစ်ရသည်ဟု ကြားကာလ ချင်းအမျိုးသားအတိုင်ပင်ခံကောင်စီက ဆိုသည်။
“ယခုလို ပြုမှုခြင်းသည် စစ်ကောင်စီအနေဖြင့် တိုင်းရင်းသားပြည်သူလူထုများအား အမြစ်ပြတ်ချေမှုန်းရေး ရည်ရွယ်ချက်များဖြင့် ဆောင်ရွက်နေခြင်းဖြစ်ပြီး အလွန်ပင် စက်ဆုပ်ရွံရှာဖွယ်ကောင်းသောလုပ်ရပ်ဖြစ်သဖြင့် ပြင်းထန်စွာရှုတ်ချသည်” ဟု ICNCC ၏ ထုတ်ပြန်ချက် ဖော်ပြထားသည်။
စစ်ကောင်စီ၏ ရက်စက်ယုတ်မာသောလုပ်ရပ်ကြောင့် အသက်သေဆုံးခဲ့ကြရသူများ၏ ကျန်ရစ်သူမိသားစုများအပါဝင် ကချင်တိုင်းရင်းသားညီအစ်ကိုမောင်နှမများနှင့် ထပ်တူရပ်တည်လျှက်ရှိနေကြောင်း ကြားကာလ ချင်းအမျိုးသား အတိုင်ပင်ခံကောင်စီက ဆိုသည်။
