စစ်ကိုင်းတိုင်းဒေသကြီး၊ တမူးခရိုင် ခမ်းပါတ်မြို့ကို ယနေ့ (ဇန်နဝါရီလ ၂၂ ရက်) မနက် ၁၀ နာရီ ၆ မိနစ်ချိန်ခန့်မှာ စစ်ကောင်စီက လေကြောင်းဖြင့် ထပ်မံဗုံးကြဲတိုက်ခိုက်ခဲ့ကြောင်း သိရသည်။
ခမ်းပါတ်မြို့ အမှတ် (၄) ရပ်ကွက်ထဲသို့ Cluster Bomb သီးများဟု ယူဆရသော ဗုံးများကြဲချခဲ့ပြီး ထိခိုက်ဒဏ်ရာရရှိမှု ရှိ/မရှိကို ဆက်လက်စုံစမ်းနေဆဲဖြစ်သည်။
“လေယာဥ်လာတာ သိလိုက်တယ် မနက် ၁၀ နာရီထိုးပြီးလောက်ကလာတာ ဗုံးကကြဲတာ တစ်ခါထဲဘဲ မြေကြီးပေါ် ရောက်တော့ ၅ ခါလောက်ဆင့်ကွဲတာ ဘာဗုံးလဲတော့မသိဘူး ကျွန်တော်တို့လဲ အနားမကပ်ရဲသေးလို့ အထိအခိုက် ရှိလားမရှိလားဆိုတာ ပြောလို့ မရသေးဘူး” ဟု ခမ်းပါတ်မြို့က အမည်မဖော်လိုသူ ဒေသခံ တစ်ဦးကပြောသည်။
ယခုလက်ရှိမှာလည်း စစ်ကောင်စီ၏ တိုက်ယာဉ်သည် ခမ်းပါတ်မြို့နှင့်အနီးတဝိုက်တွင် ပျံဝဲနေပြီး ပြည်သူများ သတိရှိကြရန်လိုအပ်ကြောင်း ဒေသခံကပြောသည်။
ပြီးခဲ့သည့် ဇန်နဝါရီလ ၁၆ ရက်ကလည်း ခမ်းပါတ်မြို့ အမှတ် ၁ ရက်ကွက်နဲ့ မြို့အနီးရှိ ကနန်ကျေးရွာကို စစ်ကောင် စီက ဗုံးကြဲတိုက်ခိုက်ခဲ့ရာ သုံးနှစ်အရွယ်ကလေးငယ်နဲ့ ပြည်သူ့လုံခြုံရေး ရဲဘော်တစ်ဦး သေဆုံးခဲ့ရပြီး ဒေသခံပြည်သူ တချို့ဒဏ်ရာရရှိခဲ့ကြသည်။
ထို့အပြင် နေအိမ် ၁၆ လုံးခန့်ပျက်စီးခဲ့သည်ဟု သိရသည်။
ဇန်နဝါရီလ ၂၀ ရက် နှင့် ၂၁ နေ့ကလည်း ခမ်းပါတ်မြို့ကို စစ်ကောင်စီက ဗုံးကြဲတိုက်ခိုက်ခဲ့ပြီး တစ်ပတ်အတွင်း ဗုံးကြဲတိုက်ခိုက်မှု ၄ ကြိမ်ရှိသွားပြီဟုသိရသည်။
ခမ်းပါတ်မြို့သည် အိန္ဒိယ-မြန်မာ နယ်စပ် ကလေး-တမူး ကားလမ်းမပေါ်တွင်တည်ရှိသည့် စစ်ရေးအရအချက်အချာကျသောမြို့ဖြစ်ပြီး NUG နဲ့ တော်လှနရေးပူးပေါင်းတပ်ဖွဲ့များက ၂၀၂၃ ခုနှစ် နိုဝင်ဘာလ ၇ ရက်နေ့က သိမ်းပိုက်ထားခဲ့တာ ဖြစ်ပါတယ်။
မကြာသေးခင်ရက်ပိုင်းက NUG အစိုးရက စစ်ကိုင်းတိုင်းဘက်တွင် ရုံးထိုင်တော့မည်ဟု ထုတ်ပြောလာတဲ့နောက်ပိုင်းမှာ စစ်ကောင်စီက ခမ်းပါတ်မြို့ကို ဆက်တိုက် ဗုံးကြဲတိုက်ခိုက်လာခဲ့ခြင်းဖြစ်သည်။
