ချင်းပြည်နယ်တောင်ပိုင်း မင်းတပ်မြို့နယ်မှာ တိုက်ပွဲဖြစ်ပွားမှုတစုံတရာမရှိဘဲ ယနေ့မနက်ပိုင်းက စစ်ကောင်စီတပ်က လက်နက်ကြီးပစ်ခတ်မှုတာကြောင့် တောင်ယာလုပ်နေတဲ့အပြစ်မဲ့ပြည်သူ ၃ ဦး လက်နက်ကြီးဗုံးဆံထိမှန်ပြီး သေဆုံးသွားတယ်လို့ သိရပါတယ်။
မင်းတပ်မြို့အခြေစိုက် ခလရ ၂၇၄ တပ်ရင်းကနေ ယနေ့မနက်ပိုင်း ၉ နာရီခွဲဝန်းကျင်လောက်မှာ မင်းတပ်မြို့နယ် တိုက်နယ် ၃ ကျေးရွာဘက်ကို ၁၂၀ မမ လက်နက်ကြီးနဲ့ပစ်ခတ်ခဲ့တာဖြစ်ပါတယ်။
ခလရ ၂၇၄ တပ်ရင်းနဲ့ မျက်နှာချင်းဆိုင်ရွာလို့ပြောလို့ရတဲ့ တိုက်နယ် ၃ က တွီမွီရွာအနီးမှာ ကျရောက်ပေါက်ကွဲပြီး တောင်ယာမှာ အလုပ်လုပ်နေကြတဲ့ အမျိုးသမီး ၂ ဦးနဲ့ အမျိုးသားတစ်ဦး လက်နက်ကြီးကျည်ထိမှန်သေဆုံးသွားတာလို့ CDF-Mindat ပြောရေးဆိုခွင့်ရှိသူ ဆလိုင်းဟားအွမ်ကပြောပါတယ်။
“တိုက်နယ် ၃ မွီတွီရွာပေါ့ မွီတွီရွာဆိုတာက မင်းတပ်မြို့ပေါ်မှာတပ်စွဲနေတဲ့ ခလရ ၂၇၄ တပ်ရင်းနဲ့ မျက်နှာချင်းရွာလို့ ပြောလို့ရပါတယ်၊ အဲဒီရွာကို လက်နက်ကြီးနဲ့ ၃ ချက်ပစ်တယ် အသက် ၇၀ ရွယ်အမျိုးသားတစ်ဦးရယ်၊ အသက် ၆၀ ရွယ် အမျိုးသမီးတစ်ဦးရယ် အသက် ၃၀ ရွယ် အမျိူးသမီးတစ်ဦး လက်နက်ကြီးမှန်ပြီးသေဆုံးသွားတာ’’
လက်နက်ကြီးထိမှန်ပြီးသေဆုံးသူတွေဟာ အသက် ၇၀ ရွယ်အမျိုးသားတစ်ဦး၊ အသက် ၆၀ နဲ့ အသက် ၃၀ ရွယ် အမျိုးသမီး ၂ ဦးတို့ဖြစ်ကြပြီး တောင်ယာထဲမှာ အလုပ်လုပ်နေကြတဲ့အချိန်မှာ လက်နက်ကြီးကျည်ကျရောက် ပေါက်ကွဲကာ ဗုံးဆံ ထိမှန်သေဆုံးခဲ့ကြတာလို့သိရပါတယ်။
ဒါ့အပြင် လူနေအိမ် ၄ လုံးလည်း လက်နက်ကြီးထိမှန်ပျက်စီးခဲ့သလို အမျိုးသားတစ်ဦးမှာလည်း လက်နက်ကြီး ထိမှန်ဒ ဏ်ရာရရှိခဲ့တယ်လို့ သိရပါတယ်။
မင်းတပ်မြို့ပေါ်မှာတပ်စွဲထားတဲ့ ခလရ ၂၇၄ တပ်ရင်းဟာ တိုက်ပွဲဖြစ်ပွားမှုမရှိရင်တောင် နေ့စဉ်လိုလို လက်နက်ကြီး ပစ်ခတ်လေ့ရှိပြီး ယနေ့ဖြစ်စဉ်မှာလည်း ကျေးရွာတွေဘက်ကို ရည်ရွယ်ချက်ရှိရှိနဲ့တမင်တကာပစ်ခတ်တာ ဖြစ်တယ်လို့ ဆလိုင်းဟားအွမ်ကပြောပါတယ်။
“ကျနော်တို့မင်းတပ်မြို့ကို CDF တွေခိုလုံနေတယ်ဆိုပြီး သိလို့လည်းမဟုတ်ဘူး လှုပ်ရှားမှုရှိတာကြောင့်လည်းမဟုတ်ဘူး ရည်ရွယ်ချက်ရှိရှိနဲ့ ကျနော်တို့လူမျိုးတွေရှိတဲ့ရွာတွေကို ပစ်တာ၊ ဒါကတိုက်ပွဲလည်းမဟုတ်ဘူး ကျနော်တို့မျိုးနွယ်စုတွေကို လူမျိုးတုန်းသတ်ဖြတ်တယ်ဆိုပြီး သုံးနှုန်းလို့ရတယ်၊ ဒါကအခါအားလျှော်စွာပစ်နေတာ နေ့တိုင်းပစ်နေတာညမှာလည်းထ ပစ်တယ် နေ့မှာလည်း ပစ်တယ် ပြည်သူတွေရှိတဲ့ဆီကို ရည်ရွယ်ချက်ရှိရှိပစ်တာ အရပ်သားပြည်သူတွေကို ရည်ရွယ်ချက်ရှိရှိတိုက်ခိုက်တာ”
မင်းတပ်မြို့မှာ ပြီးခဲ့တဲ့ဇွန် ၁၄ ရက်နေ့ကမနက်ပိုင်းက စစ်ကောင်စီတပ်နဲ့ CDF-Mindat တို့အကြားတိုက်ပွဲဖြစ်ပွားခဲ့ကြပါ သေးတယ်။
မင်းတပ်မြို့အဝင်ဂိတ်မှာတပ်စွဲထားတဲ့ စစ်ကောင်စီတပ်ကို CDF-Mindat ဘက်က ပစ်ခတ်ခဲ့ပြီး စစ်ကူလာတဲ့ စစ်ကောင်စီစစ်ကြောင်းကိုလည်း မင်းတပ်မြို့လဝကရုံးအနီးမှာကြားဖြတ်တိုက်ခိုက်ခဲ့ရာမှာ အဲဒီနေ့က စစ်ကောင်စီ တပ်သား ၅ ယောက်လောက်သေဆုံးခဲ့တယ်လို့ မင်းတပ်မြို့နယ်အုပ်ချုပ်ရေးအဖွဲ့က ထုတ်ပြန်ခဲ့ပါတယ်။
အဲဒီနေ့တိုက်ပွဲမှာ စစ်ကောင်စီတပ်ဟာ အထိနာတာကြောင့် ခလရ ၂၇၄ နဲ့ ကျောက်ထုအမြောက်တပ်ကနေ ကျေးရွာတွေဘက်ကို လက်နက်ကြီးအနည်းဆုံး ၉ ကြိမ်လောက်ပစ်ခတ်ခဲ့ပြီး ထိခိုက်ပျက်စီးမှုလည်းရှိခဲ့တယ်လို့ သိရပါတယ်။
