ရက်သတ္တပတ် (၂) ပတ် ကျော်ကြာ ဖြတ်သန်းသွားလာခြင်းမပြုရန် (ယာယီ) ပိတ်ပင်ထားသည့် တမူး-ကလေး အာရှလမ်းမကြီးကို ပြန်လည်ဖွင့်ပေးလိုက်ပြီဟု PDF-Tamu တပ်ရင်း ၃ က ယနေ့နိုဝင်ဘာလ ၂၉ ရက်နေ့တွင် ထုတ်ပြန်လိုက်သည်။
ကလေး-တူမး အာရှလမ်းမကြီးပေါ်တွင် ပြည်သူ့ကာကွယ်ရေး တပ်မတော် တပ်ရင်း၊ တပ်ဖွဲ့များနှင့် စစ်ကောင်စီတို့ကြား စစ်ရေးတင်းမာမှု အခြေအနေများ ဖြစ်ပွားခဲ့မှုကြောင့် မိဘပြည်သူများထိခိုက်နစ်နာမှုမရှိစေရန် ခမ်းပတ်မြို့မှ ကလေးမြို့အထိ အာရှလမ်းမကြီးကို အသုံးပြု ဖြတ်သန်းသွားလာခွင့်ကို PDF-Tamu က နှစ်ပတ်ကျော်ခန့် ပိတ်ပင်ခဲ့ခြင်းဖြစ်သည်။
ယခုအခါ တမူးမြို့မှ ကလေးမြို့အထိ အာရှလမ်းပိုင်းမှာတော့ စစ်ကောင်စီ၏ လက်အောက်ခံများ နယ်မြေလှုပ်ရှားမှု လျော့နည်းလာသဖြင့် မိဘ ပြည်သူများ၏ စားဝတ်နေရေး၊ လူမှုရေး၊ ကျန်းမာရေးနှင့် ကုန်စည်စီးဆင်းမှုများနှင့် အခြားသော မြန်မာနိုင်ငံအောက်ပိုင်း မြို့ကြီးများအထိ ယနေ့ (၂၉.၁၁.၂၀၂၂) ရက်နေ့မှစတင်ကာ ပြန်လည်၍ ကုန်သွယ်စီးဆင်း ဖြတ်သန်းသွားလာနိုင်ပြီဟု အသိပေးကြေညာအပ်သည်ဟု PDF-Tamu တပ်ရင်း ၃ ၏ ထုတ်ပြန်ချက်တွင် ဖော်ပြသည်။
