(006SV)
စစ်အာဏာရှင်စနစ်အမြစ်ပြတ်ချေမှုန်းရေးအတွက် စစ်ရေး၊ နိုင်ငံရေးလှုပ်ရှားဆောင်ရွက်မှု ပိုမိုအားကောင်းလာစေရန် တပ်စုဖွဲ့မှု ပုံစံ၊ တန်းမြင့်သင်တန်းများနှင့် မဟာဗျူဟာကျသည့် စီမံချက်များပြင်ဆင်နေပြီဟု PDF-Zoland က ပြောဆိုသည်။
မတ်လ ၃၀ ရက်နေ့တွင် ကျရောက်သော ဇိုမီးဖက်ဒရယ်အစည်းအရုံး (ZFU/ PDF – Zoand) တည် ထောင်ခြင်း ၄ နှစ်ပြည့် ကြေညာချက်မှာ ယခုကဲ့သို့ အသိပေးလာခြင်းဖြစ်သည်။
ချင်းပြည်နယ်တွင် ချင်းညီနောင်၊ မဟာမိတ်အင်အားစုတပ်များနှင့်အတူ တိုက်ပွဲဝင်ရင်း အောင်မြင်မှု များစွာ ရရှိထားသကဲ့သို့ ဇိုမီးလက်နက်ကိုင် တပ်ဖွဲ့ တရပ်အနေဖြင့် စစ်ရေးအတွေ့အကြုံ များစွာရရှိခဲ့ပြီးနောက် အားကောင်း၍ စနစ်ကျသည့် တပ်စုဖွဲ့မှု ပုံစံဖြစ်လာပြီဟု ဇိုမီးဖက်ဒရယ်အစည်းအရုံးက မတ်လ ၃၀ ရက်မှာ ကြေညာသည်။
ချင်းပြည်နယ်အဆင့် စစ်ရေး၊ နိုင်ငံရေး လှုပ်ရှားမှုတွင် ကြားကာလချင်းအမျိုးသားအတိုင်ပင်ခံကောင်စီ (ICNCC)၊ ချင်းညီနောင်တို့နှင့် လက်တွဲကာ စစ်အာဏာရှင်စနစ်လက်အောင်မှ ချင်းပြည်တခုလုံး လွတ်မြောက်သည်အထိ ဆက်လက်ကြိုးပမ်းသွားမည်ဟု ဇိုမီးဖက်ဒရယ်အစည်းအရုံး က ထုတ်ပြန်သည်။
ဇိုမီးဖက်ဒရယ်အစည်းအရုံးကို (ZFU/ PDF – Zoland) ကို စစ်အာဏာသိမ်းမှု ဆန့်ကျင်တော်လှန်နေသည့် တွန်းဇံ၊ တီးတိန်၊ ကလေးနှင့် နိုင်ငံအသီးသီးရှိ တော်လှန်ရေးတွင် ပါဝင်လှုပ်ရှားနေသော ခေါင်းဆောင်များက ၂၀၂၁ မတ်လ ၃၀ ရက်က စတင် ဖွဲ့စည်းခဲ့ပြီး ယမန်နေ့က တည်ထောင်ခြင်း ၄ နှစ်ပြည့်ပြီးဖြစ်သည်။
ယမန်နေ့ မတ်လ ၃၀ ရက်က ကျင်းပသော PDF – Zoland ၏ စစ်ရေးပြအခမ်းအနားတွင်လည်း တော်လှန်ရေးရဲဘော် အင်အား ၁၀၀ ကျော်ဖြင့် ကျင်းပခဲ့သည်ဟု ZFU က ရုပ်သံနှင့် ထုတ်ပြန်သည်။
အင်အား ၃၀ ဝန်းကျင်ရှိသော အမျိုးသမီးရဲဘော် တပ်စိတ်တွင် အမျိုးသမီးစနိုက်ဘာ ၁၀ ဦးခန့် ပါဝင် စစ်ရေးပြခဲ့ပြီး ပခုံထမ်းလောင်ချာ များကိုလည်း တပ်စိတ်တစ်စိပ်ဖြင့် ပါဝင်ပြသခဲ့သည်။
