(004 SS)
ချင်းပြည်နယ် ထန်တလန်မြို့ပေါ်က စစ်ကောင်စီ အမာခံတပ်စွဲထားသော Lai Villa တည်းခိုခန်းကို ချင်းလဲန်းကောင်စီ/ ချင်းပြည်အစိုးရတပ်ဖွဲ့က ယမန်နေ့ညနေပိုင်းက အပြီးသတ် သိမ်းပိုက်လိုက်သည်ဟု သိရသည်။
ထန်တလန်မြို့ထဲ ဒုတိယအမြင့်ဆုံးတောင်ကုန်းနေရာမှာတည်ရှိသော Lai Villa တည်းခိုခန်းမှာ စစ်ကောင်စီတပ်ဖွဲ့များသည် အခိုင်အမာခြေကုပ်ယူတပ်စွဲထားကြပြီး ချင်းပြည်အစိုးရတပ်ဖွဲ့က ဒရုန်း၊ လက်နက်ကြီးများဖြင့် အပြင်းအထန် ထိုးစစ်ဆင်တိုက်ခိုက်ခဲ့ပြီးနောက် စက်တင်ဘာလ ၁၇ ရက်နေ့ညနေပိုင်းမှာ အပြီးသတ်သိမ်းပိုက်ခဲ့ကြခြင်းဖြစ်သည်ဟု ချင်းအမျိုးသားတပ်ဦး CNF ပြောရေးဆိုခွင့်ရှိသူ ဆလိုင်းထက်နီကပြောသည်။
“စက်တင်ဘာလ ၁၆ ရက်မှာ စစ်ခွေး ၃ ယောက် လက်နက် ၄ လက်နဲ့ ကျနော်တို့ဆီပူးပေါင်းလာတယ် အဲဒီပြီးခါမှ မနေ့ ကကျနော်တို့ကသွားချဉ်းကပ်ပြီးတော့ ဒရုန်တွေနဲ့ဗုံးကြဲတော့ သူတို့ဆုပ်သွားတယ် ကျနော်တို့ သေနတ် ၅ လက် လောက်ပြန်ရတယ် အခုလိုင်ဗီလာက ကျနော်တို့ကစိုးမိုးထားတယ်” ဟု ဆလိုင်းထက်နီကပြောသည်။
လိုင်ဗီလာတည်းခိုခန်းရှိသည်နေရာသည် ထန်တလန်မြို့ထဲက စစ်ကောင်စီတပ်စခန်း ၂၆၉ တပ်ကုန်းပြီးရင် ဒုတိယ အမြင့်ဆုံး တောင်ကုန်ဖြစ်ပြီး စစ်ရေးဗျူဟာအရ အချက်အချာကျသည့် နေရာဖြစ်ကြောင်းသိရသည်။
လိုင်ဗီလာကို မသိမ်းပိုက်ခင်တရက်အလို စက်တင်ဘာလ ၁၆ ရက်နေ့က စစ်ကောင်စီတပ်သား ၃ ယောက်သည် လက်နက် ၄ လက်၊ ခဲယမ်းများနှင့် အတူ ချင်းပြည်အစိုးရတပ်ဖွဲ့ထံ အလင်းဝင်ရောက်ခဲ့ကြသည်။
ချင်းလဲန်းကောင်စီ/ချင်းပြည်အစိုးရတပ်ဖွဲ့အနေဖြင့် ထန်တလန်မြို့သိမ်းပိုက်နိုင်ရေး Tilim Operation-4 စစ်ဆင်ရေး ကို ဇူလိုင်လ ၂၂ ရက်နေ့ကစတင်ခဲ့ပြီး ထန်တလန်မြို့ပေါ်က ခလရ ၂၆၉ တပ်ကုန်းအပါအဝင် ဟားခါး- ထန်တလန် ကြားက စစ်ကောင်စီစခန်း ၈ ခုထက်မနည်းကို သိမ်းပိုက်ထားပြီဖြစ်သည်။
ယခု လက်ရှိ ထန်တလန်မြို့ထဲက NLD ရုံးဟောင်း၊ ရဲစခန်း နှင့် CB ဘဏ်အဆောက်အအုံစသည့် ၃ နေရာမှာ စစ်ကောင်စီတပ်ဖွဲ့များ ခြေကုပ်ယူတပ်စွဲထားကြဆဲဖြစ်ပြီး အင်အား ၁၀၀ တောင်မပြည့်တော့ကြောင်းသိရသည်။
“ဒီထန်တလန်မှာစစ်ကောင်စီမကင်းစင်သရွေ့ကတော့ ဆက်လက်ပြီးတော့ လုပ်ဆောင်သွားဖို့ရှိပါတယ်၊ အခက်အခဲ တစ်ခုကတော့ ဟားခါးကနေ လက်နက်ကြီးနဲ့နေ့စဉ်နဲ့အမျှ ကျနော်တို့ရှိနိုင်မယ့်နေရာတွေကို ပစ်ကူတာတွေလုပ်နေတာ ပေါ့လေ” ဟု ဆလိုင်းထက်နီကပြောသည်။
ထန်တလန်မြို့ တိုက်တာအဆောက်အအုံဟောင်းများတွင် ခြေကုပ်ယူထားကြသော စစ်ကောင်စီတပ်ဖွဲ့များသည် ရိက္ခာနှင့် လက်နက်ခဲယမ်းများ ပြတ်လပ်လာနေပြီး ချင်းပြည်အစိုးရတပ်ဖွဲ့ဘက်ကတော့ ထန်တလန်မြို့သိမ်းပိုက်နိုင်ရေးအတွက် ဆက်လက်ထိုးစစ်ဆင် တိုက်ခိုက်လျှက်ရှိသည်။
