(006SV)
ချင်းပြည်နယ်၊ ထန်တလန်မြို့သိမ်းတိုက်ပွဲကို Tilim စစ်ဆင်ရေး – ၄ အဖြစ် ဖော်ဆောင်နေပြီး ချင်းပြည်အစိုးရ ပူးပေါင်းတပ်များနှင့် စစ်ကောင်စီတပ်တို့ကြား တိုက်ပွဲများ ဆက်လက်ဖြစ်ပွားနေကြောင်း ချင်းအမျိုးသားတပ်ဦး CNF/ CNA ပြောရေးဆိုခွင့်ရှိသူ ဆလိုင်းထက်နီက ပြောသည်။
“စကစ (စစ်ကောင်စီ) က မြို့တွင်း ခံစစ်ကောင်းတဲ့ နေရာတွေကနေ ခုခံနေကြတယ်၊ မြို့တွင်း နေ့စဉ် ပစ်ခတ်မှု ရှိနေသေးတယ်၊ ဂျက်ဖိုက်တာနဲ့ ပစ်ကူသလို ဟားခါးကနေ စစ်ကူ ပို့နိုင်ဖို့ ကြိုးစားနေကြတယ်” ဟု ဆလိုင်းထက်နီက ပြောသည်။
ဇူလိုင်လ ၂၂ ရက်မှ စတင်၍ ယနေ့အထိ ချင်းပြည်အစိုးရ ပူးပေါင်းတပ်များသည် ဟားခါး- ထန်တလန်ကြားက လုံခါရ်နှင့် အော်တိုတောင်ပေါ်မှ စစ်ကောင်စီစခန်းများနှင့် ထန်တလန်မြို့တို့ကို တပြိုက်နက် ထိုးစစ်ဆင် တိုက်ခိုက်နေခဲ့ရာ ဟားခါး -ထန်တလန်ကြားက စစ်ကောင်စီစခန်းများနှင့် ထန်တလန်မြို့ပေါ်က အဓိက စခန်းကုန်း ခလရ – ၂၆၉ တို့ကို သိမ်းထားပြီး ဖြစ်သည်။
စစ်ကောင်စီသည် ထန်တလန်မြို့ မကျစေရေးအတွက် မြို့ပေါ်နေရာတချို့တွင် ခံစစ်အခိုင်အမာပြင်ဆင်၍ ခုခံတိုက်ခိုက်နေ ခြင်းဖြစ်ပြီး ဟားခါးမြို့မှ စစ်ကူများ ပို့နိုင်ရေးလည်း ကြိုးစားနေကြောင်း ဆလိုင်းထက်နီက ပြောသည်။
Tilim အော်ပရေးရှင်း – ၄ ကို ဆက်လက်ဖော်ဆောင်နေရာ မကြာမှီတွင် ထန်တလန်မြို့ကို ချင်းပြည် အစိုးရတပ်များ သိမ်းနိုင် မည်ဟု ဆလိုင်းထက်နီက Voice of Chinland နှင့် အင်တာဗျူးတွင် ဖြေကြားထားသည်။
“အခုလက်ရှိ ချင်းပြည်အစိုးရတပ်ဖွဲ့ဝင်တွေအနေနဲ့ ထန်တလန်မြို့သိမ်းရေးဆိုပြီးတော့ Tilim အော်ပရေးရှင်း – ၄ ကို ဖော်ဆောင်နေတာဖြစ်ပါတယ်။ အဲဒီမှာ မကြာမှီမှာ ပြည်သူလူထုက သတင်းကောင်း ကြားရမှာပါ။ ကြားနိုင်အောင်လည်း ကျနော်တို့က အစွမ်းကုန် တိုက်ပွဲဝင်သွားပါမှာဖြစ်ပါတယ်” ဟု ဆလိုင်းထက်နီက ပြောသည်။
ထန်တလန်မြို့သိမ်း တိုက်ပွဲများတွင် နှစ်ဖက်ထိခိုက်ကျဆုံးမှုများ ရှိနေကြောင်း ဆလိုင်းထက်နီက ပြောသည်။
ထန်တလန်မြို့သိမ်းတိုက်ပွဲကို ဖော်ဆောင်နေစဉ် CNA နှင့် CDF – ဟားခါးပူးပေါင်းတပ်သည် ရုန်တောင်စစ်ဆင်ရေးအဖြစ် ဟားခါးမြို့စည်ပင်ဧရိယာထဲက စစ်ကောင်စီစခန်း Keivaangzuan ကို ယမန်နေ့က သိမ်းပိုက်ခဲ့ကြောင်း သိရသည်။
ဟားခါးမြို့နှင့် သီမစ်လွင်ပြင်ကြားက Keivaangzuan စခန်းသိမ်းတိုက်ပွဲတွင် စစ်ကောင်စီက ၁၀ ဦးသေဆုံးပြီး လက်နက်ခဲယမ်းအများအပြား သိမ်းဆည်းရမိခဲ့ကြောင်းသိရသည်။
ဟားခါး- ထန်တလန်ကြားက စစ်ရေးအရ အရေးပါသည့် C3 စခန်းနှင့် အော်တိုတောင်စခန်းများကို ပြန်လည်သိမ်းနိုင်ရေးအတွက် စစ်ကောင်စီတပ်များသည် လေကြောင်းပစ်ကူများဖြင့် အပြင်းအထန် ထိုးစစ်ဆင်မှုများလည်း ဩဂုတ်လ ပထမပတ်က ပြုလုပ်နေခဲ့ကြောင်း သိရသည်။
ချင်းပြည်နယ်တွင် ဟားခါး၊ ထန်တလန်၊ မင်းတပ်၊ ကန်ပက်လက်၊ တီတိန်းနှင့် ဖလမ်းမြို့တို့တွင် စစ်ကောင်စီတပ်စခန်းများ ကျန်ရှိနေသေးကြောင်း သိရသည်။
