(002MG)
ချင်းပြည်နယ်၊ တီးတိန်မြို့အခြေစိုက် ၂၆၉ တပ်ရင်းမှ စစ်ကောင်စီတပ်သား (၂) ဦးသည် ဖေဖော်ဝါရီလ ၁၇ ရက်နေ့တွင် ခဲယမ်းတချို့နှင့်အတူ CDF- CDM Siyin ထံ အလင်းဝင်လာသည်ဟု CDF-CDM Siyin စစ်ဦးစီးချုပ် ကိုထောင်းပူက ပြောသည်။
“မနေချင်တော့ဘူးလို့ သူတို့က ဆက်သွယ်လာတာကြာပြီ၊ မနေ့ကပဲ တီးတိန် ၂၆၉ တပ်ရင်းကနေ ဆိုင်ကယ်နဲ့ စျေးဝယ်ထွက်လာရင်းနဲ့ ကျွန်တော်တို့က မြို့အဝင်မှာ တဝက်လောက်မှာ သွားကြိုတာပေါ့။ ကျွန်တော်တို့က ကျည်ဆံတွေဆိုရင်လည်း အပြင်မှာပြန်ဝယ်ရတယ်ဆိုတော့ သူတို့ကိုလည်း ဆုပေးမယ်။ သူတို့က ရန်ကုန်၊ မန္တ လေးဖက်ကဆိုတော့ အခြေအနေကောင်းရင်သွားချင်ကြတာ။ အခုလည်း ဒီမှာပျော်ကြပါတယ် ကျွန်တော်တို့ရဲ ဘော်တွေနဲ့ အတူထားတာဆိုတော့ စားလဲအတူတူ၊သွားလည်းအတူတူပဲထားတယ်” ဟု ပြောသည်။
အလင်းဝင်လာသူ နှစ်ဦးမှာ တီးတိန်မြို့ (၂၆၉) တပ်ရင်းမှ တပ်သား ကျော်စောနိုင်နှင့် တပ်သား ဇော်လင်းတို့ ဖြစ်ကြပြီး လက်ပစ်ဗုံးနှစ်လုံးနှင့် ကျည်ဆန် ၃၀၀ ယူဆောင်လာကြသည်ဟု သိရသည်။
၎င်းတို့နှစ်ဦးသည် ၂၀၂၃ ခုနှစ် အောက်တို ဘာလတွင် မိခင်တပ်ရင်းဖြစ်သည့် ကလေးမြို့ ဒကစ (၈၉) တပ်ရင်းမှ တီးတိန်မြို့ (၂၆၉) တပ်ရင်းသို့ ပြောင်းရွေ့ တာဝန်ဆောင်နေကြသူများ ဖြစ်ကြသည်။
CDF CDM Siyin ထံသို့ ဆက်သွယ်ကာ အလင်းဝင်လာသူ စစ်ကောင်စီတပ်သား (၁၆) ဦးခန့်ရှိလာပြီး အလင်းဝင် လာသူများအား ထိုက်တန်စွာ ဆုချီးမြှင့်ခြင်း၊ မိမိသွားလိုရာနေရာများထံ သွားရောက်နိုင်ရန် စီမံဆောင်ပေးမှုများ လုပ်ဆောင်ပေးခဲ့ကြောင်း CDF CDM Siyin စစ်ဦးစီးချုပ်က ပြောသည်။
ထို့ကြောင့် စစ်ကောင်စီတပ်အတွင်းမှ အလင်းဝင်ရောက်လိုသည့် တပ်သားများအနေဖြင့် ဆက်သွယ်နိုင်ကြောင်း၊ မြို့တွင်းဖြစ်စေ၊ မည်သည့်နေရာတွင်ဖြစ် သွားရောက်ကြိုဆိုပေးမည်ဖြစ်သည့်အပြင် သွားလိုသည့်နေရာ၊ လုပ်လိုသည့် အလုပ်အကိုင်ကိုလည်း စိတ်တိုင်းကျ စီမံဆောင်ရွက်ပေးမည်ဖြစ်ကာ ကောင်းမွန်စွာ စောင့်ရှောက်ပေးဖြစ်ကြောင်း CDF CDM Siyin အသိပေးဖိတ်ခေါ်ထားသည်။
