(004SS)
ချင်းပြည်နယ်မြောက်ပိုင်း၊ တီးတိန်မြို့နယ်အတွင်းရှိ PDF-Zoland ထိန်းသိမ်းရေးစခန်းမှ ထွက်ပြေးလွတ်မြောက်သွားသည့် စစ်သုံ့ပန်း ၈၀ ကျော်အနက် ထက်ဝက်ခန့်မှာ တီးတိန်မြို့ ခလရ ၂၆၉ တပ်ရင်းထံဝင်ရောက်သွားပြီး ၂၀ ခန့်ကိုတော့ ပြန်လည်ဖမ်းဆီးရမိထားကြောင်း PDF-Zoland နှင့် နီးစပ်သူများထံမှ သိရသည်။
“ထွက်ပြေးသွားတဲ့ စစ်သုံ့ပန်း ၈၀ ကျော်ထဲက ထက်ဝက်ကျော်လောက် မနေ့မနက်အစောပိုင်းမှာ တီးတိန်ရောက်ပြီလို့ သိရတယ်။ ပြန်မိထားတာ ၂၀ လောက်ရှိမယ် ကျန်တာတော့ ပျောက်ဆုံးပေါ့နော်။ ဒီ စစ်သုံးပန်းတွေကတော့ ဖလမ်း တိုက်ပွဲတုန်းက ဖမ်းဆီးရမိသူတွေလည်း ပါတာပေါ့။” ဟု PDF-Zoland နှင့် နီးစပ်သူတစ်ဦးက ပြောသည်။
ယင်းစစ်သုံ့ပန်းများသည် စက်တင်ဘာ ၁၃ ရက် ညနေပိုင်းက တီးတိန်မြို့နယ်အတွင်းရှိ PDF-Zoland ထိန်းသိမ်းရေး စခန်းတွင် အချုပ်စောင့်တပ်ဖွဲ့ဝင်ကို ရိုက်နှက်ပြီးသေနတ်နှင့် ကျည်ဆန်များ လုယူကာ အစုလိုက် ထွက်ပြေးသွားကြ ခြင်းဖြစ်သည်။
ထို့သို့ထွက်ပြေးသွားကြပြီးနောက် PDF-Zoland တပ်ဖွဲ့က တောနင်းလိုက်ရှာကာ ကပ်တဲလ်ကျေးရွာအနီးတွင် စက်တင်ဘာ ၁၄ ရက်ညနေပိုင်းက အပြန်အလှန်ပစ်ခတ်မှုဖြစ်ပွားခဲ့သည်။
ယင်းပစ်ခတ်မှုအတွင်း ဘာသာရေးကိစ္စတစ်ခု ဖြင့် ခရီးမှပြန်လာသော Lamzang ကျေးရွာနှစ်ခြင်းအသင်းတော်က သိက္ခာတော်ရဆရာ Rev. Dal Thawn Tuang ကျည် ဆံထိမှန်သေဆုံးခဲ့ရသည်။
ထွက်ပြေးသွားသည့် စစ်သုံ့ပန်းများမှာ စစ်ရေးအရ အရေးပါသော ကနေဒီတောင်စခန်းသိမ်းတိုက်ပွဲများ၊ ဖလမ်းမြို့နယ် တိုက်ပွဲများနှင့် စစ်ကောင်စီ၏ တန်ပြန်ထိုးစစ်များအတွင်း ဖမ်းဆီးရမိထားသည့် ဗိုလ်မှူး၊ ဗိုလ်ကြီးများ အပါအဝင် ၈၀ ကျော်ဖြစ်သည်။
ယခု ထွက်ပြေးသွားသည့် စစ်သုံ့ပန်းများသည် တော်လှန်ရေးတပ်ဖွဲ့များ၏ သတင်းအချက်အလက်၊ တည်နေရာများကို သိရှိထား သူများဖြစ်သဖြင့် လွတ်မြောက်သွားပါက သတင်းအချက်အလက် ပေါက်ကြားမည်ကို တော်လှန်ရေးအဖွဲ့များက စိုးရိမ်နေကြသည်။
ပြီးခဲ့သည့် ဩဂုတ်လဆန်းပိုင်းကလည်း PDF-Zoland ထိန်းသိမ်းထားသည့် စစ်သုံ့ပန်း ၁၀ ဦးထက်မနည်း ထွက်ပြေး လွတ်မြောက်ခဲ့ဖူးပြီး ၎င်းတို့ကို စစ်ကောင်စီက ကလေးမြို့ စစ်ဆေးရေးဂိတ်များတွင် ပြန်လည်တာဝန်ချထားကြောင်း သိရသည်။