ဇိုးလဲန်း ဒေသနှင့် အနာဂါတ်သည် ZFU/ PDF – Zoland တပ်ဖွဲ့၏ လက်ထဲတွင် ရှိနေပြီး မြို့သိမ်းတိုက်ပွဲများ အတွက် လိုအပ် ချက်များကို ရဲဘော်များအနေဖြင့် ပြင်ဆင်ထားရန် စစ်ရေးပြအခမ်းအနားတွင် PDF – Zoland တာဝန်ရှိသူက ပြောသည်။
“ကျနော်တို့ ဇိုးလန်ဒေသမှာဆိုရင် ကျနော်တို့ ဇိုမီးရဲ့ အနာဂါတ်ကို ကျနော်တို့ လက်ထဲမှာပဲ ရှိတယ်။ လက်ရှိ မျက်နှာမူနေတဲ့ ငါတို့မြို့ ငါတို့ သိမ်းဖို့ ၊ ကျနော်တို့ CB (ချင်းညီနောင်) အနေနဲ့ လက်ရှိ ဖလမ်းမြို့သိမ်းတိုက်ပွဲကို အသည်းအသန် ကြိုးစားအား ထုတ်နေတဲ့ ကာလလည်းဖြစ်တယ်။ ထိုနည်းအတူ ကျနော်တို့ CB ရဲ့ စစ်ဆင်ရေးအရ မြို့သိမ်းတိုက်ပွဲကို နေ့မအား၊ ညမအား ကြိုးစားအားထုတ်နေတဲ့အချိန် ဖြစ်တယ်။ ရဲဘော်တွေအနေနဲ့ ကျနော်တို့ မြို့ကို သိမ်းဖို့ ဘာတွေ ပြင်ဆင်ရမလဲ၊ လိုအပ်နေတာ ဘာလဲ စဉ်းစားဖို့ လိုပါတယ်။ ငါတို့မြို့ကို ငါတို့ သိမ်းပြီးသွားရင် ငါတို့ဒေသ လွတ်မြောက်သွားမှာဖြစ်ပါတယ်။ ချင်းပြည်နယ်ရဲ့ အနာဂါတ်ဟာ ချင်းညီနောင်ရဲ့ စစ်ဆင်ရေးအပေါ်မှာလည်း အများကြီး မူတည်နေပါတယ်” ဟု PDF – Zoland တာဝန်ရှိသူက ပြောသည်။
ပြည်တွင်းပြည်ပ ပြည်သူများအနေဖြင့် မိမိတို့ ရည်မှန်းချက်များ အောင်မြင်သည်အထိ ဆက်လက်ပံ့ပိုးကူညီပေးကြပါရန် ZFU/ PDF – Zoland က မေတ္တာရပ်ခံထားသည်။
စစ်ရေး၊ နိုင်ငံရေး တိုးတက်ပြောင်းလဲမှုအပေါ် မိမိတို့ လိုလားသည့် လွတ်လပ်ရေး၊ တန်းတူးရေး၊ တရားမျှတရေး နှင့် ကိုယ်ပိုင်ပြဌာန်းခွင့်တို့ကို အပြည့်အဝ အာမခံသည့် ဖက်ဒရယ်ပြည်ထောင်စု တည်ဆောက်ရေးတွင် အခြားတိုင်းရင်းသားများနှင့်အတူ လက်တွဲကာ အကောင်အထည်ဖော်သွားမည်ဟု ဆိုသည်။
တော်လှန်ရေး ၄နှစ်တာအတွင်း အသက်ပေးသွားသော သူရဲကောင်းများ၊ ခြေလက်အင်္ဂါဆုံးရှုံးသူများ၊ ပိုင်ဆိုင်မှုဆုံးရှုံးသူများနှင့် အာဏာဖီဆန်ရေးလှုပ်ရှားမှုတွင် ပါဝင်သော နိုင်ငံ့ဝန်ထမ်းများကို လေးစား အသိအမှတ်ပြုကြောင်း ထုတ်ပြန်သည်။
