တီးတိန်မြို့မှာ စစ်တပ်၏ ဒရုန်းဖြင့် ဗုံးကြဲမှုကြောင့် ၁၃ နှစ်အရွယ် ကလေးငယ်တစ်ဦး သေဆုံး
ချင်းပြည်နယ်၊ တီးတိန်မြို့နယ်အတွင်းရှိ တီးတန် နှင့် သိုင်းငင်းအကြား လေထန်ကုန်း၊ Akluai ကျေးရွာအနီးတွင် အာဏာသိမ်းစစ်တပ်နှင့် ချင်းတော်လှန်ရေးပူးပေါင်းတပ်ဖွဲ့တို့ တိုက်ပွဲဖြစ်ပွားနေကြောင်းသိရသည်။
အာဏာသိမ်းစစ်တပ်သည် သိုင်းငင်းကျေးရွာကနေ တီးတိန်မြို့ကို စစ်အင်အားဖြည့်တင်းရန် စစ်အင်အား ၂၀၀ ဝန်းကျင်ဖြင့် ချီတက်လာပြီး သိုင်းငင်း နှင့် တီးတိန်မြို့အကြား လေထန်ကုန်း နှင့် Akluai ကျေးရွာအနီးမှာ PDF-Zoland၊ CDF CDM Siyin ပူးပေါင်းတပ်ဖွဲ့ တွေက မေလ ၂ ရက်နေ့မှ စတင်တိုက်ခိုက်ရာမှာ ယနေ့မနက်ပိုင်းအထိ တိုက်ပွဲများဆက်လက်ဖြစ်ပွားနေကြောင်း မြေပြင် သတင်းရင်းမြစ်ထံကနေသိရသည်။
“သေနတ်သံတွေကတော့ တရစပ်ပဲ၊ ကောင်းကင်မှာလည်း ဂျက်ဖိုက်တာနဲ့ ချနေတာ။ စစ်တပ်က ကနေဒီတောင်ဘက်ကို သိမ်းဖို့ ကြိုးစားနေတာ။ ချင်းကာကွယ်ရေးတပ်ဖွဲ့တွေဘက်ကလည်း အပြင်းအထန် ခုခံနေတယ်။ ထိခိုက်မှုရှိနေတယ်လို့ သိရပေမဲ့ အသေးစိတ်တော့ မသိရသေးဘူး” ဟု မြေပြင်သတင်းအရင်းအမြစ်တစ်ဦးက ပြောသည်။
အာဏာသိမ်းအကြမ်းဖက်စစ်တပ်သည် တီးတိန်မြို့အနီး PDF Zoland ထိန်းချုပ်ထားသော ကနေဒီတောင်စခန်းကို သိမ်းပိုက်ဖို့ဦးတည်နေကြောင်း သိရသည်။
ထို့အပြင် မြို့သိမ်းတိုက်ပွဲများ ဖြစ်ပွားလာနိုင်သည့် အခြေအနေကြောင့် တီးတိန်မြို့ပေါ်ရှိ ပြည်သူအများစုမှာ နေအိမ်များကို စွန့်ခွာ၍ နီးစပ်ရာကျေးရွာများနှင့် စစ်ကိုင်းတိုင်း၊ ကလေးမြို့ဘက်သို့ ကြိုတင်ပြောင်းရွှေ့ တိမ်းရှောင်နေကြရသည်။
ပြီးခဲ့သည့် မေလ ၂ ရက်နေ့ မွန်းလွဲပိုင်းကလည်း တီးတိန်မြို့အခြေစိုက် ခလရ ၂၆၉ တပ်ရင်းက တီးတိန်မြို့အဝင် “တီးတိန်မြို့မှ ကြိုဆိုပါ၏” ဆိုင်းဘုတ်အနီး (ဒေသအခေါ် စိုင်မွလ် – SaiMual) ရှိ Zoland Petrol Pump ဓာတ်ဆီဆိုင်ကို ဒရုန်းဖြင့် ဗုံးကြဲတိုက်ခိုက်ရာမှာ အသက် ၁၃ နှစ်အရွယ်ကလေးငယ်တစ်ဦးသေဆုံးခဲ့သည်။
သေဆုံးသူမှာ အဆိုပါဓာတ်ဆီဆိုင်တွင် အလုပ်ကူလုပ်ပေးနေသည့် မောင်လျန်မွန်းကင်းမ် (Tg. Lian Muan Kim) ဖြစ်ပြီး ၎င်း၏အစ်ကိုဖြစ်သူမှာလည်း ထိခိုက်ဒဏ်ရာရရှိခဲ့သည်။
မောင်လျန်မွန်းကင်းမ်သည် အဆိုပါ ဆီဆိုင်တွင် အလုပ်လုပ်ကိုင်နေသည့် ၎င်း၏အစ်ကိုဖြစ်သူကိုယ်စား တစ်ရက်တာ သွားရောက်ကူညီလုပ်ကိုင်ပေးစဉ် ယခုကဲ့သို့ အာဏာသိမ်းစစ်တပ်၏ တိုက်ခိုက်မှုနှင့် ကြုံတွေ့ခဲ့ရခြင်းဖြစ်သည်ဟု သိရသည်။
ကွယ်လွန်သူ ကလေးငယ်အတွက် ဝမ်းနည်းခြင်းအထိမ်းအမှတ် အခမ်းအနားကို Cope Memorial Baptist Church (တီးတိန်) အသင်းတော်က ဦးဆောင်၍ မေလ ၃ ရက်၊ မွန်းလွဲ ၂ နာရီတွင် မြို့မရပ်ကွက်သင်္ချိုင်း၌ ဂူသွင်းသဂြိုဟ်ခဲ့ကြ သည်။
အာဏာသိမ်းစစ်တပ်သည် ယခုရက်ပိုင်းအတွင် ချင်းပြည်နယ်တွင် လေကြောင်းတိုက်ခိုက်မှုပိုမိုပြုလုပ်လာပြီး မေလ ၁ ရက်နေ့ မွန်းလွဲ ၃ နာရီ ၂၀ မိနစ်ခန့်ကလည်း ဖလမ်းမြို့နယ် ဟွာလ်ငိုးရမ်းဒေသ ခေါပွီးချစ်ပ်ရွာကို ပေါင် ၅၀၀ ဗုံး ၂ လုံးဖြင့် တိုက်ခိုက်ရာမှာ ကလေးငယ် ၆ ဦးနှင့် လူကြီး ၁ ဦး စုစုပေါင်း ၇ ဦး သေဆုံးကာ ၈ ဦး ဒဏ်ရာရရှိခဲ့ပြီး အနီးနားရှိ နေအိမ် ၁၀ လုံးထက်မနည်း ပျက်စီးခဲ့ရသည်။
