(06SV)
ချင်းပြည်နယ်၊ ထန်တလန်မြို့ပေါ်က ခလရ ၂၆၉ တပ်ရင်းဌာနချုပ်စခန်းတစ်ခုကို CNA ဦးဆောင်သည့် ချင်းပူးပေါင်းတပ်က ဝင်ရောက်စီးနင်း တိုက်ခိုက်ရာမှာ စစ်ကောင်စီတပ်သား ၂ ဦးကို အရှင်ဖမ်းမိသည့်အပြင် သေဆုံးမှုလည်းများနိုင်ပြီး ချင်းပူးပေါင်းတပ်ဖွဲ့ဖက်မှ ၃ ဦး ကျဆုံးခဲ့သည်ဟု ချင်းအမျိုးသားတပ်ဦး CNF/CNA ထံမှ သိရသည်။
ယနေ့ ဩဂုတ်လ ၁၄ ရက် နံနက် ငါးနာရီခန့်တွင် ထန်တလန်မြို့အခြေစိုက် စစ်ကောင်စီ ခလရ ၂၆၉ တပ်ရင်းဌာနချုပ်ကို ချင်းအမျိုးသားတပ်ဦး CNF/ CNA ၊ CDF-Thantlang၊ CDF – Zophei ပူးပေါင်းတပ်ဖွဲ့က ဝင်ရောက်စီးနင်းခဲ့ပြီး လုံခြုံရေးစခန်းကုန်းတစ်ခုကို သိမ်းပိုက်နိုင်ခဲ့သည်ဟု ချင်းအမျိုးသားတပ်ဦး CNF/CNA မှ ပြောရေးဆိုခွင့်ရှိသူ ဆလိုင်းထက်နီက ပြောသည်။
“၂၆၉ တပ်ရင်းဌာနချုပ်ကို ကျနော်တို့ ပူးပေါင်းတပ်ဖွဲ့ကနေ ဝင်စီးတယ်။ အဲဒီနေရာမှာ သူတို့ရဲ့ တပ်ရင်းဌာနချုပ် လုံခြုံရေး စခန်းကုန်းတစ်ခုကို ဝင်သိမ်းတယ်။ ဝင်သိမ်းတဲ့ နေရာမှာ ကျနော်တို့ ဘက်က သေဆုံးမှုနဲ့ ထိခိုက်ဒဏ်ရာရရှိမှု တချို့ ရှိတယ်။ သူတို့ တပ်ရင်းဌာနချုပ်ကို ဂျက်ဖိုက်တာက လာတော့ကျနော်တို့က ယာယီပြန်ဆုတ်ထားတာပေါ့နော်” ဟု ဆလိုင်းထက်နီက ပြောသည်။
တိုက်ပွဲတွင် ချင်းကာကွယ်ရေးပူးပေါင်းတပ်က ၃ ဦးကျဆုံးမှုအပြင် ထိခိုက်ဒဏ်ရာရရှိမှု တချို့ ရှိခဲ့ပြီး စစ်ကောင်စီဘက်က တပ်သား ၂ ဦးကို အရှင်းဖမ်းဆီးရမိခဲ့ကာ နံနက်ခင်းအချိန်ဖြစ်သောကြောင့် သေဆုံးမှုကို အတည်ပြု၍ မရသေးကြောင်း သူကပြောသည်။
အထိနာသော စစ်ကောင်စီသည် ထန်တလန်မြို့နှင့် ငါးမိုင်ကွာဝေးသော တိုက်ပွဲ ဖြစ်ပွားမှု မရှိသည့် ခွါဖိုကျေးရွာကို လက်နက်ကြီးနှင့် ပစ်ခတ်မှုအပြင် လေကြောင်းကပါ ဗုံးကြဲတိုက်ခိုက်သောကြောင့် ဘုရားကျောင်းအပါအဝင် အရပ်သားနေအိမ် ၄ လုံး ပျက်စီးခဲ့သည်။
စစ်ကောင်စီက တိုက်ခိုက်ချိန်တွင် ခွာဖိုကျေးရွာသားများ စစ်ရှောင်နေကြသောကြောင့် ပြည်သူများ ထိခိုက်ဒဏ်ရာ ရရှိမှု မရှိကြောင်း သိရသည်။
ပြီးခဲ့သည့် မတ်လ ၃၀ ရက်ကလည်း ခွါဖိုကျေးရွာကို စစ်ကောင်စီက တိုက်လေယာဉ်ဖြင့် ဗုံးကြဲတိုက်ခိုက်မှုကြောင့် အရပ်သား ပြည်သူ ၉ ဦး သေဆုံးခဲ့သည်။
